英國政府表示，邀請企業喺英國各地道路上營運自動駕駛客運車輛服務，依家已經開放申請。
呢項先導計劃會喺2026年較後時間展開，旨在發展支援自動駕駛嘅交通法規以及技術，獲批嘅企業會喺政府監管下營運以下3類自動駕駛客運車輛：
- 的士
- 巴士
- 私人租賃車輛
呢個先導計劃會收集自動駕駛車輛喺日常交通狀況下嘅實際運行數據，當中包括城市環境以及載客情況。
英國運輸部運輸政務次官（地區運輸事務部長）黎西門（Simon Lightwood）表示：「自動駕駛車輛為英國帶嚟咗變革機遇，佢唔只為傷健人士同埋長者提供咗獨自出街嘅機會，仲可以促進經濟增長，並且喺英國各地創造高技能就業機會。呢個先導計劃令大家更接近呢個未來，畀乘客有機會親身體驗利用自動駕駛出街之餘，同時（政府會）確保安全始終放喺首位。」
有意參與嘅企業喺獲準開展自動駕駛客運車輛服務之前，必須通過審批檢查，包括倫敦交通局在內嘅各個英國地方交通管理部門亦需要個別批准自動駕駛客運車輛服務喺轄區內營運嘅服務，審批檢查涵蓋3大範疇：
- 車輛安全
- 網絡安全
- 營運標準
呢個先導計劃係英國自動駕駛車輛監管法規制定工作嘅一部分，英國政府較早前已經喺2026年3月完成咗關於自動駕駛汽車監管嘅公眾意見徵詢，正在準備相關立法工作。
英國運輸部指，公眾值得注意「人為錯誤」係英國道路交通意外嘅最主要成因，有88%嘅英國道路交通意外係由「人為錯誤」引起，對於測試自動駕駛車輛，英國運輸部表明安全係呢次先導計劃嘅核心。
英國運輸部同時講到，呢次先導計劃亦係支持英國發展自動駕駛汽車行業，預計到咗2035年，相關產業有望為英國創造幾千個就業職位、幾十億英鎊經濟收益。
多間公司已經表態計劃參與呢個營運自動駕駛客運車輛服務先導計劃，其中包括：
- 英國Wayve
- 美國Uber
- 美國Waymo
這聽起來很有趣，自動駕駛客運服務如果能順利運作，一定能解決不少交通問題。