的士佬咁愛国點解唔聽董伯伯話呢?

的士業一場「罷駛」鬧劇暫時告一段落，嗰堆 (疑似) 發起人被笑到面黃就梗㗎喇。一來笑佢哋不知天高地厚，二來當笑佢哋「好心檢討吓先啦，鬧乜嘢『白牌車』吖」不知廉恥，無視市民到底有幾唔滿意的士，更唔接受市民對的士嘅批評。

不過又好老實講，so called 白牌車 (即係 Uber 啦) 一樣唔少敗類，其中一樣相信唔少人試過架車明明就到，點知兜咗去第二度搏你cancel。仲有唔少於我呢個廿幾年牌 (仲要係大車牌) 嘅人嚟講會係想大叫一句「交返個牌出嚟」嘅唔識路靠GPS嘅司機，我甚至試過教佢點行竟然爆粗趕我落車。

但點解我還是傾向 Uber，not just only 除了豐田 (Prius) 之外仲有其他車款揀，起碼一來叫做有預算，唔駛周街截同人爭，截到都可能遠嘅唔去近嘅唔去唔L7知個的士佬邊度先至去，二來好好醜醜個司機有乜唔妥都仲叫做有得投訴起碼攞得返嗰程車嘅車錢，的士佬就算1823、薯仔文去TCU (交通投訴組) 又點唧？車主/車行一句「搵唔返個租車記錄」，你咬佢食呀?!

由 Uber 到「滴滴」「高德」，唔計「黨的死命令」嘅政治問題，絕對係一個歷史遺留落嚟嘅問題，十年過外官場無人處理，的士佬只顧自己無認真處理，一般做乘客嘅市民有車搭就理L得你。但循自由經濟角度去睇，的士佬真係自己攞嚟，除咗車主炒牌、司機冚旗揀客兜路劏客錶板10部電話做派更之外，最根源就係無跟隨第一任特首董建華金句之一嘅「與時並進」。

唔好話Uber 出現有靚車揀，淨係豐田金豐個尾箱擺兩隻喼個冚都閂唔埋，的士業界乜嘢反應呀？

有無諗過換大啲部車？無囉。好喇，去機場 Call 貨 Van，又 diu「非法載客取酬」迫機管局規定貨Van 唔可以駛上去客運大樓7樓。DLLM 件行李跌落北大嶼山快速公路嘅時候，的士佬咪只會一句 Sor9ly 囉。

無錯，有7人 Van 可以租，其中一間嘅經營者仲同本台算係老友，但有得幾多部吖？唔計力水差到屯門公路上大欖斜只係比起我响巴士台 Test drive 過嘅 Hino RK8 快啲啲嘅日產NV200，堅係夠裝三個大喼嘅Ford Transit Connect 全個行業乜嘢反應吖？揸嘅嫌氣錢貴，車主嫌收少咗租囉。

我寫得「董伯伯」當然仲有第二句金句 – 向新加坡學習啦。

普遍港燦嫌三嫌四嘅韓國車，新加坡的士擺得落三個喼仲要得埋尾冚呀。想問各的士佬仲想講乜呢？又嚟人渣朗嗰句「躝返新加坡」乎??

論到新加坡，必定要提到新加坡政府老早就洞悉 Private car public transport vs Taxi 嘅市場變化問題。除咗早就容許 Uber 合法進入新加坡，再到 Grab 打殘 Uber 後發揚光大，新加坡政府擬訂相當完整嘅政策變化，並協助的士公司、尚餘大約100架「黃黑的」(私人單頭車) 轉型。簡單而言，就係收回的士牌，開放「白牌車」市場。下圖係新加坡陸路交通局最新一份統計表，清楚睇到新加坡嘅轉型過程

或者可以話中国香港特区政府唔做嘢，但掉返轉問各的士行業人士，你哋有無一如董伯伯咁學習新加坡人去轉型吖？新加坡三大的士公司 Comfort DelGro、TransCAB、Premier Taxi 早在2015年就同政府商討如何轉型，嗰個時候香港嘅的士業界 What seven you did???

在我個人而言，的士車隊制度係一個必須要出現嘅事物，原因都係「聽董伯伯話」以新加坡嘅情況作為參考。但撇除制度，淨係車輛數目，唔講依家新加坡的士連「白牌車」數量接近65,000，份統計表嘅ROW 1顯示响11年前新加坡嘅的士數目按人口比例計已經多過香港逾倍，當時嘅香港嘅的士業界只係諗住千祈唔好發新牌以保住自己嘅身家。正所謂十年前你唔同市民諗，十年後嘅今日憑甚麼要市民同你諗呀？又話自己好愛國喎，家陣就同你講返董伯伯啲嘢，點解你哋又唔聽呢喂?!

—–

後記：講到的士罷駛，有返咁上下年紀嘅人都會諗起1982年嘅的士大罷駛。或者諗住發起罷駛嘅嗰一位以為勾起市民對呢段歷史嘅記憶就可以成功「靠嚇」

但唔好話依家嘅的士佬有無咁團結啦，相信講返响港島揸咗超過30年的士而可能仲有印象「虎豹別墅公廁事件」，恐怕的士佬都只係會「算，當今日白做」。