美帝打伊朗，油價忽然急升，香港車主終於見到油站招牌上嘅價錢顯示突破 $30，就算老早練得「金剛不壞之身」都真係搖頭嘆息，然後的繼續一邊呻，一邊習慣依然地拎出電話打開油公司 APPS，望住嗰啲頂盡減 $7、$8 嘅會員優惠當 Paracetamol 500mg舒解一吓。又或者你早已申請港車北上，唔介意一來一回其實無咗接近1/4缸油，自我安慰「去珠海『打爆缸』都平一截」。
但講到香港油價，除咗大叫「油公司暴利可恥」、「合謀定價不得人心」之外，大部分人似乎就只剩下一種奴隸式抱怨：「咁又點唧？唔通劏咗架車呀？」。不過如果冷靜少少，將條數拆開、扣晒燃油稅，再同鄰近地區做一個 Apple to Apple 嘅比較，你會發現事情可能比想像中更加誇張 —— 兩者之間存在嘅，唔只係價差，而係一條足以令人懷疑人生嘅「數據鴻溝」。
數據還原之「暴利鐵證如山」
首先，以睇吓截至今日 (3月10日) 本港各大油公司嘅牌價，減去「會員折扣」，同埋每升 HK$6.06 燃油稅之後嘅「普通油」嘅「淨價」係幾多
| 品牌 | 牌價 | 零售市場 最高折扣額 | 折實淨價 | 扣除稅項的 實收淨價 |
| 埃索 (Esso) | HK$30.59 | HK$8.00 | HK$22.59 | HK$16.53 |
| 中石油 | HK$30.59 | HK$7.00 | HK$23.59 | HK$17.53 |
| 中石化 | HK$30.59 | HK$10.00 | HK$20.59 | HK$14.53 |
| 蜆殼 (Shell) | HK$31.09 | HK$7.00 | HK$24.09 | HK$18.03 |
| 加德士 (Caltex) | HK$31.09 | HK$0.90 | HK$30.19 | HK$24.13 |
| 平均價： | HK$18.75 |
第二，大家去到珠海「打爆缸」，所知不少真係識嘢嘅司機，都係入香港無嘅「95# 汽油」，牌價係人民幣7.69 / 升。
但要同香港做 Apple to Apple 比較，就要用返「98# 汽油」嘅牌價人民幣9.69 / 升去計。要知道大陸其實都係有燃油稅，金額大約人民幣 2.30 / 升即係「除稅淨價 (折算港幣) 大約 $8.30。
每升比香港平均價低 HK$ 10.04
還原條數，香港 vs 珠海，每升「收實」淨價相差超過起碼大約 $6.0 甚至超過 $10.0。中国香港特區政府公佈，近年本港車用汽油來貨係100% 「內地」，睇怕你即刻想拎住玻璃樽扑向飯枱大叫 DLLM 或 CNMGB 㗎喇。不過，唔好咁衝動住。了解多一點先 ─ 供應香港嘅煉油廠係惠州….
冷靜！事關根據政府公佈嘅資料，响兩年前嘅之前嘅日子，董伯伯成日話要學習嘅對象 ─ 新加坡，係香港車用燃油嘅主要貨源。
「咁即係運費都慳埋，再刮多一筆！」
你以為廣東運落嚟就比新加坡運過嚟平咗運費？唔好忘記啲原油邊度噴出嚟先… 咪又係中東。總體運輸路線並無短到！但係，不妨睇埋應該得我哋做到嘅新加坡油價比較先。
Source: 新加坡聯合早報
新加坡嘅油站都有「會員優惠」，一般提供7-10%嘅基本折扣，但通常會夥拍銀行提供信用卡優惠，一般新加坡人會有嘅 OCBC、DBS、Citibank、渣打嘅信用卡，通常會攞到大約 20% + 3%「信用卡現金回贈」嘅折扣優惠。但新加坡有燃油稅 (每升 SGD0.79) 同埋 9% GST，而 GST 係唔計「信用卡現金回贈」嗰部份嘅金額…..
| 品牌 | 牌價 (當地貨幣) | 零售市場最佳折扣額 (當地貨幣) | 折實淨價 (當地貨幣) | 稅前淨價 (當地貨幣) | 扣除稅項的實收淨價 (HKD) |
| SPC | SGD 3.55 | SGD 0.82 | SGD 2.73 | SGD 1.79 | HK$11.13 |
| 中石化 | SGD 3.79 | SGD 0.87 | SGD 2.92 | SGD 1.97 | HK$12.21 |
| 埃索 (Esso) | SGD 3.84 | SGD 0.88 | SGD 2.96 | SGD 2.01 | HK$12.43 |
| 加德士 (Caltex) | SGD 3.84 | SGD 0.88 | SGD 2.96 | SGD 2.01 | HK$12.43 |
| 蜆殼 (Shell) | SGD 3.79 | SGD 0.87 | SGD 2.92 | SGD 1.97 | HK$12.21 |
| 平均價： | HK$12.08 |
每升平均價比香港平均價低 HK$ 6.67
咁 X 複雜嘅數，應該得我哋知道點樣計並會抽時間計。以平均價去比較，每升相差接近 HK$7.0。而請教過航運界專業人士，新加坡運油嚟香港嘅運費，從來都唔駛呢個價錢。
攤咁多數俾大家睇確係一個目的，證明香港嘅油公司自古以來都係
食人唔𦧲骨級嘅賺到盡。
地價遊戲：油站唔只係油站
其實响過去十年過外，持續有人、智庫提出關於油站地價嘅問題。而我哋响接近六年前都有簡單講過。抽返兩個重點俾大家睇返先：
1. 中国香港特區政府於2000年取消油站「約滿自動續租」制度，改為約滿後重新招標。寫到明「招標」，當然係價高者得啦。油站租金貴咗，油價點可以唔貴啲呢！
2. 以葵涌貨櫃碼頭路油站為例，1996年加德士以 $1.65億投得經營權；2018年中石化出價 $5.4億。二十一年嘅租金升幅接近四倍。去到近期，網上有討論，最新嘅有油站「成交價」接近7億。
從油公司嘅角度，就要計 21年x 365日 除返開每日要做幾錢生意先至夠冚呢條數。撇除貨車、旅遊巴「彈槍」起碼250L，你架四門私家車大約40升，柒人車大約60升，每日要幾多架幫襯先至夠呢？
無錯，仲有人工及相關開支 (勞工保險、MPF、醫療保險及其他員工福利)，但係咪每升油需要同珠海比賣貴 $10 或新加坡嘅多賺接近 $7 嘅「暴利」去支持呢？記住，珠海或新加坡嘅價錢本身已經有錢賺；仲有，特登拎埋新加坡出嚟，並非只係「抽董建華水」，而係新加坡嘅人工成本同香港相差不遠，但新加坡除稅淨價就係平香港一截，更實在反映呢啲「數據鴻溝」。同埋等啲諗住又用「香港人工貴」護航嘅網軍「自行了斷」。
「大話怕計數」之油站地價可會是…..
言下之意，油公司嘅「暴利」可以同「油站地價」存在住一個掛鈎關係，此乃一般商業邏輯，唔駛乜嘢陰謀論去推斷。2000年取消油站「約滿自動續租」制度改為約滿後重新招標，油站地皮成交價持續颷升，累計已經超過六倍。承如前段，油公司必定計算要撈取幾多「暴利」先至夠冚呢條數，唯一方法就係持續推高「除稅淨價」。
要記住油站地價嘅錢係進入庫房，這可會意味住各位車主除咗$6.06 嘅車用汽油稅之外，油公司嘅「暴利」其實係「第二級燃油稅」呢？留白俾大家自行參透。另外提返大家，要調整燃油稅需要經過立法會，但油站招標同起樓嘅賣地嘅操作方式係一樣的。
暴利 vs 賣地，又一個天仙局？
我哋無意指控任何利益輸送，只是想提出一個簡單的數學題：當香港的淨油價與广东省、新加坡等可作較直接比較嘅鄰近地區有如此巨大差距，而「香港人工貴」似乎唔成理據嘅時候，「油站招標」似乎事有湊巧提供咗一啲可能有用嘅數據…… 即係點，或者等睇吓尊崇的中国香港特區政府會唔會講解一吓吧。
也許「仇車L」想話「咁咪唔好揸私家車囉」，但香港嘅公共交通規劃有幾咁「好」，客觀自有定論吧。但「油價問題」可能潛在住一個唔係幾光明磊落嘅操作，而且涉及嘅唔止係「仇車L」好憎嘅私家車，仲有貨車、旅遊巴等嘅「搵食車」，可見此乃並非針對「奢侈品」嘅問題。而每升 $6.06 以外的金額，到底係乜嘢一回事，可會是另一種形式的「隱形燃油稅」？不論揸私家車或搵食車，還是只會做乘客嘅大家，慢慢自行參透。
後記：對汽車機械有一定認識嘅都知道除咗 Ferrari, Lamborghini, Maserati… 呢啲超跑必須用 RON 98 之外，一般私家車、七人車 RON 95 已經綽綽有餘。計埋「95號油」嘅價錢出嚟，希望你哋會睇得明點解香港嘅油站「打死都唔賣」95 電油。
| RON 95 無鉛電油價格參考 | |||
| 95 號牌價 (當地貨幣) | 實收淨價 (HKD) | 加上香港燃油稅後的 折實售價 | |
| 新加坡 | SGD 3.14 | HK$8.74 | HK$14.80 |
| SGD 3.15 | HK$8.79 | HK$14.85 | |
| SGD 3.15 | HK$8.79 | HK$14.85 | |
| SGD 3.15 | HK$8.79 | HK$14.85 | |
| SGD 3.31 | HK$9.48 | HK$15.54 | |
| 平均價： | HK$8.92 | ||
| 中国广东省 | CNY 7.69 | HK$6.09 | HK$12.15 |
Be the first to comment