公務員夠鐘放工,話之局長無禁區紙上大灣區

香港人鍾意返工嘅程度,全世界都無一個國家嘅人敢認「叻過香港」;再者,no pay OT 呢家嘢根本就家常便飯,甚至乎有唔少公司嘅管理層同員工講到明這是必須的,更甚至有聽聞過唔少個案因為唔肯OT而被豉椒炒魷。跟正僱傭合約訂明嘅工作時間準時放工,對唔少打工仔而言係癡心妄想。不過凡事總有例外嘅。

早排「過境組」日日都排到出大電梯大堂(Photo by Ian Chan)

話說小弟耐唔時都會幫啲親朋戚友去處理佢哋同車有關嘅事,例如買牌費、買賣車過戶,甚至申請國際車牌(IDP)。呢啲事情相對地都好濕碎,因為過境中港車真係最麻煩。除咗要揸架車去元朗獨市生意嘅「中檢」驗車,上廣州去廣東省公安廳、同深圳海關搞一大餐手續之外,响香港仲有一樣好重要嘅證件要搞,就係要拎一張由運輸署發出嘅「封閉道路通行許可證(過境車輛)」(俗稱:禁區紙),先可以係香港出到關返到大灣區。

中港車出關必備嘅「禁區紙」,圖為港深西部通道(深圳灣)嘅「禁區紙」(Photo by Ian Chan)

經過三年武漢肺炎嘅「封關」之後,月前終於開關。但正如鄧小平生前金句之一「一放即亂」,成千上萬部掛中港牌嘅車就要辦手續,結果運輸署牌照部「過境組」嘅職員做到趴响度,據悉佢哋早陣子幾乎每日都要開OT,好彩就11點,唔好彩嘅就1點先至收到工,唔係中午,係夜晚!

前幾日,小弟又要幫唔知邊個親戚朋友要去運輸署搞禁區紙,唔知係邊個好彩,竟然俾我遇到一個應該好好準時收工嘅公務員。

件事係咁嘅,話說「過境組」同其他政府部門櫃位服務一樣,只要你响關門之前入到去排隊/遞文件,佢哋都會招呼埋閣下先至收工。雖然「過境組」會响 4:45pm 截龍,但我通常下晝三點幾打後先至上去。嗰日又係咁,仲要 3:30pm 打後先至上到去,照樣拎張「飛仔」嘅籌號等叫名啦。而根據以往經驗,應該都要等最少兩個鐘,於是乎就梗拎部電話出嚟撳撳撳,或者上網睇片 (我有帶 headset 㗎) 過日神啦。始終要留意位櫃檯職員開咪叫名,唔可以瞓著覺嘅。

等到大約 5:30pm 咁上下,有一個廣播聲響起:

民政及青年事務局,車牌AM18,請到xx號窗

但似乎無人埋去嗰個櫃檯,「過境組」嘅職員就好自然哋就再嗌咪一次「民政及青年事務局,車牌AM18,請到xx號窗」,但都係無人行去 counter。

通常運輸署啲職員會認為「被嗌咪」嘅人士去咗洗手間,會先處理其他人士嘅申請手續,然後過一陣子襯空檔會再嗌咪。但如是者,接近一個鐘頭過去,嚟到電視播「池瀨,砵怨….」嘅六點半,嗌咪廣播聲再次響起:

民政及青年事務局,
車牌AM18,請到xx號窗。

响嗰個時候,過境組嗰度現場剩低唔夠十個人响度等攞「禁區紙」,一眼就望得晒現場咩環境,亦即係話,嗰位應該要嚟攞 AM18 嘅禁區紙嘅民青局職員唔响度啦。驟眼望吓啲櫃檯職員好似响度搖頭嘆息,唔知係羡慕抑或妒忌 AM18 嘅主要乘客麥美娟女士嘅下屬可以準時收工到咁,還是覺得「嘢都未做晒就話之而五點鐘準時走人」。不過,麥局長如果知道佢仲未可以乘搭座駕上到去大灣區定居,係因為佢呢位好同事準時收工,唔知佢會點諗呢?會唔會覺得佢呢位同事唔肯捱「獅子山下精神」而認為係「廢青」呢?

民政及青年事務局局長麥美娟女士嘅座駕AM18 私家車(資料圖片)

後話:其實按照一貫嘅程序,「過境組」職員會响當申請人交齊晒文件之後,就快手快腳做核對然後啅啅聲印埋張禁區紙出嚟,然後就嗌咪叫申請者 (或代辦人) 埋櫃枱做最後核實,過程「最繁複的部份」亦只係要嗰位人士出示身份證然後寫返低有關嘅個人資料做返紀錄,再等收費櫃檯叫名俾錢拎證就可以走人。今次民青局個職員「準時收工」,就搞到過境組嘅職員要將已經印咗出嚟嘅禁區紙 VOID 咗佢同埋處理其他相關工作;而又因為程序上已經 CLOSE 咗快勞,麥局長嘅下屬又要從頭嚟過,睇吓搞到幾廢時失事!

Be the first to comment

Leave a Reply

Your email address will not be published.


*