全港首部六人的士即將面世？

香港的士由1926年開始投入服務以嚟，引入過多種唔同型號、燃料、座位規格嘅的士。隨着市場競爭及網約車服務廣為香港市民採用，的士業界無論喺服務態度，以至車型嘅舒適度上都需要有所提升，先至可以抵得住時代嘅進步。

現時市面上採用較新型嘅豐田金豐（Comfort），以及俗稱「小露寶」嘅 Comfort Hybrid /JPN Taxi 混能的士，都以四座位為主。如乘客人數超出四個，就未能做到「一車載晒」嘅情況。反觀可以合法載客取酬嘅租車公司，所提供嘅私家車款式大多數為可以乘坐六至七人嘅豪華MPV，喺乘客數目上與及車廂空間，都遠勝於市場上一般嘅的士車型。

就網約車平台與的士業界之間嘅競爭，政府早前曾經推出計劃，有意將的士乘客數目由最多五名乘客，增加至最多七名乘客，以增加的士喺公共交通運輸層面上面嘅競爭力。而隨着電動車發展趨向成熟，電池及驅動組件所佔用空間亦逐步減少，令電動車車廂有更多空間，可以更舒適地擺放更多座椅。因此，繼比亞迪新舊兩款 e6 後，上汽大通MAXUS MiFa 9 亦有意成為香港第三款純電力驅動嘅電動的士。

根據「騰駿的士管理公司」Facebook page 嘅相片，一部掛有試車牌的上汽大通MAXUS MiFa 9 已被噴上市區的士嘅上銀下紅標準色彩，並已安裝車頂的士燈，且貼上「TAXI 6 SEATS」表示六座位的士嘅綠色半圓形標貼。換言之，假若此車順利通過運輸署車型檢定並且成功出牌，就可能成為香港史上首部六座位的士。

MAXUS MiFa 9 的士同私家車版一樣，採用2+2+3佈局，全車不司機一共可以接載六人。如果有四名乘客上車，就可以中排及後排各坐兩人，無需一如現有四座的士般，後排擠上三人。不過根據Facebook page上的留言，有指MAXUS MiFa 9 嘅車尾行李倉空間，比現時四座位「小露寶」更細。當司機隨身物品以及清潔用品後，未知再運行李空間如何。但有留言者笑言，唔好一如現有車型，喺關閉行李倉車門嘅時候，頂爆塊玻璃就得！