抄牌越趨瘋狂,政府發窮惡的尋租行為

嗱….. 我講過唔會响呢度講政治評論,但抄牌呢樣嘢點都涉及政府。講多次,唔係政治評論,OK?!

有朋友呻,呢幾個月瘋狂收告票,試過有一張凌晨四點幾。坦白地,我上個月「食」四張,除咗一張衰憨膠星期六 08:52屯公轉車站路口左轉…… 其餘都係「三百二」。另外仲有朋友中兩次「雷射槍」,但超出速度唔夠10km/h。

你無睇錯,凌晨04:40

可能你會話「犯法就係犯法」,違泊就係違泊,超速就係超速,以前唔抄只係寬容,依家「揸正嚟做」你無得怨。

係好似好有道理,但如果事情真係咁簡單,我邊有得又寫返一千幾百字廢噏!

2017年,港府向立法會提交法例草案增加告票銀碼,結果幾乎全世界「媽」到爆晒廠之下只加「行車票」而唔加違例泊車。

出現呢個結果嘅原因,就係全世界怒屌 (真係要用粗口字先至夠傳神)「泊位唔夠先至違泊,政府唔加返車位不特止仲要拆停車場,依家仲話要加大銀碼?? 痴撚線」

有幾唔夠泊位?2015年11月4日,運房局回應立法會書面質詢列出全港共有約645,000 個私家車泊位: 18,479 個路邊咪錶泊位, 51,487個政府停車場泊位, 579,125 個私營停車場泊位。

2015年,登記私家車數目約51萬部,2017年約58萬部,2020年直至6月嘅數字係……
636,832部。再嚴謹少少,只計「有牌費」嘅「領牌」數字係 572,211。

仲有喎,呢五年,政府先後拆卸中環美利道停車場,下年年初再拆油麻地停車場。連埋2014年拆卸嘅尖沙咀中間道停車場,總共無咗過千個泊位。嚟緊政府又放風想拆上環林士街停車場……

如果再回帶,呢廿幾年嚟,唔見咗好狠多錶位。多到….. 想睇就 Click 去睇我响2017年俾立法會份意見書嘅第7頁。我敢保證除咗啲「仇車L」或者牌齡未夠五年嘅,你睇完嘅反應,唔係「唔講唔覺講開好L覺」,就係「佢老味CUT L 晒啲位泊佢個仆街杏加橙」

啲「仇車L」唔好又話食得鹹魚抵得渴,撇除啲小農奴隸炫富心態,又撇除呢期 China Virus 瘟疫想避免搭巴士小巴,你估好多人想揸私家車。但香港嘅公共交通服務只係豢養迷信鐵路萬能教嘅信徒……

錶位收費 $2 / 15分鐘,每日0800-2400 收費,即每個咪錶每日收入一舊水都唔夠;油麻地停車場時租$19 (晚上 $15),就用貴嘅銀碼計,每個車位每日收入 $456,不過係 Wilson Parking 袋。一張違例泊車告票盛惠$320,如果「雙黃」而無落車又無揸走就 $560。當告票產生嘅收益好過咪錶或停車場嘅時候…….

仲有呢,劃咪錶、起停車場又要過路政署、城規會、區議會,甚至可能要過環保署(做環評),過晒之後又要招標搵承建商,大量行政工作要做;但抄牌呢?叫 GLD 開印刷機然後就可以財源滾滾來。一個其實一直縱容以至鼓勵各行各業,包括的士同小巴,進行經濟學稱為尋租行為 (簡單講即係炒賣、只圖以分享他人利潤取得回報) 嘅政府……. 曲線而斯文啲咁講,身體力行之嘛。

除咗(可能)解釋到CUT錶位、拆停車場之外,仲有解釋幾個水桶、一張膠櫈…. 等雜物霸車位/霸路邊「疑似」停車空間嘅行為係咁猖獗而個政府可以話視而不見 ── 搞到你無得泊先至有得抄吖嘛;唔塞車邊有得俾某些政棍又吹要爭取興建鐵路呀?!

加上過去一年多某個部門嘅「額外薪酬支出」同其他唔知可唔可以寫明出嚟嘅開支增加咗咁多,你估政府係開善堂咩。

可以點?學吓港燦嗰句:你唔係期望呢個政府會做嘢呀嘛……. 再甚至更小農奴隸嗰句:官府之事豈容反抗?受啦。

1 Trackback / Pingback

  1. 油麻地停車場 告別前夕 與你最後一遊 - 汽車台 HK Car Channel

Leave a Reply

Your email address will not be published.


*