Lotus發佈首款電動SUV－Eletre

蓮花（Lotus）發佈新款 Eletre 四驅電動動 SUV！

可能廠方發佈嘅新車相用上黃色車身，第一眼睇落真係有幾分似林寶堅尼嘅 Urus，但眼前呢部真係的而且確係蓮花為迎合市場需求而推出嘅全新電動 SUV－Eletre。

Eletre採用廠方全新設計嘅底盤，搭載 800 Volt 電池，容量超過 100kWh。如果用 350kW 快充，廿分鐘就可以充到2/3 容量。而續航距離按 WLTP 標準唔低於 600 公里。前後雙摩打，四輪驅動加上 600 匹嘅動力組合，由0-100km/h 只需要三秒之內，極速超過260km/h。

為咗加強操控性能，Eletre 仲將氣壓避震、CDC連續減震控制系統列為標準裝備。此外車主仲可以另選主動式後軸輔助轉向、主動式防傾桿、扭力分配系統等附加裝備㖭！

祖藉英國嘅蓮花入藉中国吉利之後，Eletre 當然會喺中国武漢嘅廠房內建造，預計 2024 年會喺歐美發售。Eletre 係蓮花四年電動車計劃嘅首部發佈嘅作品。按計劃，未來幾年仲會分別推出電動房車、電動小型 SUV，同埋電動跑車。