華人傳統上話農曆新年正月初三「赤口」容易同人嗌交，估唔到西元新年都會發生啲咁嘅事㗎！
有讀者搵本台報料，2021年1月3號朝早大約9點半，佢同一班街坊去到荔枝角道西行美孚新邨第二、第三與第四期對開嘅「美孚站」巴士站等巴士去新界，等等吓就見到以下呢一幕：
根據美孚新邨當區嘅不成文規矩：的士係可以喺以前嘅影都戲院對面，即係依家OK便利店嘅位置開始排隊等候乘客，隊尾以私家路路口為終結。
今次事緣係一朝早已經有一大堆的士喺度等緊有無生意，佢哋由美孚新邨嗰條私家路排隊，不過無乜生意令好多的士滯留，隊尾就過咗私家路路口仍然繼續排，排返出去荔枝角道「美孚站」巴士站嘅位置。
到朝早大約9點半，九巴行緊63X號路線去洪水橋（洪福邨）嘅Dennis Trident E500 Turbo 12米雙層巴士（車隊編號：ATENU1365，車輛登記：VJ8790）依照預定路線「埋站」上落客 ，但係好快就被排隊嘅的士包圍，搞到巴士出唔到站。
巴士車長喺呢種「真理在胸軚在手」嘅情況，面對堵塞巴士站嘅的士當然即時「響個長咹叫你走」啦！
結果出現上面影片嘅一幕：一架貼有牛頭角力恒車行標記嘅的士（車輛登記：VS4897），嗰個的士司機開門落車走去巴士車長隻窗側邊，先嚟破口大罵一輪，然後挑釁巴士車長落車打交，不過睇見有居民拎起手機錄影又好似自知理虧就即刻上返車揸走架的士，巴士之後先至可以順利出站繼續行程。
本身堵塞巴士站已經係有違交通條例，加上其實現場係有劃有「黃線」，表明「禁止停車」，如果再拉闊少少個畫面嚟睇，早喺麥當勞對開個位置就已經劃有明顯嘅「巴士綫」標記。
所以總結嚟講，唔係大聲夾惡撩交打就係大晒㗎！不過喇喎，又真係唔知道當區區議員同埋相關執法部門會唔會打算處理呢啲事件呢？
Be the first to comment