2025年3月，北愛爾蘭倫敦德里郡卡斯爾道森（Castledawson）年僅11歲嘅卡特琳-羅斯·麥穆蘭（Caitlin-Rose McMullan）被車撞死——當時卡特琳只係啱啱由校巴落地，離屋企只係幾米之遙。
卡特琳嘅媽媽史黛拉·麥金（Stella McGinn）表示，由於校巴安全方面有缺陷，令「太多家庭已經承受難以承受嘅痛苦」——因為英國依家無任何法律規定其他車輛喺校巴畀學童上落嗰陣必須停車。
史黛拉話，卡特琳當時「毫無防備，由校巴走落地，根本睇唔到有車嚟緊」。
史黛拉難掩悲痛：「簡直係一場噩夢，你永遠唔會諗到呢種事會發生喺自己屋企人身上，車禍就發生喺我哋屋企出面，我每日都會行過嗰度，（依家）嗰度擺放咗悼念卡特琳嘅嘢，我每日都會走過去同佢傾下計。時至今日，我個女死咗都1年，但係修改法律方面仍然無任何實質進展。究竟仲要有幾多小朋友喺返學放學嘅路上面死傷，法律先至會有所改變？」
北愛爾蘭基礎設施部長莉茲 金明斯（Liz Kimmins）先前宣布計劃提出立法，禁止其他車輛超越停低上落客嘅校巴。莉茲表示佢會喺「未來幾星期」就校巴安全問題發布更多公告。
金明斯表示：「作為一名家長，我時刻都思考呢個問題。我知道公眾會問點解進展咁慢，但我哋有責任妥善解決校巴安全問題，我哋已經成立咗1個專門團隊負責研究相關立法。」
死者家長：「生活再也不復從前」
史黛拉表示佢仍然清晰記得聽到自己個女被車撞死嗰陣嘅情景，成件事就好似喺噚日發生：「佢（卡特琳）活潑開朗，熱愛生活，前途一片光明，有美好夢想同埋計劃，正處於人生起步階段，就喺佢開始綻放光彩嗰陣，就被無情奪走生命。我仍然期待佢放學返屋企——但生活再也不復從前。」
早喺20幾年前，北愛爾蘭就有人呼籲制定新法律改善校巴安全，自從卡特琳被撞死之後，呢種呼聲更加強烈。北愛爾蘭基礎設施部表示，佢哋正在參考國際經驗，為北愛爾蘭制定相關立法。
現時喺美國以及加拿大，部分地區已經立法明令禁止超越停低上落學童嘅校巴，除咗警方獲授權檢控違法司機外，其他安全措施包括校巴左側安裝有可伸縮「停車」標誌以及燈號，當校巴停低畀學生上落車就會閃爍黃、紅兩色燈光。
史黛拉對當地記者表示：「我只係唔希望其他家庭經歷我所遭受嘅痛苦，但好可悲…我知道咁樣嘅事仲係會再次發生，就係呢樣嘢，我哋需要修改法律，令到細路上落校巴嗰陣更加安全，我唔明白點解進展咁慢。」
醫生：「我見得太多咁嘅事」
達米安 蓋茨醫生（Dr Damien Gates）係北愛爾蘭貝爾法斯特皇家兒童醫院嘅顧問醫生，卡特琳車禍後被送到醫院嗰陣，蓋茨醫生就係當緊更：「當我接到電話，聽到有1個細路落校巴嗰陣被車撞傷，我當時就諗——『又嚟？』——因為我同我嘅同事已經見得太多咁嘅事。卡特琳傷勢非常嚴重，我哋無能為力，我感到無比悲痛，但好不幸——我哋工作嘅現實就係咁。」
北愛爾蘭嘅校巴主要由北愛爾蘭教育局營運，此外Translink會營運特定學校嘅校巴服務，另外有部分校巴可能係由私人營運商簽訂合約提供服務。
北愛爾蘭教育局表示，佢哋無任何關於學童喺上落校巴期間遇上車禍嘅數據。
Translink表示，佢哋喺2020~2025年提供嘅所有校巴服務中，共有13人喺落車後隨即被車輛撞擊而受傷，有1人因而死亡。
教育局：「我哋無權立法但會盡力做啲嘢」
北愛爾蘭警務處證實，自2020年以嚟嘅學年期間，北愛爾蘭有近700名4~18歲嘅兒童以及青少年因為道路意外死亡或者重傷。
北愛爾蘭貝爾法斯特皇家兒童醫院就喺過去15年嘅數據發現，平均每年有1名兒童喺落校巴嗰陣被車輛撞擊，隨後被送入加護病房。但係蓋茨醫生表示，呢啲數字並無反映「全貌」，因為單係肢體骨折嘅病例通常只會留喺普通病房處理，而車禍現場死亡嘅兒童亦無包括喺入面。蓋茨醫生補充：「過去6個月又有2名兒童因為落校巴嗰陣被車輛撞擊而重傷入院。」
北愛爾蘭教育局表示，佢哋對卡特琳嘅家人深表同情。雖然北愛爾蘭教育局無權為道路安全立法，但佢哋已經圍繞校巴安全問題實施一啲措施。北愛爾蘭教育局發言人話：「我哋嘅校巴配備多項安全裝置，包括當學童上落車嗰陣會閃爍嘅燈號同埋標誌。我哋亦增加喺社交媒體上積極宣傳、分享重要嘅校巴安全訊息。我哋最近仲製作咗1條向小學生推廣道路安全嘅影片，已經分發畀各學校教育細路注意安全。」
Be the first to comment