塔利班:豐田話唔賣車畀我哋? 我哋依家都大把車用啦!

早前阿 Uncle Lim 講過,豐田車廠指令全球代理由明(2022)年起喺銷售 HILUX 同埋 LAND CRUISER 嘅過程要求買家簽署一份保證書,承諾一年內唔會轉售車輛並且期滿後都唔會轉售畀塔利班,或明知可能與塔利班有聯繫嘅買家。

阿Lim 叔叔你以為難得到塔利班咩?中佬,你仲算年輕!

早前美軍連同盟友嘅緊急撤離行動,雖然喺人道立場成功解救咗一班唔想臣服於塔利班嘅阿富汗人,但係喺救人優先嘅情況下,大量嘅輜重就只能夠留低喺阿富汗,任由塔利班接收。

雖然美國國防部有話過呢啲留低嘅裝備已經被破壞而用唔到,而塔利班都有「邀請」記者去睇吓「啲外國佬破壞晒阿富汗嘅國家財產」,但其實當時嘅破壞做得都唔係好徹底,塔利班尚算係執到唔少寶。

根據美國政府問責署嘅公開資料,單係裝甲車都接近1000架,仲有8000架軍用大貨車、超過22000架「悍馬」,更重要嘅係:

42000架輕便客貨兩用車(皮卡/農夫車)同運動型多用途車(吉普)

呢批輕便客貨兩用車(皮卡/農夫車)同運動型多用途車(吉普)主要係畀阿富汗政府作日常公務運作之用,有部份就係轉交支援重建阿富汗嘅國際組織。呢啲車好多都係由美國政府統籌、用美國納稅人嘅錢購買,咁當然當時需要優先考慮用返美國公司旗下嘅產品,而受青睞嘅係:

Ford Ranger

福特呢單大生意就唔係美國本土直送阿富汗,而係由泰國嘅分廠負責,2011年嘅時候美聯社就報道過…

當年嘅影片可以見到呢啲輕便客貨兩用車(皮卡/農夫車)係交付畀阿富汗警察使用,但10年後嘅今日應該都已經轉手畀咗塔利班,可能發展緊新嘅「科技樹」——或者塔利班會發覺原來「除了豐田以外還是有別的好車」!

(網絡圖片)

1 Trackback / Pingback

  1. 九巴 WeLab Bank 重演1975年4月30日歷史? - 巴士台 HK Bus Channel

Leave a Reply

Your email address will not be published.


*