【澳洲車壇消息】韓國現代 Hyundai Staria

【澳洲特派員 麥榮光 特稿】之前都一直有物色7/8人MPV,但奈何於澳洲販售嘅MPV比起SUV少得可憐。唔計水貨嘅就只有Honda Odyseey、Hyundai iMax/H1、Kia Carvinal、Mercedes Benz V250d、Volkswagen Multivan、Toyota Granvia。

唔買Odyseey 無非係日日已經揸緊公司嗰架,對住個垃圾CVT已經好忟,所以一直都唔喺 list入面。Hyundai iMax/H1其實已經屬上代舊物,基本上車行都唔會點接單,直至將庫存現貨賣晒就算,加上各方面都已屬舊版本技術,所以亦一直都唔喺list入面。

KIA Carvinal 一直都算係响 list入面嘅首位,但礙於澳紙七萬價位而又冇自動水撥功能(其實呢個功能好普通,但staria都竟然冇跟) 同 LCD 螢幕錶板,感覺上係唔完整。之前代理有話過今年年尾交車嘅Carvinal頂配版會係LCD錶板,但最後都「走數」話要 delay 到出年,而且宜家訂車隨時要等一年先有貨(CLS!!!!),咁只能一直得個睇字。

至於 Benz V250d 同 VW Multivan 完全係 out 哂 budget,頂多係三年以上嘅二手盤。但始終擔心三年以上嘅二手柴油車好多嘢「夠期要換」,又唔知上手車主用成點樣,所以都冇出手。而頭又大嘅 Toyota Granvia 嗰副「尊容」……都係算鳩數吧啦!

直至到兩三個月前見到澳洲 Hyundai 代理宣稱會响8月尾、9月頭開始售賣 Staria,見個設計又同屋企現有嘅豐田 Yaris 有啲似樣,科技感濃烈,於是開始留意一下。

外形設計科技感強烈,特別車頭設計猶如子彈,甚至可謂比當年豐田「子彈頭」 ( Tarago 即香港嘅 Previa) 更子彈。車側兩邊都有特大車窗。車尾設計雖冇車頭跨張,但兩排直立LED剎車燈,感覺好似當年三菱嘅Grandis相似,做到前後呼應一樣科技感。

上到前座科技感一樣強烈,雙10.25吋螢幕、按鈕式波箱設計及一系列主、被動安全科技功能:
ACC主動式行車循航連停車起步功能、BSM盲點影像監察、DAW駕駛者狀態監察系統、LFA行車道置中、LKA偏離行車道聲音及震動提示含系統修正、LDVA前車駛離提示、RCCA後方車流防碰撞提示及剎車、SEA中門落車後方交通保護機制、TPMS胎壓偵測、FCA全速域前方及路口交通防碰撞路人及單車

後座則相對務實,冇 Alphard 咁豪華、浮誇。全車8座均為皮櫈,第二排可作40/60摺合,第三排亦可作完全摺合,而兩排座位亦可作前後移動。

4個後座冷氣出風口全設於天花,另外第三排座位亦設有左右各1個USB充電口,位於左右兩側C柱上,另車窗下左右各有一個杯架。

操控感視野相當開揚,由於底盤同車身相當高,再兩側車窗都開得比其他車大,車內相當光猛,毫無壓迫感。軚盤輕盈,符合家庭車身分,但軚感則冇Odyseey 咁清晰,電子介入同過濾有啲過多。引擎亦相對比較嘈,網上啲人都有話過D4HB運作聲音係比較明顯。車廂隔音情況理想,比起Odyseey 嘅好。8速波箱轉波邏輯同時機唔錯,算係平順,唔似Ford Focus個8速波箱咁邏輯有啲古怪。但始於底盤離地較高,對長者同行動不便人士而言真係唔夠 User friendly。

由於只係10/9拎車,其他細節嘢仍需時間感受/測試。但作為家用MPV,空間確實只輸平治 V250d,但售價只係 AU$70,000 嘅水平,同埋有現貨唔駛等交車,個人覺得算係唔錯嘅選擇。

Hyundai Staria 規格簡介:

型號:Staria Highlander
引擎:D4HB,直列四氣缸十六氣閥柴油渦輪增壓中冷器
排氣量:2199cc
最大馬力:174ps @3800rpm
最高扭力:430Nm @1500-2500rpm
變速箱:8前速自動波
制動:真空輔助液壓雙迴路四輪通風碟式,附ABS,EBD,BAS
車身尺寸(mm):5253(L) x 1997(W) x 1990(H),軸距3273
車輛淨重:2255-2325kg
載客量:8座位 (連司機),真皮,附 ISOFIX 兒童椅固定鎖

註:此車款為在澳洲銷售,香港市場請向代理查詢。

Be the first to comment

Leave a Reply

Your email address will not be published.


*