日產的士回歸香港？

今時今日，的士用車同小巴一樣都係「慣性收視」，全港18300部 (市區、新界、大嶼山總計)的士，豐田佔逾18000部。撇開「霸權」响政治同業界自作自受嘅問題，在乘客、消費者嘅角度，亦未必係好事，就是兩隻大喼都「尾冚閂唔埋」……..

雖然豐田因為東京奧運推出 JPN Taxi，但所謂「無競爭無進步」，香港確實需要有新牌子的士。近日，網上流傳日產疑似在香港推出新款的士嘅相片，彷彿帶來「新希望」

簡介呢部 Nissan Note e-Power 之前，先同大家講解一吓 日產 响香港的士嘅歷史。

日產曾吒叱香港的士逾四份一個世紀係不爭嘅事實。Cedric 車系 由1971年仍然使用 Datsun 品牌開始，230代目、330 代目 、到1979年 430 代目 系，陸續取代平治等歐洲品牌成為的士主流用車，之後的 Y30系及Y31系，亦可謂紅極一時，或至少同豐田 Crown 平分秋色。

直到97後政府推出「石油氣的士計劃」，先至逐漸被黯然失色。無錯，日產僅以 Y31 系少修少補式改良 facelift 延續至2015年有點不思長進，但你班的士佬「拜豐田教」，對住「實力」(的士業對 Cedric 車系嘅慣稱) 一味嫌三嫌四，跟住又係「唔好揸、好易壞、無零件、好難整….」啷啷上口周街大大聲四圍唱，你係 Nissan 仲有心機做你生意呀?!

呢段歷史，多少可以認為日產應該係理論上最夠實力嘅牌子。

呢部 Nissan Note e-Power「的士」，規格上應該同合誠現正發售嘅相同，HR12DE 引擎作為發電機，搭載鋰離子電池，配EM47 交流電摩打，最大馬力116PS，最高扭力28.6kgm。廠方宣稱耗油量27.8km/L，折算目前電油零售價約$19.8/L，每公里燃料成本約 $0.7 (「車隊卡」折扣減 $3/L 計則為 $0.6/km)

咁啱得咁蹺編輯部中人有朋友上月買入一部 Note e-Power，「打爆缸」約25升，市區路段行駛到約900km，若大部份為高速公路的話，則只有約600km。「拉上補下」計算即約720-750km，同廠方宣稱嘅接近。

不過咁，「舊款」Comfort 嘅燃料成本約 $0.6-0.85/km (專用氣站計、下同)，JPN Taxi 約$0.45-0.5/km，數字上 Nissan Note e-Power 吸引力係有嘅，但的士佬下下都「地板油」「重腳迫力」，搞到連 Prius 都大食過「金豐」近倍， Nissan Note e-Power「的士」 實際耗油表現就有待「證實」。

而從乘客角度去睇， Nissan Note e-Power「的士」 軸距只得2580mm 嘅乘坐空間，與及車尾箱應該擺唔落29吋行李喼，也許只比當年「生利的士」(Sunny B12代目) 稍好一點。但宏觀角度，都真係值得期待嘅一款新的士。

後記：我哋出POST / 出稿數量少，其中一個原因係唔想「偷圖」。但正所謂「中中直直終須乞食」，見住行家們「擺明出茅招發大達」，亦只好不再扮晒正人君子。