UBER 香港七宗罪之「第六宗罪」愛回家唔止回唔到家 跣司機勁過謝拉特世紀一跣

第三、四、五宗罪清楚展示 Uber 香港如何有如將司機五花大綁，再質佢「摘西」(唔係挑逗老婆扑嘢，係台語嘅「食屎」)；而第六宗罪，雖然唔係迫司機「摘西」，但司機一樣唔好受，因為 Uber 俾個希望你，然後再跣鳩你。

講緊嘅係司機圈子稱為「愛回家」，官方稱做「目的地功能」嘅垃圾過西嘅功能。根據 Uber 官方宣稱嘅用途目的係「App會為你配對同路乘客，方便你沿途接載。」

何謂「順路」？Probably 例如司機响尖沙咀 Set 「愛回家」去屯門，會知道未必好彩可以一程過返到屯門，都應該好似見到嘅畫面咁，會去深水埗、美孚、荃灣、青衣；亦可能唔止得一程，可能先到深水埗，跟住再接一單去荃灣或者青衣、深井咁上下啦。

但實情會係點樣？響機喇，畫面顯示仲有「前往你的目的地」嘅字句，但個客上車「拉機」後見到嘅地點係…..

粉嶺

係咪想爆粗
DLLM 一個東一個西
玩嘢呀?!

跟住，我哋拎返第五宗罪嘅「接單率」同「取消率」出嚟問返屌完 Uber 老母嘅呢位司機「咁你做唔柒做吖」「唔駛開飯呀，唔駛交租供樓養細路呀?」

去到粉嶺落客之後，發完脾氣諗住疊埋心水吉車返屯門罷就。點知又好好彩響機喎，仲要响附近添。點知一上客睇目的地：

旺角倫敦大酒樓

唔好以為老作，真實個案嚟㗎！

塞完窩打老道同花墟嗰段太子道西，轉出彌敦道之後，突然畫面彈出「目的地逾時」。之前用咗一次「搏機場」，即係話落咗客之後真係要吉車返屯門喇。

除此之外，仲有好多單報料，當中有一堆係响觀塘、九龍灣開「愛回家」set 屯門或者元朗，或是去東涌 (想搏機場)，點知獲派嘅單係要過海去中上環。唔止要DLLM，仲因為等唔到單要吉車返去的話，唔止輸油錢仲要輸隧道費，係要 DKLMCH 仆街 Uber 杏加橙去死啦！

司機開「愛回家」，希望嘅就好似 2014年4月26日時嘅利物浦有機會捧盃咁，但單係以上嘅例子，司機就如一日後响晏菲路球場嘅謝拉特咁「世紀一跣」。或者話响粉嶺、旺角、中環嘅司機，俾 Uber 跣到「謝過謝老四」，但無辦法屌鳩返 Uber 你。

其實收到仲有大把例子，例如東涌 Set 去長沙灣，點知去咗中環；或者屯門 Set 沙田，結果派咗去何文田……要寫晒，真係懶係好文彩嘅「罄竹難書」。

將為數唔少嘅案例進行研究，似乎官稱「目的地功能」唔係一如司機見到嘅畫面所示嘅「預計路線」咁，而極度之有可能一如以下呢張模擬 coding 圖

即係點？直接講，Uber 嘅運算 >99.9999999999% 只係做「mileage deduction」。用返以上嘅例子還原返啲算式，應該會清楚晒：

尖沙咀 → 屯門 (D1)：33km，粉嶺 → 屯門 (D2)：31km 。派得
粉嶺落咗客之後，原本嘅D2 變咗做D1，然後 旺角 → 屯門 (D2)：30km。派得

又計吓觀塘嘅 Cases 嘅情況：
觀塘 → 屯門 (D1)：38km，中環 → 屯門 (D2)：36km

去到中環，無單要吉車返屯門，要自己哽隧道費嘅問題，Uber 四個大字「關我閪事」呀。甚至可能更加串啲「我嘅運算無呢樣嘢嘅喎，你咪响觀塘熄機囉。家陣俾多差唔多一舊水你袋，夠俾西隧六兜嘢啦，仲嘈乜呀?!」然後，司機又係嗰句「要搵食，有撚計咩」

收集到嘅一堆例子當中，有一個保證必定嚇撚鳩死你：

司機响科學館道康宏廣場開「愛回家」屯門
D1 = 32.2km
「響機」上客之後，落客地點係 i-Square
D2= 32.1km

（仲要上客地點可說是「第三宗罪」嘅遠距離 pickup 嘅公爵街)

如果話「目的地功能」根本就係呃鳩人，其實唔過份。不過，相對返司機開咗「愛回家」見到嘅畫面入面嘅「路線圖」同以上及一堆無位寫出嚟嘅例子，加諸於 Uber 從來無公開過「目的地功能」嘅運作原理 (唔係 source code)，但就講到明「順路」「同路乘客」 (英文版更是 same direction、align with planned route)，話係欺詐 (Fraud) 都未必過份。

或者講一個好似無關係嘅例子。好多年前，某快餐集團因為餐牌寫「公仔麵」，但實際用嘅唔係永南食品廠嘅供貨 (Even 所謂「餐廳專用」版本)，結果就被判敗訴，要賠返嗰個餐嘅幾十蚊再加幾百蚊堂費俾原訴人。因此，Uber 唔好諗住「咪短咗0.1km 囉，都係叫近咗」抗辯，因為前段所示司機畫面嘅「導航路線」連同 屯門 vs 粉嶺 vs 旺角嘅地理位置及實際行車路線，都相當有可能起碼一如「公仔麵」單案咁，衰咗「商品說明條例」。順帶提醒 Uber 唔好諗住拎 Disclaimer 出嚟以為食咗無敵星星，同埋回想返吓响美國、歐盟衰咗同輸咗嘅錢吧。如果咁諗，即係可以話證明睇住香港人嘅特質「恰得就恰」。

另外仲有一個情況，就係有時連開都唔俾你開，又唔解釋。

乜叉嘢叫做「太多司機使用」？有無條數交出嚟吖？單係呢個情況，已經涉嫌違反歐盟 GDPR 第15條，以至第22條嘅規定。再直接啲講，Uber 响歐洲必須向司機清楚交代當地叫做 Destination Filter 嘅 Criteria，唔係 source code，係講解處理邏輯。就如「太多司機」，必須講係幾大範圍內嘅車設定咗 Destination Filter 嘅比例為之「太多」，唔可以求其彈個咁嘅畫面出嚟打發咗司機就算。但 Uber 可能諗住山高皇帝遠加諸香港嘅司機只顧搵食、唔好搞咁多嘢、唔夠咁大公司鬥嘅奴性，加諸於第五宗罪嘅金鋼箍，就玩足12年囉。

而由第一宗罪嚟到第六宗罪，可以話清楚見到 Uber 嘅仆街程度超乎大家嘅想像。撇除山高皇帝遠加諸香港人嘅奴性嘅問題，純粹講 Operations角度，第一宗罪嚟到第六宗罪可源於同一個禍根。所害嘅唔止係司機，連乘客都係苦主。即係乜？留意第七宗罪，全面詳盡拆解。

警告：嚴禁政治上腦「幫滴滴、高德，或者任何中資平台抬轎」，或者認為收咗周國強、伍海山、鄭敏怡……嘅錢。本網站所有主理人員自出娘胎以來未有從事過的士行業