全新豐田 Sienta 小型七人車官方照流出

油價不停上升,又唔想轉用電動車嘅朋友,相信都希望搵一部引擎容積細,耗油量低嘅車嚟用。如果可以載到七個人,外型設計又唔差嘅就更好喇!

日本豐田就喺今日(8月23日)發佈咗更多小型七人車 Sienta 嘅外觀同車廂相片。雖然喺教早前已經希人拍攝到新車付運嘅相片,但係官方嘅相片可以更清楚見到全車外貌。

喺外觀上,採用咗類似 Porte(XP140)嘅「大口」設計,方形黑色鬼面罩中間亦都有一條打橫嘅膠條,用作安放車牌之用。頭燈組就有立體造形,指揮燈擺放喺靠向中間另一條黑色飾條旁邊,感覺都幾醒目。

新一代 Sienta 外觀上,車頭似 Porte,車尾似上一代 Sienta

而車身側面睇落講真幾似採用同系底盤嘅 JPN Taxi / Comfort Hybrid,都係高高地,特別係左邊趟門嘅線條……但 C 柱後嘅玻璃就用咗不規則形設計,有少少上一代 Sienta 嘅影子。腰線下面拼上一條連貫前後車門嘅黑色塑膠飾件,令外觀上嘅家庭向得嚟帶少少廉價感🤡!車身顏色方面,黑、白、灰嘅啲大路嘅顏色當然唔會少得啦,仲有青春得嚟又沉實嘅淺灰綠、紅、藍、香檳金,同埋筆者覺得最好睇嘅紅黑、藍黑兩款 Two Tone 色。

咁多隻色,有無一隻色睇啱呀?

車廂內嘅中控台同座位都有唔同嘅深淺色配搭。由相片可見,中控台上嘅波棍都因應汽油同Hybrid 形號而有兩款唔同配置。全車連埋司機嘅七個座位分別以 2+3+2 佈局排成三行,尾排可以完全收摺喺車廂地台下面,而中排就可以向前翻摺,將行李空間擴大。

中控台同座位都各自有深淺色配搭
小型家庭七人車最緊要一定係車廂空間多變
中排座位可以向前翻摺,後排更可收摺入車廂地台

除咗一般普通版嘅 Sienna 之外,當然仲有福祉車版本啦!福祉車除咗有車尾斜台上輪椅嘅版本外,仲有電動輔助上落嘅司機位版本。唔好睇少福祉車呀,喺日本本土其實都有一定銷量㗎!

除咗普通版本,新一代 Sienta 仲有福祉車型號

不過講到底,輸港版本嘅規格會有幾多設備被 Out 走,價錢定位係邊一個 Range,就真係恃目以待喇!

Be the first to comment

Leave a Reply

Your email address will not be published.


*