全港首部三軸電動貨車－SCANIA 25P 首展

早前已經抵港嘅 SCANIA 25P 純電動貨車，將於聽日起，一連四日（2022年12月8至11號）於亞洲博覽館舉行嘅「IMXHK 香港國際汽車博覽 2022」首次公開展出。

SCANIA 25P 純電動貨車採用 6×2 三軸驅動佈局，驅動軸設於中軸。而尾軸就附有氣壓升降同輔助轉向功能，同一般油渣版本大致相同。從底盤外觀上嚟睇，主陣兩邊原有安放油缸、尿素缸嘅位置，改為安置鋰離子電池，電池總容量達 300kWh。

電池可以用最高 130 kW/200A 嘅直流電 CCS-2 插頭充電，並驅動機油冷卻嘅永磁鐵摩打，提供最大  2,200 Nm 扭力，同 395 匹馬力。另外為咗配合重型貨車嘅特別需要，SCANIA 25P 亦都可以加裝備有 80 匹馬力嘅電動動力分動器，用以為油壓裝置等嘅其他動力設備提供動力。

作為商用車，續航距離可以話係重要一環。SCANIA 25P 純電動貨車設計使用場景為中短距離路程，一次充電預計可以行走250公里。雖然方便程度未及一般油渣貨車，於油站加油之後就可以行走動輒四五百公里，但喺環保以外，亦都免卻燃油引擎需要定期更換偈油等開支，相信會受到大型物流公司選擇試用。但電池可靠性，以及續航距離仍然有待實質營運時所考驗，所以要達到將純電動商用車普及化，似乎仍然有一段頗長距離。

「IMXHK 香港國際汽車博覽 2022」展期將會由今日2022年12月8號起至星期日11號舉行。有關門票詳情可以瀏覽： https://www.imxhk.com/zh-hk/