雙層巴士爬上東邊街有乜好驚奇？！

颱風「馬鞍」來去匆匆，為大眾帶來（好似）多兩個小時嘅睡眠時間，天文台喺今日朝早九點左右改掛3號強風訊號，除咗一眾打工仔急不及待趕住出門口去返工之餘，巴士車長比各「好鍾意返工」嘅市民更早喺車廠待命，隨時出動前赴各總站或車務稽查指定地點載客。今早Facebook「西環變幻時」群組 就有網民張貼相片，影到一架九巴11.3米版本嘅ADL Trident E500 Turbo型雙層巴士 (車隊編號：E6M111，車輛登記：XU6875）於西營盤第二街縉城峰外出現。

唔少網民唧唧稱奇，亦當然有指巴士車長無留意路牌。巴士出現於該處唯一可能性就係巴士於干諾道西往堅尼地城方向左轉入東邊街，然後直上到第二街右轉。粗略估計應該係巴士車長駕車前赴蒲飛路總站準備開出隧巴103號線，但未去到西邊街先至由皇后大道西交界處右轉，又同時無留意東邊街上山方向路口豎立嘅車重5.5公噸限制路牌，從而誤入東邊街再入第二街，然後就被人拍到放上Facebook。

雖然巴士車長有「行錯路」之嫌，但仍然懂得覓路繼續行程，而不是「機械人模式」的停在路旁等候「救援」，客觀上算是將功補過。

縱然那車重5.5公噸限制駛入嘅路牌也許衍生其他問題，但要知道這個路牌是在2012年曾接連發生最少三宗涉及中重型車輛意外之後，政府「為免重型車輛再次於該處引發意外」而豎立，取代之前的「車長10米」駛入限制。

對於呢段路是否適合中重型車輛行駛，又係老生常談嘅一句，香港人普遍對汽車無知而又傳媒總愛找所謂磚葉人士例如盧覺強之流說三道四，其中一次，就是東邊街一宗涉及貨車嘅意外之後，節目中盧磚家指著一部三菱Canter貨車說成「重型貨車」 (總重最高只會是9噸，登記類別是「中型貨車」)

在無知之上煽動恐慌，自然地認為不適合；再者，香港運輸業普遍「非洲式用車」確實會增加意外風險。今次巴士行錯路，正正反映科技進步，加上只要車輛性能良好，機件達到安全水平，司機有足夠的技術且懂得鎮定地隨機應變，其實無需感到驚奇。

當然汽車台並非鼓勵犯法，只不過其實有好多路段無論車重限制、長度限制、（甚至係）速度限制都有放寬空間。