【美國】2030年款起車市大洗牌：NHTSA 徹底改寫「輕型貨車」定義！

熱狗算唔算係三文治？「輕型貨車」（Light truck）同「乘用車」（passenger car，正式法律用字係passenger automobiles，以下用坊間叫法「私家車」）點分？頭嗰個問題可能好難答，但美國政府經已講到明，針對尾嗰個問題嘅法律定義面臨一次翻天覆地嘅大改變！

由 2030 年款起，美國路上嘅「私家車」喺技術上隨時會多過「貨車」一大截——呢個情況同而家「貨車多過私家車」嘅生態剛好完全相反。

美國國家公路交通安全管理局（National Highway Traffic Safety Administration，NHTSA）2026年9月30號公佈咗1份全新規例文件，徹底修改咗由 2030 年款開始「輕型貨車」（Light Truck）嘅定義。雖然呢個改動嘅表面目的係調整燃油效益（Fuel-economy）標準，但喺實際運作上，呢個新例唔單止提高咗想符合「輕型貨車」、「越野車」資格嘅門檻，仲隨時會引發美國車廠將生產線搬去海外嘅連鎖效應。

新舊「輕型貨車」定義對比

呢條新例主要改咗嘅標準，最明顯嘅係收緊咗越野測試（Off-highway test），仲用咗「工作系數」（work factor）嚟取代原本漏洞百出嘅「第3排座椅」條款。下表就係用美國官方《聯邦公報》（Federal Register）入面嘅數據，比較新舊標準嘅分別：

評核標準	原有標準	2030 年款起新標準
越野測試（Off-highway test）	5個條件入面符合其中4個就得	條件刪減淨4個* （全部4個必須同時符合）
車軸離地距（Axle clearance）	7.1吋（越野測試5個條件之一）	取消
第3排座椅（Three-row seats）	能夠摺起或收起後全平就係「輕型貨車」	取消
工作系數（Work factor）	未有要求	荷載量 + 拖掛能力總和必須達到 8 500 磅或以上
傳動系統（Drivetrain）	四輪驅動（4WD）或全輪驅動（AWD）或車輛總重限值（GVWR）超過6 000磅	保持不變
開放式貨床（Open cargo bed）	如有就係「輕型貨車」	保持不變

*越野測試淨低嘅4個條件包括：

28 度接近角（approach）
14 度通過角（breakover）
20 度離去角（departure）
7.9 吋行車離地距（running clearance）

**（2027 Chevrolet Silverado，呢啲有開放式貨床嘅「皮卡 / 農夫車」（pick-up）仍然會係「輕型貨車」 ©General Motors）**

油耗標準改動車型比例對調

拜登政府時期原本設定嘅宏大目標係希望美國整體輕型車輛平均油耗去到每美加侖行到約 50.4 英里（每公升行到約 21.4 公里）；但侵仔政府呢次修訂新例會將呢個標準大幅下調到每美加侖 34.9 英里（每公升行到約 14.8 公里）。

聽落覺得侵仔政府由得啲車油耗差咗都得？呢個落差嘅其中一個關鍵原因就係出喺「點樣分開咩叫私家車、咩叫貨車」嘅定義上面。

其實上面講到拜登政府時期嘅宏大目標，基本上除非一街都係細車仲要係混合動力先至追得到。

翻查過去嘅《SAFE 規例》（Safer Affordable Fuel-Efficient），美國聯邦官員發現朝令夕改嘅政策搞到「車廠用咗一啲意料之外嘅方式去重塑市場」——例如車廠幾乎淘汰晒旅行車（Station Wagon，呢類矮車身「私家車」通常有較大嘅載嘢空間，但車身較重，油耗表現較差），轉而大量生產多用途車（Minivan，亦即係大型MPV）、運動型多功能車（SUV）同埋跨界車（Crossover）呢啲「攤得平啲櫈」嘅「輕型貨車」嚟避開嚴格限制。

**（1985 Chevrolet Caprice Stati**on Wagon **©General Motors）**

侵仔政府新例之下，原本一啲相對大架啲嘅MPV、SUV會由「輕型貨車」跌返入「私家車」範疇，要求大架啲嘅MPV、SUV追到同緊湊型轎車（Compact Car，按照美國法規車廂容積大約100~109立方呎）同樣咁低嘅油耗明顯不切實際，所以先至睇落整體放寬咗油耗要求標準，畀車廠「拉匀條數」去計全間廠咁多款「私家車」，實際都係比當係「輕型貨車」嚴格咗。

NHTSA 預計，原有制度下，美國車市大約係 70% 輕型貨車對 30% 私家車；但新例實施之後，因為界定車款嘅法定標準轉咗，呢個比例將會完全反轉，變成 70% 私家車對 30% 輕型貨車。

28 度接近角測試收緊

大部份「4×4 四驅車」車主最關心嘅一定係「越野」呢個分類。車輛想符合資格（美國有啲州份係如果「越野車」視作「輕型貨車」就徵收比「私家車」低嘅稅率），首先要有四輪驅動、全輪驅動，或者車輛總重限值（GVWR）超過 6 000 磅。除咗咁，仲要具備顯著嘅「越野」特徵——NHTSA 對呢樣嘢嘅定義就係「高離地距」。

**（Jeep® Wrangler Rubicon，NHTSA指Wrangler車系屬於高接近角車款，©Jeep®）**

原有標準下，車輛只要喺5個條件入面中4個就可以過骨。但 NHTSA 翻查過 2024 年款啱啱好符合4個條件嘅車款，發現其中高達 98.9% 其實都達唔到 28 度接近角要求。報告話，有啲車廠為咗行車空氣動力學（Aerodynamics），特登將接近角縮窄到得返 14 度。

由 2030 年款開始，一架車必須「同時」達到接近角、通過角、離去角、行車離地距嘅最低標準。換句話講，以前嗰個 28 度接近角再唔係「可有可無」嘅選擇，而系「硬性規定」。

雖然富士汽車（Subaru）曾經提出過話「用家嘅實際觀感同埋用車習慣」先至最貼近現實，但 NHTSA 並唔妥協，認為求其符合1、2項根本唔算係真正具備顯著越野能力。不過，車廠要求多啲時間適應，所以 NHTSA 都聽取意見，將新例嘅生效年份由原定嘅 2028 年款推遲到 2030 年款，畀多2年緩衝期。

**（2027 Subaru Ascent 3-row SUV ©Subaru of America, Inc.）**

點解 NHTSA 要改寫輕型貨車嘅定義？

NHTSA 直接取消咗「第三排座椅」呢個評核標準——原本攤得平啲櫈就可以走捷徑話係「輕型貨車」——NHTSA 認為「裝咗3排櫈反映緊架車係用嚟載人，而唔係用嚟運貨」。NHTSA 咁樣一搞，好多3排座位嘅 SUV / Minivan 以後想入到「輕型貨車」呢個分類嚟避開嚴格啲嘅「私家車」油耗標準就無咁容易喇。

**（2026 Chrysler Grand Caravan本身係1款7座位Minivan，因為尾排啲櫈收起後全平，所以喺原有標準就算係「輕型貨車」©FCA）**

除此之外，NHTSA 仲加入咗輕型貨車「工作系數」嘅概念——所謂「工作系數」，其實就係荷載量（Payload）加上拖掛車能力（Trailer weight rating）嘅總和。呢個評級會跟足 SAE J2807 標準。想通過呢個測試？架車嘅「工作系數」必須達到 8 500 磅或以上。

舉個例子，NHTSA 曾用過某款有 1 600 磅荷載量同埋 5 000 磅拖掛能力嘅車嚟做計算示範：兩者加埋 6 600 磅，咁樣就會唔達標。呢個改動就令一啲「扮到個樣似越野車」嘅 SUV 會由「輕型貨車」跌返去「私家車」嗰邊，從而要做到較嚴格嘅油耗標準。

呢個改動對美國嘅車市同埋消費者有咩深遠影響？

雖然美國呢條新例調低咗油耗要求，令車廠初期無咁大壓力，但係「私家車」同埋「輕型貨車」喺美國法規上要遵守嘅合規要求一直都唔同。

美國業界分析師警告，如果未來有新政府上場，再度收緊油耗標準，咁被重新歸類為「私家車」嘅車型，想達標就會變得「非常困難」。因為呢啲隱憂，車廠隨時會重新考慮將某啲車型嘅生產線搬去海外，藉此利用唔同地區嘅貿易同埋本土法規條文嚟避險。

呢個現象正正反映咗美國政府想重新定義「輕型貨車」嗰陣所衍生出嚟嘅一啲「意料之外嘅副作用」。美國人一向最鍾意大架嘅「Truck」同埋「SUV」，但隨住呢場定義革命喺 2030 年正式落地，好多以前名義上叫做「輕型貨車」嘅車，以後喺法律入面，通通都要乖乖歸類做「私家車」喇！

對 AWD 跨界車同埋3排座位 SUV 嘅買家同埋車廠嚟講，未來10年嘅規格表絕對會有一番大地震。