【新加坡】跨境的士服務大改革 坡人北上消費更便捷

「北上消費」呢四個字除咗係當今香港人嘅慣常，响新加坡都係一個流行嘅講法同當地人嘅生活慣常。因為兩地物價差距由大約十年前嘅「過條橋平三成」到近年嘅「過條橋俾三成」，唔少新加坡人都經常「北上消費」。。

往返新加坡同馬來西亞柔佛州嘅方法除咗自己揸車之外，公共交通選擇都有幾種，但「跨境的士」因為唔需要响坡、馬兩個關口落車+爬樓梯兩次，係經濟能力較佳嘅新加坡人嘅首選。不過，由於車數只得200部，加上上落客地點限制，與及服務質素 (我親身經歷的認為) 其實仲衰過巴士，近年就衍生出「非法載客取酬」嘅情況顯得非常猖獗。坡、馬兩國政府經過長時間磋商，決定對坡馬跨境的士作出大改革，新措施將响5.1假期後正式實施。

新加坡及馬來西亞政府噚日聯合宣佈，5月4日起實施「新馬跨境的士」新政策，主要包括兩大方向：
1. 增加批准車輛數目。由現時兩地各100部 (即合共200部) 即時各增發200部，達至總數600部
2. 放寬兩地上落客地點限制。由現時只限往返新加坡武吉士萬山街 (Ban San Street) 及新山市拉慶中央車站 (Larkin Sentral) 放寬至多個區域，甚至車輛在註冊國上落客更不受限制，但萬山街或拉慶之外上車必須透過手機程式預約。

增加車輛數目好明顯係應付「白牌車」猖獗所反映嘅需求同供應之間嘅落差；至於放寬上落客地點限制，亦係針對「白牌車」氾濫嘅問題。原因在於原有嘅「新馬跨境的士」嘅服務模式根本同巴士係無分別。更是就係想像吓四個陌生成年人屈住响部的士車廂接近一個鐘……. 單係萬山街本身已經有 CW2 過境巴士，甚至如果唔介意「慢慢碌」，仲有170號巴士選擇。

而且，不論 CW2 還是 170，當抵達馬來西亞新山關卡，就可以「自行離開」，一如港人响羅湖商業城咁行街買嘢，或者响關卡側嘅新山中央車站 (Johor Bahru Sentral) 轉車去其他地方。但的士就必須一直坐到去拉慶先至可以落車。

馬來西亞一方新增予來自新加坡嘅車嘅「許可落客區域」，若針對旅遊業而言，單係Johor Bahru 意即唔駛一定要去到 Larkin 先至可以落車，响JB Sentral 落車又得，或者坐遠少少去到 AEON Mall Tebaru City 或者隔籬嘅 Costco、IKEA 先至落車都得；另外仲有包括位於Senai 嘅新山機場；而 Iskandar Puteri 呢個地方，就是 Legoland 嘅所在地。至於新加坡的落客地點，就全面開放。

至於「許可上客區域」，新加坡增加予馬來西亞註冊嘅車嘅地點， Vivo City 即係「聖淘沙單軌車站」；Century Square 位於東北面嘅淡濱尼 (Tampines)，裕群地鐵站 (Joo Koon MRT) 鄰近大士關卡 (Tuas Checkpoint)，方便晒身處唔同區域嘅乘客嘅需要。

而馬來西亞一方向新加坡開放的，Toppen Shopping Centre 即係 AEON 隔籬 (用香港做比喻，即係黃埔 AEON 行過去對面十二期「大百佳」)，Mid Valley Southkey 即係 Legoland 門口，Angsana Mall 係一個規模有如沙田新城市，但店舖同設施更多元化嘅大型商場。可以話滿足晒新加坡人嘅願望。

另外，坡、馬兩地嘅車在註冊地均可在任何地點上客，但就規定除咗响萬山街或拉慶之外都必須通過手機應用程式預約。

坡、馬兩國兩國政府預計新措施將可以滿足坡、馬要使用「跨境的士服務」嘅需要。另同時呼籲乘客必須使用車身已有標示 Cross Border Taxi 嘅車輛往返兩地，並切勿乘搭「無牌經營的白牌車」。

第一任特首董建華常言道「要好好學習新加坡」，當「的士業界代表周國強仍常批評非法載客取酬」嘅交通服務响新加坡再向前邁進嘅時候，唔知中国香港特区政府會認真落車董伯伯嘅訓示呢?!