UBER 香港七宗罪《前傳》積累咗十二年無人理過嘅問題

香港政府再就網約車發牌放風，引發嘅討論焦點於數量多少，但 Uber 的反應，尤其是拋出嘅發牌數量應該達30,000 個嘅反建議，加諸於「繁忙時間叫車失敗率大升，車費甚至要上升七成」呢啲有如恐嚇嘅言論，目的擺明唔止想攞牌咁簡單，更似係要攞到一個足以左右市場、影響政策討論、主導市民出行選擇的份額。直接講，Uber(似乎)想要攞最大嘅 market share 做 leader，甚至係支配市場嘅地位。

無錯，Uber 响香港十二年了，個個都好似慣晒一講網約車就話烏罷，連去新加坡呢個 Uber 輸到無鞋挽屐走嘅地方都唔係好識得改口叫 Grab。但 Uber 嘅舉動，香港人係咪應該停一停，諗一諗，呢個似乎想「食唔晒都要食大半個市場」嘅平台，响過去十二年在香港，除咗俾你用X嘅價嘅錢坐到應該係 Black 嘅 Alphard 之外，到底做過啲乜？

如果話 Uber 响香港嘅問題，唔止周國強呢位的士業界代表開口埋口嘅「非法載客取酬」咁簡單，仲有係呢十二年嚟嘅經營方式同做法，响歐洲、美國嘅監管機構早就禁止，甚至在法庭敗訴而被禁之餘更被處以巨額罰款。甚至乎有啲做法，連曼城「四萬友」施曼尤(Antoine Semenyo) 祖家─ 非洲迦納都Banned。講緊嘅係好多做乘客認為理所當然必須存在嘅「抽盲盒」。

換句話說，Uber 並不是一間在世界任何角落 (唔計輸到無鞋挽屐走嘅東盟市場) 都可以無限放任、贏到盡嘅公司。但偏偏响香港，Uber 卻似乎一直响呢度活得舒適、自在，甚至係放任不羈嘅環境撈取業績，可是做嘅嘢係咪合理、有無問題，除咗周國強日日大叫嘅「非法載客取酬」之外仲有無啲乜嘢係唔應該存在，十二年嚟未見有市民、官員、政客認真審視。

點解？因為香港人嘅特質，做乘客只會驚無車搭、驚繁忙時間有大額加乘 (編按：Uber 向政府嘅「反建議」言論，根本就係食住呢啲心態)；做司機嘅，太洗腦地「算啦，唔駛搵食呀」「慳返啲時間，揸多兩張單，搵多兩個錢供樓交租養細路好過啦」「Uber 咁大間公司，邊夠佢鬥呀？」，即係日日做謝文武，但淨係識唱「屈我辱我，早慣面對 (開咗愛回家想返大西北但派咗單去中環) 嘅災禍」囉。

根本上可以話 Uber 香港就好似李光耀好清楚新加坡人嘅心態咁，好清楚香港人嘅心態「食住上」囉！

再講白啲，Uber 見識到香港人做乘客只想要蠅頭小利，做司機嘅只會「搵食、供樓、交租、養細路」面對就算明知係不合理嘅安排只會啞忍被「爸爸」牽着鼻子走，加諸十二年嚟嘅「唔合法」而司機權益不受保障，彷彿就養成了 Uber 最有恃無恐的土壤。

所以，今次我哋要講嘅，並唔係「應不應該發幾多牌」咁簡單，而係當 Uber 以「會無車搭、會大幅加乘」為所謂理據，有如試圖爭奪做龍頭之際，成個香港應該認真回望呢間「西方列強」平台過去十二年响香港嘅所作所為，包括到底點樣用一套响外國已被禁止嘅運作模式對待司機、點樣影響乘客，塑造今日呢個市場局面。

事實上要講嘅有好多，所以唔會一次過講晒。唔會講啲好深奧嘅技術、法律，但就會講Uber响香港過去十二年做過的事，唔係乜嘢創新、方便、填補的士不足，而係有一啲嘢，根本不應該存在，甚至响外國早已被禁、被打低。仲會講做乘客從來無諗過嘅後果，例如你以為俾個唔俾你响禁區落車嘅司機一星舒咗一口氣但司機只能謝文武mode 硬食。Uber 帶嚟嘅所謂便利，根本係建基於另一批人的沉默、啞忍與被迫接受。

講到呢度，有啲人可能會政治上腦「幫滴滴、高德，或者任何中資平台抬轎」，又者認為收咗周國強、伍海山、鄭敏怡……嘅錢。依家清楚嘅講明：
1. 我哋一貫立場，有碗話碗有碟話碟，不論美資還是中資，邊一間有問題，就「爆」邊一間；
2. 請認真考古睇返我哋對的士業嘅劣行、炒牌問題是毫不手軟，

所以啲白痴仔或唔知係咪 Uber 或其聘請嘅公關公司嘅網軍帳戶操作員唔好諗住又用「幫的士狗」或是喬裝乘客「幫司機揀客做仆街開脫」做彈藥。可以講，呢堆積存咗十二年嘅問題，無人去理，唔等如有得佢繼續下一個生肖循環。

《UBER 香港七宗罪》，由現在開始。到底「七宗罪」係邊七樣嘢，接住落嚟嘅日子，會陸續睇到。Bookmark 網站同訂閱我哋嘅 Facebook Page 就會知道。

《「第一宗罪」白金、鑽石級司機一定好高質？》已經上架
《「第二宗罪」乘客評分 – 你以為俾一粒星無事，司機隨時好大件事》 已經上架
《「第三宗罪」乘客一篤 APP 嗌車，司機就開始冒險》已經上架
《「第四宗罪」Mission Impossible 但 Uber 話之你?!》已經上架
《「第五宗罪」金鋼箍五花大綁 司機哽唔落都要硬哽到尾》已經上架
《「第六宗罪」愛回家唔止回唔到家 跣司機勁過謝拉特世紀一跣》 已經上架
《「第七宗罪」一切禍源，由抽盲盒開始》已經上架

警告：嚴禁政治上腦「幫滴滴、高德，或者任何中資平台抬轎」，或者認為收咗周國強、伍海山、鄭敏怡……嘅錢。本網站所有主理人員自出娘胎以來未有從事過的士行業