國際知名嘅高爾夫球選手老虎活士，近日去到美國南加州參與「捷恩斯公開賽（Genesis Open）」。當地時間2021年2月23號朝早7點幾，老虎活士揸住由贊助商提供嘅一架運動型多用途車（SUV），喺洛杉磯縣Rancho Palos Verdes發生車禍。
當時老虎活士自己一個人揸住架車沿著一條比較陡斜嘅道路落斜，期間突然架車剷埋路中分隔帶，掃到路邊石，然後撞上樹，再打咗幾個關斗，碌到路邊草坪先至停低。
緊急求助熱線喺朝早7點12分接到事發地點附近嘅居民報案，消防員6分鐘後趕到現場，並且利用斧頭劈開擋風玻璃救出老虎活士。送去醫院之後證實，老虎活士腳部有骨折，但無生命危險，情況穩定。
當地警方嘅資料顯示今次純屬意外，老虎活士當時應該無受到酒精或者藥物影響，不過現場並無煞車痕跡，而佢哋推算當時老虎活士揸車嘅速度高過法定限制。
睇返當地記者喺現場影到嘅車禍後車輛損毀情況，可以清楚見到老虎活士架車喺撞完之後，頭尾左右都有明顯嚴重嘅損毀。當地警方表示，今次老虎活士能夠喺咁嚴重嘅車禍之中執返條命，除咗車身結構同埋車入面嘅安全氣袋喺適當嘅時候發揮作用之外，更有賴老虎活士當時扣好安全帶。
能夠喺咁嚴重嘅車禍入面有效保護車上面嘅人，究竟呢款SUV係咩型號呢？
今次老虎活士參與嘅「捷恩斯公開賽（Genesis Open）」就係由南韓現代汽車旗下子公司捷恩斯汽車（Genesis Motor, LLC）贊助，贊助商仲送咗1架GV80畀老虎活士代步――而今次老虎活士就正正係揸緊呢架贊助商提供嘅車時出事。
過去如果你同人講你揸1架南韓牌子嘅車出街，可能唔少人都投以可憐嘅眼光望住你，因為佢哋覺得到你萬一撞車嘅時候都「必死無疑」。
面對全球化嘅自由市場，當你要搶佔一啲先進國家、第一世界嘅生意，自然要跟從佢哋嚴謹嘅法規同埋重視人命嘅觀念。
南韓現代汽車2015年成立子公司捷恩斯汽車，目標就係積極搶攻北美豪華車市場，當然產品要跟返北美標準。GV80係捷恩斯牌頭下面第1款SUV，由南韓蔚山第2廠房生產，標榜「標準配備咗多款安全系統，可以預防好多潛在危險」，主動安全裝備包括：
- 附設人工智能學習司機習慣嘅SCC-ML智能巡航系統
- 連帶轉換行車線輔助功能嘅HDA II公路駕駛輔助系統
- 偵測範圍包括行人、交叉路口嘅FCA預防碰撞輔助系統
- 能夠避免駛離車位時發生碰撞嘅BCA盲點偵測輔助系統
- RCCA後方側向車流輔助系統
- DAW司機疲勞警示系統
嗱~今次老虎活士嘅車禍入面，當地警方睇完路面監察錄影之後都認為跌唔中呢堆高科技嘢可以發揮作用嘅範疇…不過GV80嘅車身結構保持咗車廂完整，加上車廂入面10個安全氣袋，確實令老虎活士成功執返條命。
因為2020年11月先至正式喺美國開賣，美國高速公路安全保險協會（IIHS）都仲未安排到拎GV80做撞擊測試，但今次老虎活士親身喺道路車禍中「實戰」咗1次，結果有目共睹。
GV80入門版大約50000美金，香港同等價位嘅車…當臺灣自己都訂定自己一套追上世界洪流嘅汽車安全測試標準，香港同等職能嘅機構…
1 Trackback / Pingback