上一宗罪提到，Uber 所謂司機分級，會令人以為係高級、尊貴、高質，但實際只係個司機係夠「聽教聽話」嘅全職，還是只係 Part-time。既然「鑽石級」都唔代表優質，作為乘客跟住會諗到嘅係，搭完車之後可以俾嘅嗰粒星、可以求其篤嘅評語，應該先係最能反映司機質素嘅制度。但你俾嘅嗰粒星，係唔係真係公道呢？
第一個「評語」，最簡單 ─ 無禮貌
司機專心揸車，木口木面，無好似《夜王》阿葵芳咁賣笑，乘客就可以認為係無禮貌。有收過好多司機呢啲抱怨。問題係，唔計爆粗，How to define 有禮貌先？講白啲，就算你訂 Black 比 X 貴幾十蚊，你俾嘅錢都只係 for 司機載你去目的地，唔包陪笑。仲有，司機專心睇路、少講廢話，顧住安全唔係最重要咩？
要阿葵芳咁賣笑呀？去戲院買飛入場睇戲囉
第二個「評語」複雜少少 ─ 急剎
例如載緊你返西貢輋徑篤，過咗北圍後隻左彎，司機見到有隻貓或隻狗衝出嚟，即刻重腳迫力，本來瞓到流晒口水突然扎醒，根本唔會睇到隻貓或隻狗，只係知道司機急剎，落車之後就篤一星，評語揀「急剎」。OK，你表達咗意見，但個司機會收到警告：「違反守則，嚴重者將會停權。」不過，佢想交條車 CAM 片申訴求平反都好似無門路。
第三個「評語」再複雜多少少 ─ 突然轉線
響三號幹線去緊西九，就到落油麻地個分岔位，前面部車突然收慢，司機預計收唔切，但見側邊夠位，即刻攞軚抽出去。呢一下係外國有教嘅「防衛式駕駛」，避免「隊籮柚」甚至「搞串燒」。但做乘客嘅你識條春咩！淨係知司機亂 cut 線，好危險，好驚驚。總之落車就俾一星，司機又收「嚴重者將會停權」嘅警告，但照樣有冤無路訴。
第四個「評語」羅生門級數 ─ 上車地點太遠
做乘客嘅最想響正門口上車或落車，唔碌到過去就話「明明爭少少都唔肯行埋。」問題係，所謂爭少少，有時其實著數咗而你無諗到。
例如司機響白加士街「澳牛」食飽，一開機收到張單，上車地點係廟街「龍濤閣桑拿」門口，於是打俾個客：「你行出去佐敦道口惠康得唔得？」乘客行過去唔駛三十秒，但司機兜過去桑拿門口仲要塞柯士甸道。明明提早最少兩分鐘上車，兩全其美，但就因為唔係響正門口，於是俾一星，再篤「上車地點太遠」。
四個例子都有共通點，就係乘客大晒、唔知頭唔知路，但平台照單全收，甚至出警告俾司機，然後司機啞子吃黃蓮，大叫一聲：「搵食啫，有L計呀。」
你俾一粒星、揀一個評語，可能自己都覺得只係發洩一下，搭完算數。但對司機而言，嗰粒星、嗰個標籤，會變成紀錄、警告，以至成為派單運算壓低 Priority 嘅 coding。而最仆街嘅係，司機就算估到係邊一單嗰隻西客，都無辦法申訴，要求平反。
作為乘客嘅你，有無諗過呢啲問題？恕直接講，有諗到你就唔會咁做啦！如果你真係咁唔滿意，點解唔直接投訴？係咪個申訴渠道有啲難搵？抑或只係覺得「投訴完又點唧，都坐完咯」，好似啲司機開口埋口嗰句「搵食啫，有L計呀」咁「唔想麻煩兼嘥時間」，但見到有咁簡單嘅方法可以出咗度氣，然後「搞掂」呢？
其實 Uber 响歐、美，因法例及監管制度，起碼有相對較完整嘅管理、客戶服務、申訴機制。點解嚟到香港就求其到就咁俾乘客可以求九其俾星、篤評語，司機連一個似樣嘅平反渠道都好似無？再引伸出嚟，响香港向司機抽佣高達三成，仲食埋乘客預約費，正宗食晒兩家茶禮，但管理可以揸流灘到咁？If you were Uber 老闆，見到用咁簡單嘅方法就可以瘋狂掠水，點會唔想搶盡香港嘅 market share ?!
所謂乘客評分，表面上似乎係服務監察機制，實際上好多時只係將乘客一瞬間嘅片面觀感，變成平台管束司機嘅工具。再講真啲，響乘客篤 APPS 約車嘅開始，司機已經墮入一個 no return 嘅深淵。
即係乜？留意第三宗罪。
警告：嚴禁政治上腦「幫滴滴、高德，或者任何中資平台抬轎」，或者認為收咗周國強、伍海山、鄭敏怡……嘅錢。本網站所有主理人員自出娘胎以來未有從事過的士行業
Be the first to comment