英國「高咪數」車款耐用統計

私家車在香港多被視為奢侈品，另加上某些基於數字衍生的概念想法，不少車主 / 二手車買家傾向不喜歡行車哩數高的車輛。但在英國，汽車是很多平民的日常交通工具，唔止「咪數」超越100,000 係家常便飯，最近仲有一個英國汽車網站調查「高咪數」嘅可靠性。

英國汽車網站 Motoreasy 以運輸牌照局(DVLA)的數據，及訪問車主進行調查，選出現時英國十款最耐用汽車。

調查是根據 DVLA 的車輛登記記錄，包括有繳交道路稅 (即類似香港嘅「牌費」) 及持有有效年驗證明書合法在英國道路上行走、按照年度驗車記錄 (MOT Test) 及加上隨機抽樣訪問車主查證，統計總行駛里程逾250,000英哩嘅車輛數目，然後抽出每個車款型號嘅現有登記數目。
 (英國嘛，所以係英哩。即係400,000 km！「十萬大限」嘅四倍，有無嚇親呢?!)

調查結果發現，符合「有牌費」25萬咪 條件嘅車輛數目共73110部。响呢逾七萬部車當中，數量最多嘅車款係香港應該無人認識、歐洲綽號「平價版福士」的捷克 ŠKODA Octavia，以總數1,950部被網站評為「最耐用可靠車款」。當中有部份車齡高達二十年，即係首批運到英國發售嘅「初代版」。

相信唔識 ŠKODA 是甚麼料子而又普遍仲覺得東歐好落後嘅香港人必定睇到眼都突埋。但其實即使係蘇聯時期，捷克嘅機械重工業水平一啲都唔差。事實上响英國及歐洲，ŠKODA 過去廿年嘅銷量都高過「老母」Volkswagen。

第二位係 Volkswagen Passat，有1874輛。香港人極度尊崇嘅平治 (Mercedes-Benz) E-class 排第八位，估計年份該是 W210至最早期的W211。日本車就只有豐田，分別係第三位的Prius混能車及第六位的Avensis。又確實真係「無得頂」嘅！詳細排名就响下面：

有一個值得留意嘅情況，部份入圍嘅車款係英國當地的士司機 或 Uber 司機的至愛。可見外國嘅的士採用嘅車款，確實係可以成為參考指標。

網站另有調查九款客貨車及的士嘅耐用程度排名，同樣以總里程逾二十五萬英里為準則。排名榜首嘅係平治Sprinter，數量逾九千部。

第二位的福特Transit的數量只有 Sprinter 大約一半。响香港被嘲笑「想放假」嘅歐霸 Iveco Daily 都有744部排第9位。

「倫敦的士」TX II 排第三位，數量約四千部；新款少少嘅 TX4 排第五位，數量只得約2,800 部。

網站創辦人McClure Fisher指出，要車輛耐用必須注重定期檢查保養，確保潤滑油、冷卻水有足夠存量，而且要連同所有濾芯 (即香港俗稱嘅油隔、風隔等等) 都要根據廠方建議定期更換。另要注意駕駛態度，避免重腳油、大腳迫力等加劇損耗嘅操控動作；做足日常清潔避免沙塵積聚引致鏽蝕。其實，咪即係切勿「非洲式用車」囉。