平治 eVito 電動客貨車正式抵港

早喺今年一月頭,就有朋友喺本港某停車場發現到一部疑似 Mercedes-Benz(平治)電動客貨車 eVito 嘅蹤影。我哋當時曾經電郵問過代理,但係對方都三緘其口。到咗噚日,我哋終於收到代理嘅消息,平治 eVito 終於正式登場!

今年一月初流出疑似 eVito 於香港出現相片(網上圖片)

全新電動客貨車 eVito 繼承自柴油版 Vito,載貨空間充裕,平坦嘅地台令到尾箱更見實用。代理將會引入基本版 eVito 129 同特長陣版 eVito 129L,五座位同六座位一共四個版本,喺外型上同柴油版最大分別一定係新設計嘅鬼面罩。喺黑色三間式橫條襯托嘅標誌性嘅三角星下面,隱藏咗 DISTRONIC 同 Active Brake Assist 安全系統嘅感應雷達。講到安全,除咗標準配備嘅胎壓偵測系統為外,車主亦可以選擇唔同嘅輔助安全裝備。DISTRONIC 主動式車距輔助系統可以喺高速公路行車或者塞車慢行時,自動保持同前車之間嘅距離,令駕駛者更輕鬆。而Active Brake Assist  主動煞車輔助系統除咗會首先發出視覺同音效警告訊號提醒司機煞車外,當發覺司機未有作出適當反應時,系統會主動緊急煞車,減低發生意外嘅機會。

全新設計鬼面罩
各種安全及輔助系統

另外,eVito 亦備有 PARKTRONIC 泊車輔助系統、盲點輔助系統、車道偏移警示輔助系統,同埋可因應車速等情況去改變車頭燈光線分佈嘅 ILS 智能照明系統等嘅安全配置。

講到電動車,大家一定最關心係電量、續航距離,同埋充電時間!eVito 收藏喺地台下面嘅電池容量有 90kWh,加上有動力回收功能,以 WLTP 標準下可以提供 378km 續航力,而摩打嘅馬力同扭力輸出分別有 204 匹同 304Nm。充電方面,eVito 除咗標配咗車內水冷式交流電充電器,方便用家喺屋企或公眾充電站以最高功率 11kW 作交流式充電之外,車頭泵把左邊嘅 CCS 規格直流充電插頭,喺 110kW 功率嘅快速充電設施計度,可以於 45 分鐘之內就將電量由 10% 充到 80%。作為一部搵食車,司機擺低部車充電,跟手去食個飯返嚟,已經有足夠電量繼續開工!

eVito 配有 90kWh 電池,並平放於地台下
車頭左邊嘅 CCS 規格直流充電插頭,喺快速充電下可於 45 分鐘內就將電量由 10% 充到 80%

全新 eVito 由即日起,喺平治客貨車陳列室公開展出,意向售價為 $600,000。喺政府「新能源運輸基金」下,仲有車價50%資助!據講最快今年年中就已經可以交車喇,唔知到時我哋「汽車台」有無機會同大家試一試佢呢?

代理將會引入基本版eVito 129 同特長陣版 eVito 129L,五座位同六座位一共四個版本
平坦嘅地台令到車廂空間更見實用

*除註明外,所有相片由梅賽德斯—奔馳香港有限公司提供

另一德國品牌 Volkswagen iD.Buzz 電動客貨車亦會於稍後輸港

Be the first to comment

Leave a Reply

Your email address will not be published.


*