香港公眾常規汽車渡輪復航？ 油蔴地小輪：希望年中前啦！

自從2016年香港小輪集團經旗下油蔴地小輪以洋紫荊維港遊推出懷舊汽車渡輪遊之後，每次再辦都吸引唔少「老香港」同「扮係老香港」嘅車友參加。

總經理「漏口風」

時間去到2025年2月9號，香港海事博物館同香港小輪集團合辦「汽車渡輪維港遊」，再次畀公眾有機會體驗揸埋自己架愛車搭船嘅感受🚙，乘客亦可以喺汽車渡輪上享用經典嘅餐蛋麵，加上展出精彩汽車渡輪歷史物品，以及透過船長分享，令更多人了解豐富嘅香港渡輪歷史，重溫昔日情懷。

當日喺航程中，油蔴地小輪海事總經理張國偉先生簡介油蔴地小輪為香港提供汽車渡輪嘅歷史，講解中張國偉先生提及「預計喺今（2025）年年中前會喺繁忙時間重新啟動返呢個汽車渡輪」。

油蔴地小輪回應

就住張國偉先生嘅呢一番說話，經過向油蔴地小輪查詢，得到嘅答覆大約如下：

• 證實係有件咁嘅事
• 計劃最快係2025年4~5月
• 每日提供公眾常規汽車渡輪服務
• 預計初期會提供1~2班
• 率先會安排喺繁忙時間
• 細節有待落實

香港汽車渡輪簡史

翻查資料，油蔴地小輪創辦人劉德譜早喺1926年就已經向政府提出「汽車渡輪」呢個構思，當政府接納咗呢個建議之後，油蔴地小輪就利用新起好嘅汽車渡輪碼頭以及佢哋公司自行建造嘅汽車渡輪，由1933年3月6號開始提供第1條橫跨維多利亞港「中環統一碼頭←→油蔴地佐敦道碼頭」嘅3種汽車渡輪服務：

• 運載汽車
• 運載汽車以及散客
• 運載危險品車輛

香港未有海底隧道嘅時候，如果想話揸住架車橫過維多利亞港，汽車渡輪就係唯一途徑，當時油蔴地小輪旗下營運多條汽車渡輪航線，服務範圍遍及港九離島——生意好到天星小輪、利安小輪都想分一杯羹——不過香港嘅汽車渡輪服務由始至終都只係油蔴地小輪做緊獨市生意，全盛時期油蔴地小輪有多達17艘汽車渡輪，並且喺1970年創出1年之內接載600萬架次嘅紀錄。

1972年8月2號紅磡海底隧道通車，油蔴地小輪仍然雄心萬丈，認為旗下汽車渡輪服務仍然具有優勝之處——即使1975年汽車渡輪只係接載咗350萬架次，都無損油蔴地小輪嘅自信。

香港經濟起飛，越嚟越多人需要來往港九兩地，政府於是推動興建新嘅海底隧道，去到1989年9月21號東區海底隧道通車，油蔴地小輪旗下嘅汽車渡輪服務當年一年之內仍然接載咗500幾萬架次——不過呢個望落去仍然輝煌嘅數字，背後暗湧處處——1985年4月1號開始提供嘅「西灣河←→觀塘」汽車渡輪服務就受到東區海底隧道嚴重打擊，1991年9月1號正式停辦，標誌著油蔴地小輪汽車渡輪服務江河日下。

1980~1990年代香港道路以及鐵路網絡迅速擴展，令到選擇使用油蔴地小輪汽車渡輪服務嘅市民銳減，香港第3條橫跨維多利亞港嘅海底隧道——西區海底隧道——1997年4月30號通車，油蔴地小輪旗下嘅汽車渡輪服務當年一年之內只係接載咗40萬架次。

油蔴地小輪最後一條公眾常規汽車渡輪航綫「北角←→九龍城」最終喺1998年1月27號停辦——自此油蔴地小輪只係維持提供以下嘅危險品車輛汽車渡輪航線：

• 北角←→觀塘
• 北角←→梅窩（視乎需求）
• 觀塘←→梅窩（視乎需求）

宏願？

相隔超過四分一個世紀，當油蔴地小輪得返5艘汽車渡輪，而香港境內只係淨返以下5個地方仲有可以安排車輛登上汽車渡輪嘅碼頭：

• 北角
• 觀塘
• 梅窩
• 青衣
• 鴨脷洲

油蔴地小輪提出再次提供公眾常規汽車渡輪服務，究竟最終會係「只聞樓梯響」，定係「再創輝煌」，相信大家都要拭目以待。