Prius 第4代「行貨」終於捨得返貨

士別咗香港兩年嘅「行貨」Prius,終於「強勢」回歸。作為一個揸緊「水貨」Prius 第4代嘅車主,都會想睇下「行貨」同「水貨」嘅分別有幾大,不過我睇完架車之後,有種「我褲都除埋,你比啲咁嘅嘢我睇」嘅感覺。

首先講下我對四代 Prius嘅用後感先啦。我會俾一個幾高嘅評價呢架車嘅,首先吸引到我嘅係佢個樣,不過身邊朋友對 Prius 四代外形嘅反應好兩極,一係就好鍾意,一係就覺得好核突,無乜中間位嘅。

但喺我心目中,佢係比起上一兩代Prius 個線條骨位,燈嘅設計型咗好多嘅,買原裝車嘅,唔駛搞好多嘢,只係落套包圍換套鈴,就已經成個look惡多一倍。

第二樣嘢就係非常實用嘅一架車。今時今日香港嘅油價高企,而呢架車城市正常咁揸,好輕鬆就可以做到17-19km/L 耗油量;行得多高速的話,20-22km/L 都可以做到,淨係呢樣嘢都已經值回票價!

第三樣嘢係個車籠嘅空間感係非常不俗,坐幾個高大啲嘅朋友都唔會頂頭頂腳,Even 判官咁高加埋 Uncle Lim 咁「健碩」同「疑似驗車官」Ian 咁龐大都唔迫夾。行李箱放三隻大喼都仲有位剩,若果都係唔夠裝的話,例如單車咁,將後排座椅「瞓低」就輕鬆搞掂。所以唔好當呢架係私家車,你當佢一架工具車的話,其實真心係無得輸嘅。

第四樣嘢係性能同設備方面,唔好睇佢引擎加摩打夾埋得果一百匹多啲,起圍同啲彎嘅反應都唔差㗎,入「深淺赤石」你都可以放膽啲去攻下彎,而佢都會比到信心你咁做。安全設備方面亦都好足夠,Auto brake, Lane keep assist, Adaptive Cruise control, Auto high beam等等都令到駕駛變得更加安全同舒適。

正正因為以上嘅原因,Prius 四代「水貨」市場都算係入幾多就賣幾多咁滯,一部企理 Full option 低咪數嘅 Prius 四代,講緊都係廿萬唔駛,都吸引到唔少人嘅垂青。至於今次代理「打鑼打鼓」引入嘅「行貨」,雖然有皮籠、parking sensor、JBL音響等等,但實情只係「齋版」。但係$320000又無包圍,莫講連張暖櫈同皮呔環都無,仲要用好多人誤會係鐡皮呤嘅15吋呤,我就真係睬你都有味。

個樣係肉酸啲,但唔好誤會係鐵皮呤!

更是 Uncle Lim 雖然已經兩年無「躝返新加坡」,但佢啲朋友兼我哋嘅「新加坡特派員」傳來當地的士相片一比,真係大嗌一聲………………..

Photo by: Carl Chung @Singapore Correspondence
Photo by: Carl Chung @Singapore Correspondence
Photo by: Oscar Ong @Singapore Correspondence
Photo by: Carl Chung @Singapore Correspondence

我接受唔到囉

講真嗰句,如果我係賣水貨車嘅話真係要同皇冠車行講句「多謝晒」── 咁樣嘅規格咁樣嘅訂價,仲唔加價就笨咯。只要唔係獅子開大口,生意一定唔駛愁。

後記:點解有「新加坡特派員」,當然就係神通廣大啦(好似),HK Bus Channel 之前一集節目都係多得佢哋仗義襄助先至咁好睇㗎。

Click 張圖睇捧吓場

Be the first to comment

Leave a Reply

Your email address will not be published.


*