台灣計程車博物館「盡量捱」

(計程車博物館提供)

香港人去台灣旅遊,目的地通常都係台北、台中、高雄等大城市,而且只係去啲吃喝玩樂食玩買瞓嘅地方「影相打卡」,「博物館」、古蹟之類「文化系」鮮有踏足。恕我串咀少少咁講,唔好話「政治化」嘅 228紀念館或鄭南榕紀念館,相信要不是有「豬肉紙」做手信,無人會去大稻埕歷史建築群遊走。又或者位於宜蘭火車站5分鐘步程嘅「宜蘭菸酒賣捌所」若不是一間 CAFE,恐怕就是梁靜茹 FANs 都未必會去呢處百年歷史古建築「朝聖」《愛久見人心》MV 拍攝場地。

「宜蘭菸酒賣捌所」建於日治時期。現為宜蘭縣政府法定古蹟
梁靜茹2015年發行專輯《愛久見人心》MV 在此取景拍攝

台灣嘅博物館、文化場地,除咗由「官辦」或香港叫法「志願組織」嘅「財團法人」(鄭南榕紀念館屬於這類) 開設之外,仲有唔少「民辦」的。相比「財團法人」,民辦博物館要自負盈虧,本文講及的「計程車博物館」,就屬於呢一種類別。

一場武漢肺炎搞到全地球雞毛鴨血,台灣响五月中旬終於俾柯文哲「玩出禍」失守,要實施「三級管制」── 除生活必須場所、商舖(食肆、超市、藥房等等) 之外統統暫停營業。政府有提供支援補助俾生計受影響嘅民生行業,表面上算是合理,但不少對社會整體具有價值非生活必須的行業都不在補助措施涵蓋範圍,例如舞台劇演員等的文化表演行業;計程車博物館這類「民辦」博物館也是另一種未能受惠的行業。

大家可能會質問「台灣嘅事關香港乜事」。最顯淺嘅原因係計程車博物館內有一部100%「堅料」嘅退役香港市區的士。

攝於去年1月初
館長 Jeremy 從香港「劏車場」購入的真香港市區的士,運抵台灣翻新後展出。
車牌牌板、咪錶、半圓形五座位貼紙、司機證架….. 全部來自香港

館長李濟成 (Jeremy) 响 2019 年自資開設「計程車博物館」嘅初心係認為交通文化承載住一個國家、城市嘅社會演變,其中計程車 (的士) 蘊含眾多元素,例如接載過不同階層嘅人,或者係「任何人出門旅遊,在當地人生路不熟必定搭過的士,見到這些車很自然會產生共鳴」。甚至再深入一點,車款變化記錄當地嘅經濟同社會發展進程。

館內展出嘅的士車款除咗台灣、香港,仲有日本、法國、英國、美國的。

攝於2020年1月初
去年4月加入的新展品 – 來自屏東縣1979年出廠的「裕隆」勝利803 (日產原型 Cedric (330系) )
(計程車博物館提供)

而响博物館嘅另一翼,仲有過萬件同的士有關嘅展品,例如的士咪錶、燈箱、模型、玩具等等。

單是以展品項目嘅豐富程度,可見 Jeremy 嘅用心之深。更是在館舍的另一角落,擺放咗 2015年2月4日台北松山機場復興航空 GE235 空難肇事飛機撞到的該部「小黃」嘅殘骸。

舊年我去參觀時問過 Jeremy 點解有呢件展品,佢話最基本係記錄歷史,讓更多人能更真實地了解該次空難,藉以喚起各方注意航空安全的重要性。

博物館開設以來嘅收入尚算足夠維持營運開支,但「三級管制」實施後被迫閉館,失去咗全部收入,唯有「撿老本」支付水、電、清潔、車輛保養…..的開銷,還有不欲員工失業仍在支付薪金。週前台灣有傳媒報導他和博物館的情況,我就打電話給他聊天問候。

電話另一端的他仍然一派樂天聲線不斷說「還未死,還活著,哈哈哈….」。當然有談到他和博物館面對的境況,縱未到山窮水盡,但也未敢完全樂觀。
「撐得一天得一天咯」
「還未餓死就盡量撐下去咯」
「關閉的話,我損失的是錢,但對台灣、香港、日本以至世界各地來講,失去的不是金錢能抵償」
Jeremy 娓娓道出當前面對難關仍抱持的想法。

市儈嘅港燦們可能想 Spin「懶偉大」「虛偽之言」,但正如本台早前一集影片節目介紹的 1987年Toyota Crown Royal Saloon 承載住車主 Terence 的父子情,或是 HK Bus Channel 介紹 新加坡SBS Transit Volvo B10TL 的一集內提到「一部巴士承載住你同我嘅故事」,

呢啲「唔能夠用金錢衡量」嘅事物,總是要有人出錢出力先可以實現。唔係你又點樣可以「影相打卡」呢!

另一方面,亦正如 SBS Transit Volvo B10TL 的節目內還提到香港的交通文化保育仍有不足,如今在台灣有有心人為香港保存的士嘅「血脈」,相信大家會認同值得關注「計程車博物館」的情況。

也許當刻大家想問「有乜可以幫到佢哋 (計程車博物館)」。其實我亦諗唔到啲乜。只是當日 Jeremy 在電話中有提到當地報導出街之後收到不少查詢要預購門票,但他的回答除了謝謝之外就是「不知道何時重開」,歹勢 (台語,意即「唔好意思」) 的不知如何婉拒,但最起碼知道還是有支持。台灣人就係咁可愛!

至於响香港嘅,好難預購門票去支持 (門票每張 TWD200,銀行手續費「妹仔大個主人婆」),確實眼前能做嘅唔多。或者咁…… 最起碼大家記住响宜蘭有呢個可以留連半日 (遲啲再增加設施可能可以留足一個 Full day),幻想吓自己做「的士佬」、有嘢睇、有得食、有得玩嘅地方,待武肺危機解除之後就起碼去一次,相信 Jeremy 都會銘記來自香港嘅支持。

博物館內仲有碰碰車玩。全部「的士色」
(計程車博物館提供)

點樣去?揸車當然最方便,台北市區出發國1轉國5預計一個小時多啲;搭車的話,由台北搭國光客運、首都之星、葛瑪蘭客運嘅長途巴士,或台鐵去到羅東或蘇澳,時間校得啱可以再轉「區間車」去蘇澳新站,出站後再行大約10分鐘就到。「飛的」由羅東過去車費預計大約 TWD500,由蘇澳出發大約 TWD180 (始終蘇澳往返台北嘅交通唔夠羅東方便)。或者學吓睇台鐵時刻表,如果有莒光號快車、自強號特快車會停蘇澳新站,咁就「一程到底」。

1 Trackback / Pingback

  1. 【跟進消息】台灣計程車博物館 危機暫解 - 汽車台 HK Car Channel

Leave a Reply

Your email address will not be published.


*