運送英女皇靈車車牌，美麗誤會的巧合

「事頭婆」英女皇伊利沙伯二世於英國時間9月8日駕崩於蘇格蘭鴨巴甸郡的巴摩盧城堡 (Balmoral Castle)，英國全國哀悼十日，皇室亦忙於辦理其後事，當中包括安排將「事頭婆」靈柩由鴨巴甸巡迴聯合王國國土至倫敦白金漢宮嘅旅程。

由各新聞影片、網民或當地朋友拍得相片所見，運載女皇靈柩靈車嘅車牌係WP4597，唔少人發現同平時於英國街頭見到嘅車牌格式有明顯分別，而又有港人 (不論在香港還是在英國) 覺得份外親切，因為格式與現時香港的完全相同，彷彿格外醒目，也引起議論這個車牌。

我哋夥同較熟悉英國車輛牌照嘅朋友一同研究，發現呢個疑似香港車牌，有可能係透過英國嘅駕駛及汽車牌照局 (Driver & Vehicle Licensing Agency 簡稱DVLA) 嘅「個人化車輛牌照」(Personalised Registration) 計劃申請。

事關呢個計劃容許參照舊日車輛牌照格式提出申請，然後等候待拍賣。而負責「事頭婆」”Last Great Journey” 嘅 Binz E220 Bluetec 嘅車牌，正是1903年至大約1936年期間發出嘅車牌格式。

當時的車牌格式就是由一個/兩個字母加上1-9999嘅數字組合而成，字母代表車輛註冊地。翻查資料，WP 字頭代表由英格蘭禾斯特郡（Worcestershire） 當地的牌照部門發出，保守估計發出 “4597” 呢個數字嘅年份可能與女皇出生的1926年（96年前）接近甚至相同。

雖然查到靈車於2016年出牌，但還有一個可能性係「牌主」由 192X年開始持有至今，因為英國嘅車牌號碼係可以持續地向當局申請保留。至於真相如何，年月時間自會證明，呢個時空，無嘢比「事頭婆」光榮的最後旅程更重要。

又縱使呢個車牌對香港人而言可能係一個美麗的誤會，但世事往往總有凡人難以參透的巧合。