人類自從發明咗汽車之後，車輛數目同埋相關嘅死傷都有所增加。曾幾何時，人類認為車禍本身只係道路使用者個人嘅問題，車禍令人死傷亦係「無可厚非」。
第二次世界大戰之後，全球車輛數目急速飆升，車禍亦越趨頻繁同嚴重，科學界同工程界就開始有呼聲指出，車輛由設計到生產上其實係可以減少車禍傷亡，輾轉幾十年間促成咗多個國家訂立車輛安全標準，並且建立出一連串撞擊測試，務求以科學方法儘力拯救人命。
汽車台之前有講過，其實國際間嘅車輛安全標準都係「各處鄉村各處例」，造成一啲地方嘅車輛比其他地方嘅「更安全」…當然…亦有國家係好統一咁「唔安全」。
同香港「一海之隔」嘅臺灣，呢幾十年都有生產汽車，但臺灣生產嘅車輛有幾安全，同歐、美、日呢啲汽車生產大國一比，就未必令人信服…至於近年銳意想將「臺灣製造」（Made In Taiwan，MIT）成為信心保證嘅臺灣汽車生產商，就要不遠千里咁送啲車輛去歐洲代為進行撞擊測試。
臺灣交通部為提升當地車輛安全，並且保障公眾知情權，近年積極推動建立一套新車安全評鑑標準，命名為「臺灣新車安全評等（T-NCAP）」計劃，務求促使臺灣嘅汽車生產商一定要生產更安全嘅車輛。
2021年1月22號，臺灣交通部林佳龍部長去到臺灣彰化鹿港嘅「財團法人車輛研究測試中心」舉行「行人安全防護實驗室」新建工程動土典禮。今次將會新建1棟實驗室並建置12項測試技術，預計2022年完工――成為未來「臺灣新車安全評等」嘅測試場地――目標係2023年臺灣可以第一次自己處理新車安全評鑑。
臺灣交通部表示，為咗令消費者得知新車安全資訊，並促使業界提升車輛安全技術，臺灣行政院核定嘅「臺灣新車安全評等」計劃係參考「歐盟新車安全評鑑」（EuroNCAP）測試方法，規劃出往後分幾年建構「臺灣新車安全評等」制度，包括建立補足主動安全同埋被動安全評鑑項目檢測能力，當中包括起碼以下8項：
- 前方正面碰撞
- 前方偏置碰撞（按：即係拎司機位一邊錯位去撞）
- 側面碰撞
- 側面撞柱
- 行人保護
- 座椅鞭甩（按：即係測試座椅保護人體頸椎嘅能力）
- 兒童保護裝置評價
- 車輛安全功能評價
臺灣交通部講到，未來會繼續透過現行強制車輛型號安全審驗制度，加上自願「臺灣新車安全評等」制度，提升臺灣車輛安全。
臺灣交通部指出，由於「臺灣新車安全評等」計畫係新興計畫，並且屬於高度專業，目前「財團法人車輛研究測試中心」相對具備完整車輛安全法規檢測能力，所以為整合資源，減輕政府財政負擔，善用民間資源力量，已依《政府採購法》規定，2019年9月17號簽約委託「財團法人車輛研究測試中心」代辦採購「臺灣新車安全評等」計畫所需檢測設備、實驗室廠房、建立檢測技術；2020年6月9號委託「財團法人車輛安全審驗中心」建立一套符合「臺灣新車安全評等」嘅管理規章制度以便運作，結合各界共同保障消費者權利。
經盤點「財團法人車輛研究測試中心」喺主/被動安全檢測能力、行人保護項目仍然缺乏設備、廠房建築，故此委託「財團法人車輛研究測試中心」建立4項主動安全驗證技術，並預計搭配新動土建設嘅「行人安全防護實驗室」，將可於2022年完成8項被動安全驗證能力，並持續建立能夠同國際相比嘅評等技術。
臺灣交通部表示，依臺灣行政院核定計劃同「財團法人車輛研究測試中心」、「財團法人車輛安全審驗中心」簽訂相關合約規定，臺灣交通部每個月都會同受委託廠商召開工作會議，積極督促廠商依合約規定辦理履約事宜，並責請廠商喺唔影響履約品質情形下，儘量加速辦理，預計2023年辦理第1次「臺灣新車安全評等」。
未來透過「臺灣新車安全評等」結果，臺灣公眾買車時就可以有客觀安全參考依據，亦引導臺灣汽車業界開發更安全嘅車輛，推動臺灣汽車業升級，有助於臺灣汽車業拓展車輛、零件嘅外銷市場，增加臺灣喺國際汽車市場嘅競爭力…而更重要嘅係進一步降低車禍傷亡程度同機率，進而減少社會成本。
訂定一套新車安全評鑑標準對汽車工業有幾大影響？其實真係「一圖勝千言」：
歐盟新車安全評鑑（EuroNCAP）喺1997年2月開始進行車輛撞擊測試，當年嘅測試入面，以「5星」為最高，香港人趨之若鶩嘅「德國名牌」平治、寶馬都只係得「2星」，上面張相入面紅色嗰架路華100，整體評分更加只係得「半星」，公眾一片嘩然。
當年唔少車廠認為歐盟新車安全評鑑（EuroNCAP）所訂嘅標準「高到猶如神話」，不過富豪汽車喺同一年嘅測試成功拎到「4星」，頓時令一眾同行「收聲」轉去「做好啲車」…20年後，上面張相入面黃色嗰架本田Jazz，同級車輛喺同一種撞擊測試後個樣，相信一睇都知有幾大分別。
臺灣人重視自己嘅工業「嘜頭」，自然會重視追上國際安全標準；反觀香港，一直有一種風氣係抗拒「做廠」，而又同時唔介意「得過且過」，香港社會上上下下當然唔會重視工業、唔會重視安全標準。
1 Trackback / Pingback