歐、非車款同一名 撞起上嚟唔同命

人類文明不斷向前發展,全球道路上嘅車輛數目亦不斷飆升,隨之而嚟嘅係車禍同時越益增加,因為車禍而引致嘅死亡人數,每年更加係以百萬計。

其中關於車輛安全方面,聯合國世界車輛法規協調論壇作為制定客車(passenger cars)安全標準嘅主要全球機構,制定嘅法規提供咗一個涵蓋一系列車輛標準嘅框架,從科學角度去睇,如果嗰一系列車輛標準能夠套用去各國嘅車輛製造標準,毫無疑問可以喺車禍中挽救返唔少生命。

世界衛生組織早喺2015年已經發表報告,指道路交通傷害係年輕人致死嘅頭號原因,報告當中仲審查7項聯合國世界車輛法規協調論壇提出嘅主要車輛安全建議――可惜嘅係報告審查過嘅147個國家之中,只有40個國家符合所有7項關於車輛標準嘅規定,當中35個係高收入國家。

咁究竟呢啲安全標準嘅差異喺實際車禍中會造成幾大分別?

1979年美國開展全球第1次新車安全評鑑(New Car Assessment Program),正式以標準方式搞車輛撞擊測試並按一定標準評分,務求推動車輛製造商改善車輛安全。

多個國家喺1990年代亦陸續加設呢一類測試同評分計劃,其中較為香港人熟悉嘅應該係由1996年成立嘅歐盟新車安全評鑑(EuroNCAP)――香港消費者委員會由1997年已經開始喺旗下《選擇》月刊引用相關評分,加上香港代理商嘅回應,畀香港市民參考市面上買到嘅車輛有幾安全。

廿幾年匆匆過去,全球各大車輛製造商著實有因應呢類新車安全評鑑而去改良車輛設計,今日行入車行買到嘅車輛明顯比以前更能夠減輕車禍中司機同乘客嘅傷勢。

但…即係咁講…正如之前話過,唔係每個國家都套用晒啲車輛安全建議――車輛製造商賣車去唔同國家當然亦識得「走盞」。

2011年喺英國成立嘅全球新車安全評鑑(Global NCAP),近年關注唔同地區賣緊同一款式名稱車輛卻有唔同安全標準嘅問題。佢哋趁著2020年2月19~20號喺瑞典斯德哥爾摩舉行「第3次道路安全問題全球部長級會議」嘅時候,擺咗2架同一款式名稱、唔同地區賣緊、做完同一個撞擊測試嘅車輛喺斯德哥爾摩中央車站作公開展示。

根據全球新車安全評鑑發佈嘅影片,佢哋呢次揀咗2架日產旗下1款叫NP300嘅輕便客貨兩用車(皮卡/農夫車),不過1架係白色新簇簇嘅2019年出廠非洲版、1架係灰色二手嘅2015年出廠歐洲版,以時速56公里迎頭相撞…

結果嘛…不如睇片先…

全球新車安全評鑑做完呢次撞擊測試,發覺歐洲版嘅司機仲有機會自己生勾勾行落車,但非洲版嘅司機就「應該死__咗」。

同一時間,歐洲版係裝有防跣呔系統、電子穩定控制系統等嘅主動安全裝置,而非洲版係無嘅…佢哋相信呢啲差異正正因為歐洲有嚴謹嘅安全規定所致。

其實呢~非洲版嘅所謂「新車」,只不過係按日產D22系facelift版生產,即係2001年款,至於歐洲版嘅「二手車」,反而係日產D23系,即係2014年款…

全球新車安全評鑑主席David Ward對撞擊測試結果嘅意見係,如果生活喺非洲,買架新車唔代表會係買到架安全啲嘅車,「由有嚴謹安全規定嘅地區買二手車運返非洲隨時對用家仲有保障…發表呢個撞擊測試報告係想話畀公眾知道,車輛製造商嘅雙重標準係完全唔可以接受」。

國際汽聯基金會對於今次測試結果難掩憤怒,行政總監Saul Billingsley直言:「日產係咪覺得非洲人條命無歐洲人條命咁矜貴?如果唔係嘅話又點解釋呢2架車有咁令人震驚嘅安全差別?」

南非道路安全大使Zoleka Mandela更加形容呢個情形「係罪行」…

香港作為前英國屬土,亦係國際上舉足輕重嘅大都會,但大家又知唔知道香港嘅車輛安全標準其實…哈哈…哈哈哈…