補習天王林溢欣為「策略投資者」嘅黃蜂集團旗下嘅 GoSwap 共享汽車平台响上週五 (2026年5月15日) 夥同的士車隊 BigBoss Taxi 公佈開設「手機解鎖時租的士」平台，方便想偶爾揸的士搵返啲嘅人士。平台強調呢個結合科技能為現時本港職場生態對「自主工作模式」嘅需求，與的士車輛資源作出配對，期望為整體的士服務推上一個科技化嘅新層次。
GoSwap 強調「時租的士」之意為無需長期租用，只需要透過手機應用程式就可以預約同响指定嘅停車場攞車，租金按小時計算，想揸幾耐就揸幾耐。想收工只需要叉返夠電 (SOC 60% 或以上) 泊返去停車場咁就搞掂。當然唔好有任何揩花碰損。
BigBoss Taxi 作為 GoSwap 嘅「戰略聯盟」，率先提供五部 AION Y Plus。GoSwap 營運總監姜紹熙表示稍後將有更多車輛加入平台，期望兩年內可以增加至500部車。
GoSwap 嘅推出時間，與近期政府就網約車合法化嘅討論彷彿有點巧合，尤其是關於發牌數量同個別平台提出嘅目標存在落差，形成潛在嘅人力資源空間，GoSwap 可會是「食住個勢」吸納網約車司機，財務總監鄧國湘則強調「真係只係事有湊巧。但未來嘅營運發展當會同政府方面配合」。
租用人必須為持有有效 6 或 6A 正式駕駛執照及的士司機證，年齡介乎25至65歲之間，必須「甩P」後再加一年以上；過去三年內無不小心、危險駕駛、酒駕、藥駕定罪記錄，無的士司機扣分制嘅扣分。
目前有五個攞車/還車地點，分別位於牛頭角、長沙灣、旺角、荃灣同天水圍。另外可以使用黃蜂集團旗下15個停車場免費泊車。
基本租金為每小時 HK$65，另外需要繳付 HK$20,000 按金。至於保險方面有三種選擇：
1. 每小時 HK$7.0 將有全面保障，賠償上限為全數按金，即 HK$20,000；
2. 每小時 HK$5.0，賠償上限調高至 HK$40,000；
3. 無支付額外保費，賠償上限為 HK$100,000
關於損毀責任釐清嘅問題，姜紹熙強調攞車及還車流程均需要進行業界俗稱「拜四角」嘅檢查程序，因此租用人無需要擔心責任。但佢提醒想租車嘅司機一定要跟足程序檢查車輛，並在發現車輛有損壞即時通知平台。
至於按金退還安排，在還車並繳清隧道費後申請，預計需時7日，就會退還俾司機。姜紹熙指出係由於要確定租用期間嘅隧道費、告票等嘅事務，並非刻意保留。另外，被問到可有設立獨立嘅信託帳戶，或委託律師樓進行相當於物業交易嘅托管安排，財務總監鄧國湘則表示現階段未有咁嘅措施，但會積極考慮响稍後會展開有關計劃。
有同現職的士司機嘅朋友討論過，佢哋認為租金水平「偶爾揸吓都可以嘅….」按金則確係「電車」嘅水平，而又有幾個免費充電站可以用，都仲有可以考慮之處。但就指出按金未有如一般車行 / 托管人可以分期「或者當係一個碌卡儲積分嘅方法囉」。
無論如何，總算多一個司機嘅選擇，亦算有方法處理車輛資源嘅問題。其餘詳情，可瀏覽 GoSwap 官方網站。
Be the first to comment