香港人平時生活喺呢個亞熱帶地區，冬天寒流襲港，凍極都有個限度嘅（正常嚟講）…叫一般香港人去想像喺落雪結冰地區揸車嘅時候有乜嘢感受或者趣聞，可能一時間諗唔起㗎喎！
早幾日汽車台曾經講過，蘇格蘭就有個司機見架車積滿雪都只係隨手喺車頭玻璃撥走少少雪就揸出街，結果被當地警方控告「危險駕駛」。
大西洋另一邊嘅美國，近日亦都遇上嚴寒天氣，氣溫下降到冰點之下。呢啲天氣之下，如果大家見到馬路上面有積雪，咁都好明顯睇到同埋知道有危險啦！
只不過有一個叫做「黑冰（black ice）」嘅情況，就令好多駕駛人士忽略咗路面嘅潛在危險…呢度首先簡單講解吓「黑冰」：
- 「雨淞」嘅俗稱
- 比較乾燥嘅路面上面一層透明嘅薄冰
- 因為直接折射返路面嘅顏色，所以眼望係暗色
- 微雨灑落溫度低於0℃嘅路面就已經有機會出現
因為「黑冰」呢一種現象好難喺離遠嘅地方單憑肉眼發現，當揸車時遇上「黑冰」，到司機自己發現到咁嘅情況，往往已經係成架車揸咗上去冰嘅上面。呢個情況之下，如果無配備適當嘅「雪胎」加上「雪鏈」之類裝置，難免會「跣胎」導致車輛失去控制。
根據「美國廣播公司」嘅報道，2021年2月喺美國田納西州富蘭克林，有1位男子本身想揸架福特F-150輕便客貨兩用車（皮卡/農夫車）出街接自己個女返屋企。
當佢成功褪咗架車出到車路嗰陣，佢就發覺「中伏」！當時傾斜嘅車路上面出現「黑冰」，而佢架車就喺冰面一直唔受控制咁打橫向右跣，總共跣咗大約150碼，臨撞埋其他車先至停低。
事發後好彩人車無恙，不過事主接咗個女之後，為保安全就寧願喺坡底擺低架車，而唔直接揸返上去自己屋企。
諗住買架靚啲嘅SUV揸就唔驚「黑冰」？嗱，可能行車時TCS/ASR之類嘅牽引控制系統可以幫吓手，但頭先都話咗無配備適當嘅「雪胎」加上「雪鏈」之類裝置，難免會「跣胎」導致車輛失去控制囉！大家睇吓呢架林肯 MKT…
停車之後就開始「跣」，司機一直踩實個煞車都無用，所以話人要著啱鞋，車要用啱胎！
至於如果係喺高速公路遇上「黑冰」，可以有幾大鑊？不如又睇吓片：
當地時間2019年11月15號朝早8點，南韓光州-原州高速公路上原州方向近東陽平交匯處附近就因為「黑冰」引致廿幾架車相撞。
以上影片係分別撮自現場1架貨車同埋1架SUV車上嘅行車紀錄儀（車cam），可以清楚見到有1名男子喺路面想提醒後面嚟緊嘅司機，佢自己多次跣腳倒地，而後面嚟緊嘅司機喺見到車禍嗰陣一腳踩落煞車，就會發覺架車喺「黑冰」上面唔受控制咁跣住去。
所以呢~如果大家有機會去到寒帶地區揸車，記得要留意配備適當嘅冰雪防跣胎裝置喇！
Be the first to comment