2026年10月喺社交平台上面，有日本網民表示見到豐田「Crown Crossover」型號嘅疑似新警車準備交車，即刻引起熱話。呢款新警車究竟背後反映緊日本警方嘅邊啲實際考慮？
2026年10月，日本陸續有網民喺X同埋YouTube放出載住幾架豐田「Crown Crossover」嘅運車卡車嘅相同埋片。呢啲車嘅車頂經過改裝，有啲仲噴晒黑白雙色，日本車迷睇到即刻熱議。據講拍攝地點喺愛知縣名古屋市南部、東海市新寶町一帶。
唔單止咁，無幾耐之後，又有網民話見到某個停車場泊咗成十幾架豐田「Crown Crossover」。呢批車同樣油晒黑白雙色，個樣完全就係日本警車。睇嚟呢批車正等待交付畀日本警察庁。綜合日本網上嘅消息，下一代日本警車肯定唔少得豐田「Crown Crossover」做主力。
話時話，日本採購警車一般有三大途徑：
- 由國家撥預算買嘅「國費採購」。大家喺日本全國成日見到嘅「220系」豐田「皇冠」警車，就係用呢個方式大量引入。
- 各縣警察署自己出錢買嘅「縣費採購」。好似北海道警大量入貨嘅日產「Skyline（V37）」，仲有東北各縣警用緊嘅Subaru（富士）「Impreza G4」就係咁樣嚟。
- 接受個人或者民間企業捐贈。例如三重縣警喺2025年就收咗一架捐贈嘅第2代本田「NSX」，攞咗去高速公路交通警察隊服役。
呢次畀人見到嘅豐田「Crown Crossover」加埋有成幾十架咁多，規模唔細，所以推測應該係用國費買嘅。2026年1月，日本國家公安委員會代表日本警察庁曾經招標，買咗336架「4WD無線巡邏車」同埋169架「交通取締專用四輪車」等，呢次網民見到嘅車，好大機會就係配合呢個招標交嘅貨。
「會唔會太慢？」性能惹疑慮…點解仲要揀佢？
另一方面，日本有啲車迷睇到啲相之後，亦都有聲音擔心「會唔會唔夠快？」。現行嘅豐田「Crown Crossover」有2款混能（Hybrid）型號，一款係配2.4公升引擎、綜合輸出349匹馬力，另一款係配2.5公升引擎、綜合輸出239匹馬力。
車重方面由1 760公斤去到1 910公斤不等，如果對手係輕量化跑車，警方用呢啲馬力同車重比例嘅車就被日本網民質疑加速力爭啲。
不過，近年日本全國越嚟越普及流動快相機同埋自動超速取締裝置。日本警方就算見到一般超速現行犯都唔會再夾硬去追截，反正事後一樣可以有方法確保罰到人。所以比起絕對嘅極速同埋起步加速，日本警方對警車依家更睇重車輛嘅耐用性、可靠度，仲有可以裝到大量警察裝備嘅車廂空間。
另外，呢次採用豐田「Crown Crossover」絕非突然決定。因為福島縣警同埋愛知縣警其實已經率先試用緊現行版嘅豐田「皇冠」警車。
打頭陣嘅係福島縣警，早喺2024年12月就已經係全球首次引入以「Crown Sedan FCEV（燃料電池車）」警車。跟住愛知縣警喺2025年3月又收到豐田捐贈嘅「Crown Sport PHEV（插電混能車）」警車，到2025年12月亦都引入咗同福島縣警一樣嘅「Crown Sedan FCEV（燃料電池車）」警車。
呢2款夾埋3架16代目豐田「皇冠」喺實際運用中收集到嘅數據，相信豐田同埋日本警察廳都有研究過晒㗎喇！基於呢啲實戰成績，日本警察廳先至會判定現行嘅豐田「皇冠」系列絕對夠做警車。
呢次呢批新車睇個油漆同規格，預計會用喺三個用途：
- 「一般巡邏」
- 「交通取締」
- 「隱形戰車（便衣警車）」
車頂經過特殊加工、白色車身嗰批，極有可能就係2026年1月招標公告入面講嘅「交通取締用四輪車（配升降式警示燈）」嘅「隱形戰車」。
不過講到尾，汽車台從來都唔建議大家自駕遊走去搵警車「挑機」嘅！
Be the first to comment