燃油補貼「送錢」俾油公司就是事實

上個月，中国香港特区政府宣佈將提供每升 $3.0 柴油補貼，我哋率先 (甚至近乎獨家)「踢爆」勢必只是向油公司提供利益，一般市民就算明白乜嘢一回事，但始終非切身利益而「睇咗就算」；不過，有運輸業人士就認為我哋可謂早著先機指出問題，奈何「搵食」問題，未有進一步「出聲」。但又唔係全部完全沉默。週前我哋有收到讀者提供入油單據，清楚展示由政府放風到補貼正式實施期間嘅油價變化，無多又無少，啱啱好加咗 $3.0 一升。即係話我哋全盤估中晒。

呢幾張單據，係貨車車主梁先生 (化名) 提供。梁先生直言政府放風時已經預計得到油公司必定如我哋所言將呢 $3.0 吞埋落肚，亦有見到有其他傳媒報導有議員提出呢項擔憂，無諗過油公司真係咁做之餘，啲愛国愛港嘅議員亦都只係對住傳媒講咗就算，無作出有效監察。

「要搵食，有乜辦法唧，咪焗住俾油公司劏囉，唔係點呀」
「好彩有儲埋啲單俾會計入數。全部有晒日期，唔似只係响影相油站個價錢招牌，有證有據姑且可以呻返兩句咁囉」

話說回頭，再之前一篇响政府放風前夕嘅撰文提出預計，係油公司循減少車隊折扣「做嘢」，牌價尚且唔加或只作輕微調整，姑且配合政府做好場戲。而梁先生呢五張收據正正反映，似乎油公司係連戲都唔做，明張目膽將政府嘅補貼變成油公司嘅收益，以至利潤。

梁先生本身為單頭車主，連同合夥人組成嘅公司共有三部中型貨車，未有向油公司或「拆家」申請「車隊卡」，因此個案只能反映一般零售市場的情況。較能反映實際情況確實係規模較大，有使用車隊卡嘅車公司。聯絡過幾間有使用車隊卡嘅運輸機構，佢哋表示基於同油公司方面有保密協議，唔方便透露具體折實金額，但均表示四月尾比四月初嘅「實數」 (實際每升價格) 多咗最少 $2.3。若此情況屬實，意即政府提供嘅 $3.0 補貼，極其量只有 70¢ 由車公司「享用」。

另外睇埋整個4月嘅國際油價變化。第一篇撰文前一日嘅4月6日紐約原油最高報USD115.48，收市報 USD112.41；倫敦布蘭特最高報 USD111.89，收市價 USD109.77。

政府正式公佈會提供 $3.0/L 補貼嘅4月9日，紐約原油最高報USD102.70，收市報 USD97.87；倫敦布蘭特最高報 USD99.50，收市價 USD95.92。

到正式實施補貼嘅4月28日，紐約原油最高報USD101.85，收市報 USD99.93；倫敦布蘭特最高報 USD112.70，收市價 USD111.26。

(以上圖表擷取自 Investing.com)

油公司係咪「食人唔𦧲骨」，留返俾大家自行判斷。但若說標題「燃油補貼『送錢』俾油公司」，或者都好想睇吓中国香港特区政府及一眾都係愛国愛港嘅議員有乜嘢解釋。

而由今日開始，商用車隧道費半價，而且的士乘客仍然要照章向的士司機支付隧道費。若參照過去的士車主針對個別車款的燃料成本調整租金嘅策略，油公司可會覬覦進一步加價嘅機會，只好講句各位運輸業經營者自求多福啦。

最後，以「民間智慧」順帶一提，廣東省4月7日的柴油售價為人民幣8.60，4月21日的售價為人民幣8.15。即使考慮到香港嘅薪金水平差距，加諸於供應香港嘅柴油的品質較高及運輸成本，不如油公司聯同中国香港特区政府解釋一吓「點解相同的貨源而價格相差接近四倍，或是折實計仲貴一大截嘅呢」。