平治Sprinter 一定係police car?你都 ONL799

HK Bus Channel 週前上架嘅 平治 Sprinter EVM 改造車身低地台小巴 影片節目,反應相當熱烈,收看次數合計已近90,000 (編按:因製作問題須將原來的刪除再重新上載),先多謝各位觀眾嘅支持。


點擊圖片收睇節目

唔少觀眾留言似乎較著重節目後半段嘅內容,亦當然唔少得 (疑似) 來自「慣性收視」嘅網絡打手,部份太「五毛feel」嘅基於保安考慮已被刪除,仲有好些留言「差佬車」云云…….

節目前半段已經提及「Sprinter 係一個好多元化嘅車系,可以係大型貨Van、貨車,又可以係小巴」,簡單講解咗車系可以有幾多種車身變化

真係有睇片段嘅,點會咁樣留言?! 香港人係咁㗎喇,標題黨唔睇全文唔睇片bilibala嘈咗先,最緊要擦存在感吖嘛!

明白因為2019年香港社會發生嘅事,所以好多人對於 Sprinter 只會諗到警車,但節目中展示嘅「政府車」係食物及環境衛生署同消防處,都仲係要咁樣留言,唔止證明嗰啲網民根本無睇片,更肯定香港人就係習慣性膝撞反應同埋慣性不加思索 (直接講係唔用腦或無腦用)

的確 Sprinter 車系响香港嘅最大用戶係政府,講緊97前已經係,但除咗有如貨VAN 嘅「原裝車殼」之外,仲有數量亦相當龐大嘅救護車,就算唔識車,憑肉眼睇都應該睇到 Sprinter 仲有最少一種車身構造啦。

响歐洲,Sprinter 車系嘅車身構造層出不窮,除咗有貨VAN、原廠 Düsseldorf 廠房出品或經過例如 EVM 一類改裝廠改裝嘅小巴,仲有「街斗」貨車、救護車、泥頭車、拖車、維修升降台…..

之所以有咁多變化,全因平治原廠提供嘅車身規格已經有兩大分類 ── Van type full body,Chassis Cab。

Van type full body 又會再細分 Panel van (B柱後車窗全密封),Combi van ( B柱後一組車窗玻璃,之後全密封),Crew bus (側窗全玻璃);Chassis Cab 就有「屋仔」單排同雙排,之後嘅「車陣」部份可以係「吉陣」、平板地台、原廠自卸斗 (仲可以選擇側卸或尾卸)….. 頭暈未?

source: truck1.eu

不論 Van type full body 抑或 Chassis Cab,都有三個軸距長度選擇:L1 – 3665mm,L2 – 3924mm,L3 – 4325mm;Van type full body 仲有一個 L3 extend ROH 延長後懸 (低地台小巴就係用呢個長度規格);今代 W907 推出前驅規格,Chassis Cab Single 仲有一個 Kompact 軸距3259mm嘅選擇。

咁L麻9煩㗎…..
唔好意思,除咗軸距, Van type full body 仲有三個高度選擇:H1 – 2365mm,H2 – 2620mm,H3 – 2831mm。未計「開玻璃」已經「四三一十二」!

Van type full body 規格有四個長度 x 三種高度選擇

車身之外,仲有引擎、波箱、負重級數任你配搭。今代W907 兩款柴油引擎、四個輸出級數 (110PS, 140PS, 160PS, 190PS) (上一代 W906 仲有一款電油偈 x 三個輸出),波箱就「例牌」棍波同自動波兩款,負重有3.0噸、3.5噸同5.0噸可選擇……

即係點?低地台小巴嘅 516CDi = 負重5噸配160PS油渣偈,車身係 L3 extend ROH 搭H2;警車嘅 519CDi = 5噸配190PS 柴油引擎,車身有 L2H1、L2H2 兩種;節目中嗰部消防處嘅車身係 L2H2,食環署 (上一代 W906) 314 = 3噸配140PS電油偈,車身係L2H1……. 又或者 UPS 嘅 314 嘅車身係L2H3,G4S嘅516嘅車身係L3H2………

問你哋死未!

正經講,就係有咁多配搭選擇,Sprinter 車系先至咁多元化。另外配合例如 EVM 之類嘅車身改裝廠嘅業務合作,連小巴都可以有咁多選擇。

所以話,香港只係一個井,唔止係絕對正確陳述,亦係鐵證如山嘅不爭事實囉。亦所以標題蘊藏粗言穢語係有必要性嘅囉!

後記:坊間除咗有話「平治SPRINTER必定係Police car」之外,仲有話「揸KIA CERATO 一定係差佬」,不過咁,我哋有兩個朋友揸緊,唔通佢又係差佬咩……..

响馬來西亞嘅 Kia Cerato
留意吓,有套大包圍嘅呢
唔通車主又係 Mata?? (馬拉話:眼睛。馬來西亞人對警察嘅俗稱)

後記2:另有觀眾留言或私下問我「係咪即係黃世澤『9up』有份引入嘅嗰部」….
其實响節目文字版本入面都已經透露咗個答案 (編輯/製作需要,只能出咁多)。只不過香港人硬係要直咇腸,姑且「劇透」一個無用响出街版本嘅母片畫面。

補充一句,刪除WIKI / 網典嘅內容篡改歷史係無用㗎。

Be the first to comment

Leave a Reply

Your email address will not be published.


*