屯赤隧道明通車，狗衝試路會否大塞車

屯門-赤鱲角隧道今日舉行通車儀式 (「開通」係共產黨用字)，聽朝0800正式行得車，好多駕車人士已經磨拳擦掌準備「新屎坑」，有部份嘅講明測試對比行屯門公路嘅需時。的確有唔少屯門人期待新路能舒緩屯公嘅交通擠塞，但效果係咪真係得，起碼等到星期一 ── 通車後第一個工作日；但更可能要起碼過咗大年初一 ── 假設武漢肺炎真係消失，所有香港人都可以真正重拾佢哋嘅「至愛」── 返工，一切交通狀況回復往日慣常。

實效如何，拭目以待。但有啲理論因素、現實而預計不變嘅客觀條件，可以估算一吓成效如何。

第一，响 HK Bus Channel 剛呢一集 (上/下集) 節目提到，青嶼幹線繁忙時間嘅流量負荷已經超過七成，餘下兩成多會否足夠應付新增嘅車流？

有網民指出，新路通車之後，往來屯門至東涌 / 機場嘅車就會消失於屯公，所以一定舒緩到屯公擠塞……

諗落好似好有道理，但是要出九龍，除非仲識得行荃灣路-葵涌道-荔橋，否則唔理你「死人尋舊路」還是「新屎坑三日香」，最後都係要經過下面張Cap圖嘅呢一度再前少少嘅嗰一度

亦即係話，可能屯公塞少咗，但「三號幹線往九龍青衣交匯處擠塞，青馬大橋龍尾馬灣，汀九橋龍尾屯門公路落斜位」可能變成每日交通消息之慣常。

第二，的確仲有荃灣路可以選擇，但如果行新路又行荃灣路形同兜大圈，行屯門公路嘅仲可能會行得到。但早上「荃灣路龍尾德士古道橋頂」，傍晚「德士古道落橋龍尾過咗荔景，大涌道落橋龍尾海濱花園」，屯赤隧道通車應該唔會對荃灣路有乜改變。

第三，快線撚、拍跳撚係不受道路限制，無處不在，無時無刻隨時出現你眼前。

第四，一個習慣咗响屯公指針唔過80霸住條右線嘅司機落到北大嶼山快速公路要佢踩到起碼105，可能比起揸住架頭轆車响「拓海彎」彎心踩迫力嘅意外率仲高……

第五，應該係「致命一擊」── 屯赤隧道屯門出入口係一個大型迴旋處。就算唔日日炒鑊金，全部車都要焗住收油。你估真係由皇珠路一腳油直踩入㝫潛水到東涌 / 由青馬大橋一腳油直踩到屯門市廣場呀?!

不過，就算唔係武漢肺炎，按往常年期月份日子，交通情況都必定要「下年請早」先至見真章，姑且大家睇完呢篇垃圾得啖笑先啦。