【三隧分流】政府公佈分兩階段調整過海隧道車輛收費

多年前香港政府以BOT模式建設橫跨維多利亞港嘅3條海底隧道，隨著西區海底隧道（西隧）嘅專營權會喺2023年8月1號屆滿，香港政府會由2023年8月2號正式接管西隧，標誌著香港政府全面接管3條海底隧道，而喺同一時間過海收費即將大變革！

香港政府2023年3月22號宣布由2023年8月2號開始，香港3條海底隧道嘅收費將會分2階段改動，務求喺平均收費後，可以做到交通分流。

第一階段由2023年8月2號開始，東區海底隧道（東隧）同紅磡海底隧道（紅隧）嘅私家車收費將會調整做 $30，即係變相分別加價 $5 同埋 $10 ，而西隧嘅私家車收費就會減到 $60，即係平咗 $15。至於市區的士嘅過海收費就會劃一：3條隧道都係收$25 ，不過同時亦都取消「空載回程優惠」，即係無論的士上有客定無客，「過海」都係要俾咁多錢。

去到2023年尾前，就會再實施第二階段安排，私家車會再按時段收費，以達到更好嘅分流效果：

• 星期一至六(唔包括公眾假期)
  • 繁忙時段：
    • 早上07:30至10:15 / 傍晚16:30至19:00
      • 按照第一階段收費，紅隧、東隧收 $40，西隧收 $60
  • 非繁忙時段：
    • 早上10:15至下午16:30
      • 三條隧道劃一收費 $30
  • 一般時段：
    • 晚上19:00至翌晨07:30
      • 三條隧道劃一收費 $20
• 星期日及公眾假期
  • 一般時段：
    • 早上10:15至晚上19:15
      • 三條隧道劃一收費 $25
  • 其餘時段：
    • 晚上19:15至翌晨07:30
      • 三條隧道劃一收費 $20

值得留意嘅係屆時將會改由「易通行」系統實行收費安排，而一向被市民認同智力超乎常人嘅官員就諗到，為咗避免司機趕喺收費改變之前或之後衝住去或者拖慢車速唔衝去收費設施，所以政府好貼心咁諗到將隧道收費以每2分鐘遞增或遞減 $2，直至達到下個時段嘅收費水平。

舉例嚟講，如果平日夜晚19:03揸車過西隧，咁隧道費就應該會係 $56，如果慢慢碌到喺19:30先至過海，隧道費就收 $28 喇！要去到19:38先至係收$20。

其實用遞增或遞減嚟避免大家衝/唔衝去收費設施嘅論據，編輯部就真係唔清楚喇！但係其實依家時不時都會喺朝早，見到有車喺屯門公路路肩泊埋一邊等09:00夠鐘就衝巴士綫。如果用遞增或遞減方式，會唔會都同樣有啲車學晒香港政府最鍾意嘅參考對象新加坡咁會突然「壞車」等到夠鐘先一窩蜂衝入隧道呢？咁就不得而知喇！

不過提返大家，上述兩個階段嘅三隧分流方案，都只係適用於私家車（仲有的士嘅全日劃一 $25 隧道費），貨車、巴士等商用車種嘅隧道費都喺政府推出第二階段分流方案嘅同時，以「效率優先」原則全日劃一為 $50。而電單車同機動三輪車嘅隧道費就同私家車收費掛勾，收私家車嘅 40%，即係由 $8 至 $24 不等。

本台意見

其實3條海底隧道喺2023年8月嗰時都已經全數交回政府擁有啦，又有無可能跟隨屯赤隧道同埋將藍隧道嘅事例——直接唔收隧道費呢？或者咁樣先至做到真正交通分流之餘，又做到惠及民生喎！唔通大家真係要等到政府起第4條過海隧道先至可以唔使再俾隧道費過海？