話說喺2020年頭，判官有篇文提及越野路華（Land Rover）「衛士」（Defender），當時講到隨著國際間提高汽車標準，2016年1月29號呢個系列嘅第2,016,993架成品出廠之後，車廠就宣佈停產。
呢啲咁精彩嘅車又點會真係同大家「永別」吖！
2019年9月10號，新一代嘅越野路華「衛士」（L663）喺德國法蘭克福車展亮相——相對前作，呢一代嘅「衛士」會更傾向於高檔運動型多用途車（吉普）市場，由2018年10月25號啟用、佔地30萬平方米嘅斯洛伐克尼特拉（Nitra）廠房生產。
值得留意嘅係，因應汽車生產技術發展，新一代嘅越野路華「衛士」全車基本上無嘢同之前嘅版本互通——但重點係新一代嘅越野路華「衛士」正正能夠符合現時歐盟嚴謹嘅安全同環保標準。
新一代嘅越野路華「衛士」完全擺脫以往大樑式底盤再笠個車殼嘅做法，改為全鋁單體結構，車身比以前堅固，加上配備6個安全氣袋、3組合乎國際標準化組織訂定ISOFIX/ISO 13216標準嘅「汽車安全椅」錨扣、多達13種可供選購嘅主動輔助安全系統，當歐盟新車安全評鑑（EuroNCAP）喺2020年拎咗1架右軚2.0油渣版新一代嘅越野路華「衛士」（L663）去做新車撞擊測試，結果成績達到5粒星。
至於新一代嘅越野路華「衛士」二氧化碳排放量，除咗P525型5公升汽油引擎係高達每公里327克之外，其餘可供選擇嘅汽油同油渣引擎都只係每公里199~227克，而油電混合動力版本更加係低見每公里74克，明顯儘力減少咗排放溫室氣體，為保護環境出一分力。
至於講到推銷呢款新一代嘅越野路華「衛士」，參與電影拍攝就當然係一個唔錯嘅選擇，呢一次越野路華就參演咗第25齣「占士邦」系列電影——《007：生死有時》（No Time to Die）。
據悉越野路華總共提供咗10架4門110版本嘅「衛士」（L663）畀電影入面嘅魔鬼黨（SPECTRE，Special Executive for Counter-intelligence, Terrorism, Revenge and Extortion嘅縮寫）黨羽角色所用，電影入面嘅飛車特技鏡頭包括百呎飛躍、高速越野、反車之類。
唔好以為呢10架「衛士」係經過「重改」，佢哋都係用返原裝車身同機械，只係基於安全而全部裝咗越野車呔同埋防滾架。
如果睇見電影入面呢啲「衛士」咁有型而想買返架差唔多樣嘅「衛士」嘅話，又真係得㗎喎！
越野路華特別推出咗1款「衛士 V-8 占士邦特別版」，全黑外型，限量300架，定價大約90萬港紙。原型車係4門110版本嘅「衛士」（L663），恆定四驅加8前速波箱，再配備4999cc氣缸嘅P525汽油引擎，馬力去到525匹，扭力去到625牛頓米，由靜止加速到時速60英里只係要5.1秒，極速每小時240公里。
經過英國SV Bespoke修飾，外表有齊黑色 Extended Black Pack 套件、 22 吋亮黑色 Gloss Black 輪圈，前轆煞車卡鉗用上藍色 Xenon Blue 烤漆點綴、車尾行李箱有 007 專屬標誌。
車廂入面，表板外側同車門之間有 SV Bespoke 圖案、表示係限量版嘅刻蝕銘牌、門檻金屬踏板有發光007標誌、車載資訊娛樂系統嘅觸控屏幕喺開機時亦有 007 專屬畫面、睹後鏡都有投射落地面嘅007標誌添！
如果嫌007版嘅「衛士」太過張揚，想睇吓平裝版嘅話，英國駐香港總領事館趁《007：生死有時》喺香港上畫之際，擺咗1架越野路華「衛士」宣傳，展期去到2021年10月7號。
有興趣買嘅不妨去望兩眼？
Be the first to comment