小鵬汽車嘅香港全新陳列室喺2026年7月10號正式進駐啟德AIRSIDE，成為中國以外首間採用SI 3.0 體驗標準嘅陳列室，亦係中國以外第1個科技中心，標誌着小鵬汽車喺香港市場嘅産品體驗以及門市展示模式邁向全新里程碑。
小鵬汽車副董事長兼總裁顧宏地博士、森那美汽車香港及澳門董事總經理黃國斌先生等嘉賓一同出席小鵬全新 AIRSIDE 陳列室開幕禮。
呢次進駐 AIRSIDE 唔只係小鵬汽車進一步拓展版圖，更加全新演繹咗小鵬汽車對未來智慧出行體驗、科技品牌形象，進一步向香港消費者展現小鵬汽車對旗下產品實力與創新定位。
小鵬汽車副董事長兼總裁 顧宏地 博士表示：「全新AIRSIDE陳列室係首間位於中國以外嘅 SI 3.0 體驗標準陳列室，唔只畀大家親身感受小鵬點樣思考未來出行，亦能夠更深入了解我哋對 Physical AI 嘅探索，點樣將科技創新變成觸手可及嘅現實。作為小鵬面向全球嘅重要窗口，香港匯聚國際優勢以及創新人才，我哋將會持續深耕香港市場，為消費者帶嚟更智慧、安全嘅出行體驗。」
森那美鵬悅汽車香港及澳門董事總經理 黃國斌 先生表示：「森那美集團一直全力支持小鵬喺香港市場發展，短短2年間已經建立3個陳列室據點，並且攜手 KINETA 持續完善充電網絡，推動電動車生態發展。展望未來，我哋將會引入更多全新車型，2026 年將會進一步提升市場競爭力以及整體表現，同客戶並肩同行，一齊邁向更智能、更可持續嘅未來。」
SI 3.0 開啟全方位産品體驗 感受 AI 出行未來
全新SI 3.0體驗標準建基於深入思考新世代用戶需求，希望用戶走入陳列室嗰陣，睇到嘅唔只係「車」，而係「車」背後嘅技術、智能、未來。
相比以往以展示車輛以及銷售功能為主嘅空間模式，SI 3.0透過更清晰嘅視覺導覽系統、更具科技感嘅空間設計、更靈活嘅互動模型同埋裝置，以及更舒適嘅洽談同埋體驗環境，將產品、技術、商標生態更完整串連，畀客戶喺全方位體驗中，循序漸進理解小鵬汽車嘅核心價值，感受小鵬汽車所傳遞嘅未來出行理念同埋創新科技。
3大焦點車型矚目登場 展現智能、性能、設計美學
為配合全新小鵬 AIRSIDE 陳列室開幕，小鵬汽車喺2026年 7 月 10 ~ 12 號假 AIRSIDE 露天廣場展出3款首次喺香港亮相嘅焦點車型，畀香港車迷率先近距離感受小鵬新一代產品設計方向，包括：
- 電動轎跑P7 Ultra
- 旗艦SUV GX
- 早前北京首次亮相嘅L03
核心科技焦點展示 呈現小鵬自主研發成果
除咗展示重點車型，全新 AIRSIDE 陳列室暨科技中心亦展示多項科技裝置，包括芯片導鏡框、芯片櫃，以及全新一代混合碳化硅同軸電驅電機模型。
另外，陳列室亦設有交互立柱屏幕，畀客戶可以同AI「小P」互動，進一步將 AI 汽車背後抽象嘅技術邏輯形象化，變成可感知嘅互動體驗。
透過呢啲精心策劃嘅展示內容，客戶唔再只係停留喺外觀、規格、參數層面，而係能夠更全面理解小鵬喺芯片、智能硬件、電驅系統，以至整體技術架構上嘅自主研發實力同埋創新成果。
聯手 KINETA 完善電動車配套 AIRSIDE 聯名充電站同步啟用
拓展產品同埋顧客體驗之餘，小鵬汽車亦持續推動香港本地電動車充電設備發展，並且同森那美集團旗下 KINETA 攜手合作喺 AIRSIDE 設立香港第2個小鵬汽車同KINETA聯名充電站。
全新充電站位於啟德 AIRSIDE 地庫3層，設有4個快速充電車位 （170、171、172、173號車位），配備CCS2 快速充電裝置，最高充電功率達360kW，歐式充電插頭亦兼容香港市面上大部分牌子嘅電動車車款，為唔同用戶帶嚟更高效便捷嘅充電體驗。
客戶可以透過 KINETA Charge APP 查閱充電站實時使用狀態並且導航到最新 AIRSIDE 充電站，進一步體現小鵬汽車喺產品、服務、基建配套上嘅整合優勢。
Be the first to comment