UBER 香港七宗罪之「第三宗罪」乘客一篤 APP 嗌車，司機就開始冒險

乘客篤 APPS 約車，通常只會諗一樣嘢：幾時有車到。但對司機嚟講，個客未上車，唔好話未知可以收到幾多錢，仲有鬆手制開始嘅成本同風險都係唔知。

唔好以為上客地點一定好近，我哋有收到唔少例子可以話「老鍊咁遠」。例如响皇后大道西近東邊街，收到派單要上干德道。嫌咪數短？响屯門黃金海岸附近響機去豪景花園，接近 7km 夠未?! 或者响沙田花園城、麗豪酒店附近，派張單要去馬鞍山海柏花園上客，足足 8km 呀 (仲未計迎海、雲海、星漣海，差唔多10km )！呢啲場面正宗「未見官先打八十」，司機已經要出油／電、時間。仲有喎，如果個客中途取消，咁就「疴拔甩」。

呢個問題，直接講， Uber 形同將呢啲成本同風險卸晒俾司機，而且可以話要司機硬食。此話何解？

大家諗返以前要打電話上的士台 Call 車，或者未被 Uber 收皮嘅「飛的」、已被收皮嘅 「HK Taxi」 Apps，如果趕住要車，又或者响偏僻村落，例如西貢牛寮、龍尾、早禾坑，元朗水蕉新村、瓦窯頭、河背村，好好醜醜都會加 $10 $20 貼士，當係補返俾司機。姑且叫做「乘客好、司機好，大家好」。

但 Uber 私家車唔駛俾喎，做乘客嘅點會唔老西都 call Uber X 呀！講白啲，十二年嚟 Uber 嘅所謂提升服務效率，可以話「推司機去死」縱容乘客。呢啲有如搶市場佔有率嘅手段，就成為的士業界攻擊網約車嘅另一個藉口！

更荒謬嘅係，乘客未上車，司機係唔知要去邊。以返前面舉嘅例去講，唔計干德道嗰啲大富貴成日都只係落山去金鐘、中環，由掃管笏碌到去豪景花園，好彩嘅，個客去沙田或尖沙咀實收過百，出荃灣都仲有七十幾。海柏花園上車，好彩嘅就過海或者出九龍，唔好彩就出返沙田，甚至更加唔好彩係去馬鞍山郊野公園，以至「到頂」NR84 總站，實收幾十蚊去荒山野嶺「餵蚊」！然後又要落返山再等單。

唔好話「司機試圖揀客正仆街」住！講白佢，呢啲「遠距離上客單」嘅背後，唔少係乘客「叫幾飛」，撳咗Uber，再睇吓有無的士嚟，邊架快到就上邊架。的士先到，Uber 就撳取消。司機白行一段，一個仙都無，你唔仆街咩??! Uber 司機係必須去到上車地點、見唔到個客超過五分鐘，先至有得袋 Uber 隔完渣嗰十幾蚊取消費。就當唔係叫幾飛，總之例如司機衝緊入馬鞍山，啱啱過咗富安花園個客取消，一個仙都無，仲要輸埋油錢/電錢；或是上緊去干德道，响西邊街英皇書院燈位個客取消，綠燈喇，右轉去寶翠園嗰邊好吖，定左轉向返中環好呢? 若說香港做 Uber 司機其實比的士佬更折墮，未必係誇張之詞。

睇到呢度係咪好想爆 Seed「總之司機揀客正仆街」「你呢班仆街幫司機開脫之嘛」，但再講一次，你自己叫幾飛而的士嚟先，搞到 Uber 司機白行一趟而一個仙都無，你就唔係杏加橙呀？吹闊啲，香港搞成今日咁嘅田地，其中一個原因就係呢啲自私自利只求自己方便，話之人哋死嘅思維。

呢啲情況响歐、美有無發生呢？如果無，點解香港可以十二年嚟持續發生？點解响香港，Uber 一邊向司機抽佣高達三成，兼夾食埋乘客預約費之餘，「第三宗罪」更見到Uber 將一啲司機同乘客互惠嘅機制摧毁，將過去的士司機未必要承擔嘅風險同成本卸俾 Uber司機，甚至有機制有如迫司機硬食，然後有如縱容乘客。說穿了，Uber 十二年嚟其中一樣所做嘅似乎係「推司機去死縱容乘客攞著數」去搶 market share。

「遠距離上客單」已經好慘，可以講仲有啲情況更加之慘上加慘。即係乜？留意第四宗罪。

警告：嚴禁政治上腦「幫滴滴、高德，或者任何中資平台抬轎」，或者認為收咗周國強、伍海山、鄭敏怡……嘅錢。本網站所有主理人員自出娘胎以來未有從事過的士行業。