香港「雪糕車」創辦人之一何敬源先生逝世：淺談香港「雪糕車」

2025年2月11號，香港報章上刊登咗1篇《訃告》，由署名「長甥譚耀榮醫生偕何氏眾親」發出，指「香港富豪雪糕」創辦人之一、「香港富豪雪糕」前董事總經理何敬源先生2025年1月23號喺西澳洲珀斯由家人陪伴下以98歲高齡離世，並且已經喺2025年2月8號葬喺珀斯嘅墓園。

《訃告》當中提及何敬源先生係屋企大仔，喪父後輟學身兼父職照顧全家人，並且打幾份工作為家庭支柱，及至細佬細妹投身社會先至再次求學，幸得佳績。其後何敬源先生入職牛奶公司並且喺英皇御准香港賽馬會兼職，再加入皇家香港輔助警察隊，官至督察，直至從商。

香港「雪糕車」簡史

講到香港嘅「雪糕車」，何敬源先生正正就係始創嘅靈魂人物，事緣1960年代末，何敬源先生同以下呢2位朋友一齊去英國旅行…

• Ted Drew（牛奶公司同事）
• 唐學元（輔警同事，香港米商「聚大行」第2代當家，2015年逝世）

佢哋3人喺英國第1次見識到「雪糕車」呢樣嘢，認為引入到香港定有一番作為，於是成立「富豪雪糕」，搵到1956年喺美國費城由Conway兄弟創立嘅「雪糕車」嘜頭「Mister Softee」，1970年攞到「Mister Softee」喺香港嘅特許經營權，隨即喺火炭設廠，並且成功向當時嘅香港市政局申請到16個「流動小販（流動車）牌照」，佢哋即刻由英國訂造「雪糕車」。

當年每杯軟雪糕售價只係港幣5毫子，反觀每架「雪糕車」成本高達20萬港元，未嘗唔係一個大膽嘅投資。然而，1978年香港政府以處理環境衛生、噪音滋擾、阻塞公眾通道等理由修訂小販政策，拒絕再發出「流動小販牌照」，令到「富豪雪糕」成為香港唯一領有「流動小販（流動車）牌照」合法經營「雪糕車」嘅商戶。

1990年代，當時香港市政局曾經考慮過「一刀切」咁取締香港嘅「流動小販牌照」，好彩（？）仲未能夠推出呢個政策嚟執行嘅時候，董建華任內政府決定「殺局」，1999年12月31號廢除香港市政局，避免咗「雪糕車」成為香港人嘅「集體回憶」。

2010年初，美國公司收回香港嘅特許經營權，「富豪雪糕」嘅「雪糕車」車身頂部嘅招牌位一度需要由「富豪雪糕Mister Softee」改為「雪糕車Mobile Softee」，直至2016年先至回復原本嘜頭。

時移世易，「富豪雪糕」如今只係持有14個有效嘅「流動小販（流動車）牌照」，只要天氣許可就每日都會去到香港多個地點一路播住「洗晒香港人腦」嘅《藍色多瑙河》一路賣雪糕。

香港街頭嘅「雪糕車」

香港「富豪雪糕」旗下嘅「雪糕車」車身中間以白色為主，配上藍色車頂以及紅色車頭同下擺，車身寫上咗經典嘅「富豪雪糕每日新鮮為你製造」標語。車廂入面依照政府相關規例，必須安裝1架軟雪糕機、1個洗手盤、2個雪櫃。

由於每架「雪糕車」只有1架軟雪糕機，因此每架「雪糕車」只會售賣1種口味嘅軟雪糕，通常是較大眾化的牛奶口味，但亦會因應節日或者租車商戶要求而轉用其他口味（曾經出過士多啤梨、蜜瓜、朱古力等口味）。至於2個雪櫃就令香港嘅「雪糕車」另外可以售賣果仁甜筒、蓮花杯、珍寶橙冰。

至於香港「富豪雪糕」旗下嘅「雪糕車」揀播放《藍色多瑙河》就有都市傳說話當年喺「雪糕車」廠商提供嘅芸芸音樂入面，創辦人只係認得出《藍色多瑙河》嘅旋率云云。

香港「富豪雪糕」旗下嘅「雪糕車」喺用車方面起初都係用返英國産品，直至近年轉用中国同南韓牌子嘅車輛：

百福Bedford CF

福特全順Ford Transit

上汽大通MAXUS G10

起亞Kia K2500

「雪糕車」除咗賣雪糕…有時會免費派雪糕，仲做埋商場裝飾

2017年12月10號深水埗警署開放日

2023年初領展街市宣傳活動

2024年10月31號中環碼頭「哈囉威香港」

結語：加返多幾架「雪糕車」？

香港政府曾經喺2008年咨詢立法會食物安全及環境衞生事務委員會、區議會、小販團體、相關持份者，2009年以當時政府收到唔少意見認為「雪糕車」體積較為龐大，營業時必須保持引擎運轉，認為當局應審慎考慮簽發新嘅「流動小販（流動車）牌照」，當時公眾尤其關注「雪糕車」擺賣嗰陣係違例泊車同污染空氣，令簽發新嘅「流動小販（流動車）牌照」未獲公眾普遍支持，當局決定維持既有安排，直至日後科技發展可以解決長期開動引擎嘅問題，當局可能重新討論簽發「流動小販（流動車）牌照」畀新嘅「雪糕車」。

當何敬源先生嘅《訃告》入面講到「為多代香港人帶嚟彌足珍貴嘅香甜回憶，更成今日香港知名標籤品牌，街知巷聞」，究竟香港嘅「雪糕車」會唔會維持到落去？或許值得大家一齊諗諗。