小編最愛MPV－全新 2021年款本田 Odyssey

上星期本田發佈咗Odyssey（朗程，大陸稱為：奧德賽）日本版2021年小改款嘅車型官方圖片。作為中期改款車型，新車喺外觀同內飾造型上都作出咗改動，其中矚目嘅可以話係增加咗可以用手勢控制嘅電動趟門。新車預計將於今年秋季喺日本發售。

外觀方面，新款Odyssey主要針對車頭鬼面罩設計作出修改，將舊款粗壯嘅電鍍飾條減少，改為增加更多橫向條幅，同時車頭燈組造型亦都全新設計過，使用全LED光源。

而車廂入面嘅多媒體屏幕尺寸除咗增加外，設計亦會由嵌入式改為懸浮式。同時因為屏幕設計改變，中控台嘅冷氣出風口亦由屏幕左側搬到屏幕下方。而新車亦都首次引入手勢控制嘅電動趟門，乘客可以喺中門手抽對上嘅玻璃位置，用橫掃手掌嘅手勢命令趟門打開或者關閉。呢個設計應該都係全日本首次出現。

官方暫時都仲未公佈新款 Odyssey嘅動力規格，但估計現有車型搭載嘅2.4升VTEC引擎、2.0升油電混合動力系統，以及CVT無段變速波箱都會流用喺新型號身上。

新車預計十月於日本推出。