【台灣消息】新一代日產 Sentra B18系即將登場

台灣嘅 Sentra 車系，即係相當於曾經响香港風靡一時嘅Sunny 車系。

Sunny 車系自從2003年以廠方代號G10嘅一代之後就銷聲匿跡於香港 (唔計「街尾見到已經想嘔」响 201＿年出現的 N17 系)。至於台灣，Sentra 之名由 B12 開始沿用，到B13，B14，N16 直至2006年，之後就換上 Tiida (C11) 及 G11 代 Bluebird Sylphy兩個車系。

直到2013年，日產發表全新B17系，當地代理裕隆則引入並重新冠上 Sentra 名稱。也許因為車體長度增至4.6m(軸距2700mm) 就加上 Super 而稱為 Super Sentra。

• 

• 

• 

我曾經在台灣租車自駕 B17系，1.8L引擎搭 CVT 波箱，高速公路嘅性能表現絕不失望，就算台7、台9線「劈山」出彎俾油嗰一下嘅加速表現都唔似 CVT波箱。

或許日本廠方設定的引擎配搭是1.8L 同2.0L (其實仲有1.6L，但我認為「力水」爭啲，故忽略之)，本港代理可能因此為避免重蹈 Primera P11 「瑰寶被當草」嘅覆轍，加上同期有與體積相近但更高級別市場定位 (即係可以賣貴啲) 嘅 Teana，所以未有輸入 B17。我曾經向合誠查詢過，得到嘅回覆確係叫我考慮 Teana。但心諗「吉車」重量 (Kerb weight) 相差200kg…… 電油唔L駛錢咩。

日產响舊年11月底洛杉磯國際車展發表全新B18系，今年年初率先响北美及中国推出。香港我就唔期望喇，事關官方網站搵架「正常款式」嘅 Sedan car 都無，但就一直留意台灣市場嘅消息。裕隆集團响上星期發表正式公告及舉行傳媒「賞車會」，預計10月初正式發售，估計基本規格售價在新台幣75萬。

同 B17系相比，長、闊及軸距都有所增加，唯獨高度由B17系的1496mm 下調至1450mm，數值上彷彿頭部空間縮減，實際上就要試坐過至知道，但外型來得更 Sportive 就肯定㗎喇。

• 

• 

新車當然唔少得大量「高科技元素」設備，除咗LED 頭燈、霧燈、日行燈呢啲「例牌菜」之外，仲有IEB 自動緊急煞車、AHB 高低燈自動調校、RCTA 後方車側警示、ICC 智慧定速巡航、LDP 車道偏離預警等等，仲可以追加 AVM 360 度環景影像監控、BSD盲點警示、DAA 防闔睡偵測。不過，台灣車媒普遍批評還沿用鹵素頭燈 (齋版)、尾燈還不是LED 是一大敗筆，未嘗唔係合理批評，尤其是HID / LED 頭燈的確有助提高行車安全，日產廠方實該認真諗諗。

引擎波箱等機械規格方面，先講引擎，台灣市場將搭載 1.6L 138ps / 17.2kgm@4000rpm 嘅 HR16DE 引擎，單睇數字好似夠力，但淨重比B17增加逾100kg (1270kg vs 1380kg)….. 若再以 Primera P11 淨重1230kg 搭載嘅 SR20DE 峰值扭力18.3kgm 作對比，真心認為似係「盲目 down-size」所為。反觀北美市場則配上MR20DE 引擎 2.0L 150ps / 20.3kgm 4400rpm，數字上相對較為合理。

至於懸掛系統，前懸掛維持B17 嘅麥花臣支柱，但後懸掛則將由 B14、N16 一直沿用至B17 嘅拉力桿改為類似 B12、B13嘅多連桿式獨立懸掛。理論上轉彎反應會較敏捷，但就降低咗穩定性，孰優孰劣因人而異。不過，回想當年 Primera P10 與 P11 响 BTCC 嘅成績差異而兩者的主要分別就在於後懸掛設計….. 或者相比 B17 增加嘅 100kg 車重意味車架剛性應該有所增強，應該可以彌補返。

波箱則維持 B17 上的 Xtronic-CVT 無段變速波箱。以我駕駛過 B17 嘅體驗，應該唔會有太大問題。不過，北美市場就有啲古怪，加拿大還可選擇 6速手波，但美國就只得 CVT，唔少當地車媒為此降低評分。或者真係有如日本車壇金句「日產擁有最優秀嘅工程師，XX 擁有最佳嘅市場推廣部門」

實際表現如何，相信只能留待「痴啦歪核匙」過咗之後到台灣一試先至知道。但如果香港代理「製造驚喜」的話，確實係一款不容錯過嘅 Sedan / Saloon car。但真係唔好嚟1.6L 偈，撇除嚴重過時嘅牌費制度，以香港嘅路面肯定變成票房毒藥。