電動私家車「一換一」首次登記稅寬減「落閘」 車行推出「購車特別專線」助車主「衝刺」

香港財政司司長陳茂波喺2026年2月25號發表《2026/27財政預算案》演辭，其中喺第207段公佈，電動商用車、電動電單車、電動機動三輪車嘅首次登記稅繼續獲全數豁免到2028年3月底，而考慮到現時電動私家車技術成熟、供應充足、車款選擇增加、價格逐漸下調，電動私家車已具備市場競爭力，電動私家車嘅首次登記稅寬減安排會喺2026年3月底屆滿後唔再繼續落去。

呢段演辭意味着香港政府寬減電動私家車提供「一換一」首次登記稅嘅方案會喺2026年3月31號後正式結束，凡喺2026年4月1號或以後提交首次登記申請嘅電動私家車就唔會享有稅務寬減。

換句話講就係舉凡能夠喺2026年3月31號或之前向香港運輸署遞交文件完成車輛登記手續嘅合資格車主，仍然可以享有稅務優惠。對於有意把握最後機會嘅市民嚟講，車輛能唔能夠喺2026年3月31號或之前成功向香港運輸署遞交文件完成登記，又或者話車行係咪準備好「現貨」庫存以及能唔能夠高效率處理「出牌」流程，就會係有無得攞稅務優惠嘅關鍵因素。

其中，比亞迪（BYD）宣佈因應市場需求以及政策最後限期，特別為香港市場預留充足嘅BYD以及DENZA相關車型現貨，並且會特別設新「綠色出行購車特別專線」，以最快嘅售前服務協助市民趕及2026年3月31號呢個期限。

比亞迪表示，就喺2026年2月25號香港財政司司長陳茂波喺發表《2026/27財政預算案》演辭嘅同一日，錄得單日接到超過800架電動車訂單，反映香港市民對購買電動私家車嘅迫切需求；而喺當前稅務優惠準備「落閘」嘅關鍵時刻，比亞迪希望盡力協助、確保每位準車主能夠真正趕得切享有稅務優惠。

比亞迪表示旗下專業銷售團隊會透過「綠色出行購車特別專線」提供一對一專人諮詢、極速現貨配對、特快合約跟進等服務。比亞迪強調，面對呢段高峰期，由「落訂」前嘅諮詢環節起都會致力提供積極、貼心、高效嘅服務，確保顧客能夠流暢咁鎖定心水座駕，並且趕及喺限期前完成所有登記程序。

比亞迪聲言，過去一年勇奪全香港電動車銷量冠軍，標誌着香港消費者對中國生產嘅「新能源車」有信心。比亞迪深信，無論政策環境點樣變化，產品要靠本身嘅實力以及超物有所值去贏得消費者信賴。

比亞迪除咗繼續引入專為香港路況度身訂造嘅車型之外，集團正積極籌備將代表技術巔峰嘅高端嘜頭「仰望」引入香港，畀市民親身感受頂級科技以及非凡駕馭魅力。