屯門赤鱲角隧道今早正式通車，多位本台友好，與及幾位議員以不同方式進行試路，有駕駛私家車，有駕駛旅遊巴，亦有搭巴士、的士。
試路之後的評語都係「時間上無乜著數」，「迴旋處邊X個設計㗎」！
先講「時間」。由屯門公路皇珠路出口直踩龍富路至迴旋處需時大約5分鐘，但出迴旋處除非靠右線「打尖」，否則「排隊」最少1分鐘。
去到港珠澳大橋人工島出口再需時6-7分鐘。至北大嶼山快速公路總計需時約12-15分鐘。以今日假期嘅交通情況，相同嘅耗時由相同嘅起點 (屯門公路/皇珠路交界) 行駛屯門公路往九龍方向起碼過咗深井，已在汀九橋 或 油柑頭部「快相機」。
的確，平日屯門公路「塞」至深井起碼20分鐘，相比試路結果似乎新路有著數，但前段已經提及今日在龍富路迴旋處「排隊」已耗時最少1分鐘。明天是「工作日」，隨時「輸到嘔凸」。
要知道日常會駛過龍富路迴旋處嘅車輛仲有往來內河碼頭及附近倉庫嘅貨櫃車，與及稔灣堆填區 / 廢物轉運站嘅垃圾車、泥頭車，已經可預計龍富路嘅交通即使在「非繁忙時間」將會有幾繁忙。
「有入亦有出」，貨車還會由內河碼頭一端嘅龍門路駛至迴旋處；重型車起步加速緩慢，即是就算可以由龍富路「直衝」入迴旋處，之後都必定要收油、踩迫力。迴旋處整體車流消散速度受阻，龍富路好難無「龍尾」。即使由東涌駛至，亦因為呢個情況相信必定要等，爭在龍尾在那「最後200米的隧道」管內還是更後的位置。
不過，來自蝴蝶灣屋苑嘅車輛「更加無運行」，因為龍富路交通流量必定增加，由龍門路駛入迴旋必定難上加難，等候時間必定更長。
屯門區議會樂翠選區議員盧俊宇出post表示，的士司機直言該處必成「博愛迴旋處2.0」。
呢個講法，單係今日，我哋聽過唔止一次。接續嘅語句大多數都係狠批、狂批負責設計嘅路政署「無腦」「白痴」；更當然不缺粗口「痴L線」、「坐响冷氣房膠畫」、「十九工程師」、「垃膠圾工程師」等等。
甚至乎，屯門出口接近龍富路迴旋大約200米嘅隧道，更可謂係「膠畫中之極品」。
第一，上圖紅色標記範圍完全有足夠空間，點解唔將走線設計去呢度。就算我睇晒巴士轉車站一帶嘅路面估計預留興建收費亭，都可以設計去標記範圍。
第二，嚟個近鏡，清楚見到不論相當於前一張圖嘅範圍 (紅色標記)，還是現有嘅隧道「上蓋」(藍色標記)，離路面高度約20米。要鏟平埋佢好撚難咩？ (恕要直出粗口字)
唔想吓吓都「政治化」「陰謀論」，但除咗鋪路予某些政客「要求改善屯赤隧道屯門出口」爭取曝光，與及第二、第三、第N期改善工程俾建築公司搵多啲之外，諗唔到其他原因。
又或者係特登「製造」塞車，方便煽動蝴蝶、湖景、兆禧、海翠….. 嘅居民「要求加快興建鐵路教『神廟』」西鐵屯門南延線嘅車站。然後，我真係再諗唔到點解咁樣起。
到底繼續行屯門公路塞，還是「新屎坑」兼搏一鋪行屯赤隧道，閣下自行決定。
鳴謝：康和旅運有限公司
Be the first to comment