斜路泊車 P 波 拉手制 就夠？唔好害人啦

前晚中環士丹頓街一輛私家車懷疑無拉緊手制溜後撞倒途人，其中一名傷者延至昨晚不治，再度引起斜路泊車安全嘅討論，縱使截至撰文前未有「磚家」、政客亂噏廿四，但網上亦再爭吵斜路泊車是否要「扭軚」vs 拉手制 and/or「P波」「足夠」。撇除香港駕駛考試制度問題，點解仲有咁多人以為拉手制甚至「P波」唔拉手制係無問題，又或者到底有幾多駕駛人士真係明白點解斜路泊車要「扭軚」嘅理論？

P波 vs 手制 vs 迫力

恕我「方丈」，响2018年12月10日北角長康街校巴衝落英皇道導致5死慘劇發生後，好多「白痴司機」表示「入咗P波咪夠囉」，結果俾小弟噴到一面屁。事實上，香港絕大多數司機頂盡只係知道 「P 波」鎖定架車唔會郁，以為入咗「P波」就萬無一失。

亦有好多人將「P波」同「N波」混淆 (其實根本 no idea)。無錯，兩者都係就算踩大油8000轉都唔會2咪車，但機械上係完全唔同。「N波」只係唔會輸出動力到車轆，而「P波」係自動波箱入面一組機械，同動力傳送無任何關連，只係一個原理有如木工「入榫」將波箱輸出端扣死，使架車唔會移動。

無錯，入咗「P波」架車真係唔會郁，但「P波」係會損壞㗎，尤其是停燈位，even 斜路，有理無理就入「P波」仲要唔拉手制嘅嗰啲傻人…..

扣鈎斷咗，鎖唔到連接傳動軸嘅齒牙，架車响斜路咪會郁囉。正解釋到點解入咗「P波」仲要拉手制 (按：正確程序係先拉手制，D轉去N等最少一秒先至直推去P)。

不論近年新款車嘅電子操作抑或陳年錢七嘅拉柄操作嘅手制，或正確名稱「泊車制動」，操作原理都係由一組威也 (或齒輪組) 將尾轆嘅剎車皮迫緊迫力碟 / 鼓。但隨住剎車皮損耗，會增加手制操作行程。

可能你會即刻駁咀「手制係架車唔郁先至拉，損乜L嘢耗呀」

私家車嘅手制連接住嘅剎車皮係同你隻右腳踩迫力時產生作用嘅係同一套組件。只不過操作過程同原理唔同，腳制迫力係踩下腳踏驅動液壓管路推動四個轆嘅剎車皮，手制就如前述由另一組機械推動尾轆剎車皮。簡單啲講，尾迫力係「星斑兩味」。

因此，手制係有可能鎖唔死架車。唔好拗乜嘢電子手制….. 你哋啲鍾意「非洲式用車」嘅白痴司機唔係成日話「電子嘢好易壞」嘅咩?!

扭軚，就係做最終補救

既然手制有可能鎖唔死架車，再又「P波」有可能「爆牙」，然後架車就會隨地勢而溜動，就有必要採取措施，防止意外發生，或起碼減低破壞程度。

上斜「扭右」或落斜「扭左」(如果有路壆在左邊，路壆在右邊則相反) 嘅目的同原理極之簡單，就係萬一手制拉唔實 and/or 「P波」爆牙而溜動，架車就隨住扭軚方向而溜，直到近壆一邊嘅輪呔壓到石壆而不再溜動。

如果咁都唔明白而仍然認為「入咗『P波』咪得囉」嘅就唔該 DLLM 交L返個牌出嚟咪再害人啦 杏加橙！

再又其實响 (好多人考完筆試就掉落垃圾桶嘅) 《道路使用者守則》另有提及如果無路壆，不論上斜還是落斜就扭左 (按：靠路面左側停泊)，目的係架車溜都向「山邊」溜，而唔會直衝。不過我個人認為還是該因應現場情況，思量一吓「碌落山」定溜向路中心而扭左定右。

P波等如手制？駕駛學院害人不淺

可能仲會有人想用 ViuTV 一集節目內駕駛學院導師話「入咗P波等如拉咗手制」嚟反駁。

第一，唔該去返前段「P波 vs 迫力 vs 手制」；
第二，嗰個操作只係某車廠嘅個別車款型號嘅程式設定，唔係所有車都有咁嘅操作。

最後，香港嘅駕駛考試制度絕對係脫離現實，但唔代表你考到個牌就可以將一切拋諸腦後。更是唔好乜卵都「你以為」，唔識就唔好衝大頭鬼！仲有要記住坐响司機位有重大責任，因為稍一差池唔止你死你事，係會隨時害人害物。

後記：點解無提及棍波？一來依家响香港想搵架棍波私家車都難，二來仲有幾多「7頭司機」知道乜嘢叫棍波吖！