買架「長城」無乜好 撞車真係命都無

話說喺2020年頭,本台曾經出過一篇報道,講到2011年喺英國成立嘅全球新車安全評鑑(Global NCAP),近年關注唔同地區賣緊同一款式名稱車輛卻有唔同安全標準嘅問題。佢哋喺一次撞擊測試中發覺同一款日產旗下嘅NP300嘅輕便客貨兩用車(皮卡/農夫車),撞車後歐洲版嘅司機仲有機會有命落車,而非洲版嘅司機就應該無咗條命。

當本台出咗呢篇報道之後,有網民提出咗以下嘅意見:

2020年12月3號,全球新車安全評鑑發出新聞稿,指喺得到彭博博愛會(Bloomberg Philanthropies)同埋國際汽聯基金會(the FIA Foundation)支持之下,聯同南非汽車會(AA South Africa)進行咗新一輪嘅新車撞擊測試。

而今次佢哋揀咗其中一款車就係中国長城汽車旗下嘅風駿5型(當地銷售款式叫Steed 5)輕便客貨兩用車(皮卡/農夫車),以時速64公里將司機位一邊錯位撞埋固定嘅可變形消力障礙物,模擬撞上另一架車…

結果嘛…不如睇片先…

全球新車安全評鑑今次搵中国長城汽車嘅車款進行撞擊測試…唔通係…

我的帖文起了作用?(●_●)

當然本台知道唔係咁威水啦!

全球新車安全評鑑表示,佢哋自從2017年就搞緊一個「令非洲嘅車更安全」(#SaferCarsForAfrica)嘅社會運動,陸續測試喺非洲售賣嘅唔同車款,睇下佢哋嘅安全程度有幾差,務求喚起公眾關注汽車生產商賣車畀發達地區同發展中地區嘅雙重安全標準,推動當地政府收緊車輛安全規定。

當全球新車安全評鑑之前測試過日產NP300嗰一款輕便客貨兩用車(皮卡/農夫車),佢哋認為應該要測試埋其他喺非洲賣緊,而價格上更有競爭力嘅同類型車款,結果發現「低處未算低」!

根據全球新車安全評鑑嘅新聞稿,按照今次撞擊測試嘅結果,長城風駿5型所得到嘅評分係「0粒星」,而且明顯見到車身完整程度屬於「唔穩陣」,司機同乘客極大機會有致命性創傷

全球新車安全評鑑表示佢哋今次測試用嘅長城風駿5型係屬於基礎版本,並未有配備安全氣囊。

當眾所周知人嘅頭、頸、胸膛都係關鍵嘅身體部分,測試中扮演司機嘅假人,收集到數據顯示,喺車禍中長城風駿5型對頭部保護評級係「差」,而對頸同胸腔保護評級係「弱」。

至於車身完整程度評級為「唔穩陣」主要包括以下考慮因素:

  • 撞擊後車頭部件大幅陷入司機放腳嘅位置
  • 車廂結構大幅變形塌縮
  • 軚盤柱大幅向車廂移動,令軚盤直撞司機頭部

呢啲結構上嘅問題令到全球新車安全評鑑認為就算長城風駿5型有裝上安全氣囊,對保護車禍中嘅司機避免嚴重受傷都係「無補於事」。

當全球近年越嚟越重視兒童喺乘搭車輛時嘅安全,全球新車安全評鑑亦喺撞擊測試中加入兒童乘客動態評級,用以評價車輛設計上令兒童約束裝置(即係坊間講嘅「汽車安全椅」)喺車禍中能唔能夠發揮到保護兒童嘅功效。

又…大家都好明白中国公司做嘢係點樣嘅…

因為長城風駿5型並無裝設合乎國際標準化組織訂定ISOFIX/ISO 13216標準嘅「汽車安全椅」錨扣,長城汽車拒絕建議安裝兒童約束裝置進行撞擊測試,所以全球新車安全評鑑只能夠喺呢方面直接畀個「0分」。

不過為咗能夠全面比對其他車輛嘅撞擊測試結果,全球新車安全評鑑決定維持一貫嘅兒童乘客動態評級測試,喺後排座位安裝咗兩款「汽車安全椅」,擺咗一個模擬18個月大嬰兒同另一個模擬3歲大幼兒嘅假人。

測試結果顯示「汽車安全椅」仍然有效保護兒童免受頭、胸位置嘅嚴重傷害…但係…因為無合規格嘅「汽車安全椅」錨扣而只可以靠安全帶固定…

擺咗嗰個模擬3歲大幼兒假人嘅「汽車安全椅」喺撞擊過程中爛咗!

至於講返一啲現時歐美發售嘅車款入面屬於常見嘅安全裝置,例如預索式安全帶、防鎖死煞車系統之類,長城風駿5型入面係…

全部都無㗎!

經過今次嘅撞擊測試之後,全球新車安全評鑑秘書長Alejandro Furas表示:「依家都極之明顯睇得到,喺車輛安全方面,推銷時所講嘅同現實表現係有幾大落差。」

一直致力於推動全球道路安全、減少死傷嘅英國註冊慈善團體趨零基金會(Towards Zero Foundation),主席David Ward就話:「對於想購買長城風駿5型嘅消費者嚟講,今次測試出有極高機會引致致死受傷嘅結果實在敲響警鐘。」

南非汽車會行政總裁Willem Groenewald講到, 佢哋自2017年已經開始要求政府改善車輛安全規定,「今次結果再次確認要緊急推動改革…唔應該再有唔安全嘅車喺路上行走。」

最後,大家再重溫一次呢次撞擊測試嘅照片,中国長城汽車呢啲妄顧人命、生產咁低質素車輛嘅廠商,仲值得留喺呢個世界上嘅咩?

4 Trackbacks / Pingbacks

  1. 臺灣汽車新里程:自主評鑑安全 - 汽車台 HK Car Channel
  2. 韓國牌子嘅車質素差? 老虎活士:我親身經歷話唔係 - 汽車台 HK Car Channel
  3. 【美國】面對逆向揸車嘅白痴司機 我無所畏懼 - 汽車台 HK Car Channel
  4. 臺灣交通部:「臺灣新車安全評等」嘅測試場地今個星期啟用 - HK Car Channel 汽車台

Leave a Reply

Your email address will not be published.


*