臺灣交通部2022年8月26號喺財團法人車輛研究測試中心（ARTC）舉辦「臺灣新車安全評等（T-NCAP）」計劃實驗室落成啟用暨能量展示活動——「臺灣新車安全評等」計劃實驗室原訂2022年5月17號揭幕，但受新型冠狀病毒（武漢肺炎）疫情拖累，啟用活動因而要延期。
臺灣交通部表示，為提升當地車輛安全，並且保障公眾知情權，近年積極推動建立一套新車安全評鑑標準，命名為「臺灣新車安全評等」計劃，建設境內主/被動安全測試驗證能量，並比照境外而喺接內進行新車安全評等。
2021年1月22號，時任臺灣交通部林佳龍部長去到臺灣彰化鹿港嘅「財團法人車輛研究測試中心」舉行「行人安全防護實驗室」新建工程動土典禮，新建1棟實驗室並建置12項測試技術，成為未來「臺灣新車安全評等」嘅測試場地――目標係2023年臺灣可以第一次自己處理新車安全評鑑，當中包括起碼以下8項：
- 前方正面碰撞
- 前方偏置碰撞（按：即係拎司機位一邊錯位去撞）
- 側面碰撞
- 側面撞柱
- 行人保護
- 座椅鞭甩（按：即係測試座椅保護人體頸椎嘅能力）
- 兒童保護裝置評價
- 車輛安全功能評價
為咗宣示「臺灣新車安全評等」計劃完成測試驗證能量， 臺灣交通部2022年8月26號特意舉辦實驗室落成啟用暨能量展示活動，據悉撞擊測試實驗室第一期工程已全部完成，「臺灣新車安全評等」計劃近期將採購首批撞擊測試車型，預計2022年底進行「臺灣新車安全評等」計劃首輪測試，最快2023年第1季公布首輪撞擊測試成績。
而就「臺灣新車安全評等」計劃所規劃嘅撞擊測試能量，會以每一季由「臺灣新車安全評等」計劃採購並測試2款車型，全年度4季總共可測試8款車型，而測試排序將以車型喺臺灣嘅銷售量為原則。
資料顯示，2021年臺灣新車銷售量排行，頭3名都係豐田旗下型號：
- Corolla Cross
- RAV4
- Corolla Altis
根據臺灣方面嘅消息，「臺灣新車安全評等」計劃對擁有「歐盟新車安全評鑑（EuroNCAP）」測試資料嘅進口車型，沿用「歐盟新車安全評鑑」嘅測試成績，由此推斷豐田RAV4有機會唔會出現喺首輪測試名單當中，有可能會改為Corolla Altis——而臺灣國產版Corolla Cross就幾肯定會係列入首輪測試。
至於之後會有機會係咩型號呢？2021年臺灣新車銷售量排名第4名、第5名嘅係：
- 本田CR-V
- CMC Veryca
其中本田CR-V係臺灣國產版，次輪測試應該走唔甩㗎喇！
未來透過「臺灣新車安全評等」結果，臺灣公眾買車時就可以有客觀安全參考依據，亦引導臺灣汽車業界開發更安全嘅車輛，推動臺灣汽車業升級，有助於臺灣汽車業拓展車輛、零件嘅外銷市場，增加臺灣喺國際汽車市場嘅競爭力…而更重要嘅係進一步降低車禍傷亡程度同機率，進而減少社會成本。
訂定一套新車安全評鑑標準對汽車工業有幾大影響？其實真係「一圖勝千言」：
歐盟新車安全評鑑（EuroNCAP）喺1997年2月開始進行車輛撞擊測試，當年嘅測試入面，以「5星」為最高，香港人趨之若鶩嘅「德國名牌」平治、寶馬都只係得「2星」，上面張相入面紅色嗰架路華100，整體評分更加只係得「半星」，公眾一片嘩然。
當年唔少車廠認為歐盟新車安全評鑑（EuroNCAP）所訂嘅標準「高到猶如神話」，不過富豪汽車喺同一年嘅測試成功拎到「4星」，頓時令一眾同行「收聲」轉去「做好啲車」…20年後，上面張相入面黃色嗰架本田Jazz，同級車輛喺同一種撞擊測試後個樣，相信一睇都知有幾大分別。
國際汽車工業向來存在著「唔同地方有唔同安全標準」，甚至乎有「某啲國家」為咗壓低成本去傾銷就「將安全質素就價」——但無可否認嘅係汽車安全質素攸關人命，臺灣人重視自己「Made In Taiwan」嘅工業「嘜頭」，自然會重視追上國際安全標準。
Be the first to comment