【傑出司機系列】車身積雪?相信自己!唔怕!

講到蘇格蘭,大家應該都可能會估到冬天係「好凍、大雪」――啱嘅,事實的確係咁。

今次帶大家去蘇格蘭東部嘅泰河地區,當地近日天氣寒冷,普降大雪,屋簷掛冰,喺2021年2月10號氣溫仲一度跌到-11℃。咁嘅天氣之下,登地市道路鋪滿積雪甚至結埋冰,雖然相關部門不斷清理,但有部份道路仍然需要封閉。

(photo credit:Tayside Police Division

當地警方見到處理唔切路面嘅積雪同結冰,一直勸喻居民如非必要都唔好出街,而要出街都要小心處理積雪問題…不過現實係不禁令「身經百戰」嘅前線道路巡邏警員「懷疑人生」:

當地時間2021年2月11號朝早大約10點,泰畔警區嘅道路巡警喺登地市工業邨發現1架車身披著積雪嘅標緻旅行車喺道路上行駛緊,警員立即截停呢架旅行車,發覺旅行車男司機只係隨手撥走旅行車擋風玻璃上面一小撻積雪就揸車,完全無視車身上面――尤其係頭尾擋風玻璃――嘅積雪嚴重影響視野。(;゚д゚)

(photo credit:Tayside Police Division

根據泰畔警區道路巡警一名督察所講,警員真心唔敢相信當時眼前嘅情景,警方雖然認同落完大雪之後要清走車輛上面嘅積雪係幾麻煩,但依然一定要咁做。

佢補充,今次事件入面,司機只係撥走一小撻積雪,視野依舊嚴重收窄,完全置佢自己以及其他道路使用者於險境,無出意外、無人受傷只係「神蹟」。

佢亦重申,司機揸車前有責任確保車輛狀況係安全,而當遇上惡劣天氣,司機亦有責任及早準備――今次事件可以話係當地警方見過最「離譜」嘅事件。

泰畔警區已經將涉案司機落案提出公訴,控以「危險駕駛」,現正排期上庭。

講起上嚟,坦克同裝甲車司機位隻窗都唔係大啫(好似係)σ`∀´)σ

(source:here

不過人哋行公共道路嗰陣會有瞭望員幫吓眼㗎嘛!

1 Trackback / Pingback

  1. 「黑冰」滿路好危險 車輛一路跣跣跣 - 汽車台 HK Car Channel

Leave a Reply

Your email address will not be published.


*