九巴：開放巴士廠畀公眾為電動車充電

九巴喺2026年3月2號嘅農曆新年傳媒聚會上宣布，九巴計劃2026年開放九龍灣、沙田、屯門、荔枝角4個主要車廠，畀公眾喺日頭為電動車充電，屆時提供超過150個快速充電樁。

其中荔枝角車廠已經喺2026年2月開始試行開放畀公眾充電，充電費用約為每千瓦時港幣兩個六，但價格詳情稍後先至公佈。

因為車務運作上，巴士會喺清晨出街接客，去到20時之後開始陸續返廠，所以九巴只會喺日頭開放巴士廠畀公眾充電，無法提供夜間充電服務。

開放畀公眾充電嘅巴士廠選址靠近商業區以及工業區，九巴表示係旨在方便上班一族或者係司機喺午休時間快速充電。

九巴會逐步將快速充電計劃擴展到青衣以及將軍澳車廠，以示支持香港政府喺2035年前全港設立約10 000個快速充電樁嘅目標。

九巴表示，九龍灣巴士廠目前已經為的士車隊提供充電服務，並且計劃將電動私家車同埋其他電動商用車都納入可供充電。