【車輛講故佬】山頂纜車下半年停駛 期望2022年煥然一新

香港山頂纜車有限公司喺2021年5月20號宣佈第5代山頂纜車將於2021年6月28號正式退役,以進行最後階段嘅升級工程,迎接萬眾期待嘅全新第6代山頂纜車喺2021年年底投入服務。 (正宗5.20公佈「唔要你」)

香港山頂纜車有限公司總經理曾瑛美表示:「好多香港人都擁有一啲關於山頂纜車嘅美好回憶,相信大家都希望同呢個香港地標道別。我哋歡迎大家爭取最後機會喺未來幾星期嚟乘搭呢架經典嘅酒紅色山頂纜車。唔少長者對近幾代山頂纜車都有深刻印象,為咗答謝大家支持,我哋將會特別為長者提供港幣10蚊嘅乘車優惠,畀佢哋藉此機會懷緬過去。」

曾女士亦講到:「未來兩星期將會係香港人乘搭酒紅色山頂纜車嘅最後機會。我哋正同8位本地插畫師合作,為纜車車身設計告別畫作,並喺6月1號為2架纜車著上新裝。隨後,由6月28號開始,山頂纜車將暫停服務約6個月,以完成最後階段升級工程,並為香港帶嚟全新嘅第6代山頂纜車。」

自1888年啟用至今,山頂纜車服務香港逾130年,佢嘅角色漸漸由交通工具演變成香港深受旅客歡迎嘅旅遊景點之一。

第5代山頂纜車已經同香港人共渡32年。 為提供更優質服務同埋舒適旅遊體驗,山頂纜車有限公司早前啟動山頂纜車發展計劃,並喺2019年年中暫停服務3個月,完成第1階段工程。

為展開第2階段工程,山頂纜車服務將喺2021年6月28號暫停,以展開最後階段升級,為期約6個月,工程包括更換全新動力及拖曳系統、控制及訊號系統、更換纜索、鋪設新路軌等,並且完成山頂總站改建、花園道總站擴建工程,以迎接全新及較大載客量的山頂纜車。

香港山頂纜車將推出一系列歡送優惠同埋限量紀念套裝,務求同全港市民一齊歡送第5代山頂纜車:

  • 直到2021年6月6號, 65歲或以上長者可以港幣10蚊購買原價港幣47蚊嘅山頂纜車摩天套票(來回)乙張,包括山頂纜車來回車票同埋摩天觀景台單次入場券。
  • 2021年6月1~27日,2架山頂纜車會披上告別新裝――香港山頂纜車特意邀請咗8位本地著名藝術家,以4大主題包括香港嘅「文化」、「大自然」、「標誌性地標」、「電影」,設計2架車身畫作以展現香港過去變遷發展。參與插畫家包括Peter Ng伍尚豪、[email protected]、Stella So、無紙用工作室、皮忠、Even Lee、Jacmila、星夜John Lam。
  • 山頂纜車將推出期間限定紀念套票、「棋遊山頂」懷舊桌上遊戲、限量版手工啤酒等。

舉世知名嘅香港山頂纜車要進行翻新工程,第一階段由2019年4月23號開始,一直到2019年7月22號;第2階段由2021年6月28號開始,大約維持6個月。講起上嚟,嚴格啲嚟講山頂纜車係締造咗香港有汽車出現之前嘅一個交通工具先河,大家不妨了解佢多啲:-

《序章》

時間返到去1873年,位處喺依家山頂廣場位置嘅山頂酒店正式落成啟用,喺名流紳士嘅市場入面同中區嘅香港大酒店分庭抗禮――只不過當年如果你想去幫襯山頂酒店,一係自己行上去之外,一係叫人抬橋抬你上去囉!對於一班響香港有一定政治同經濟地位嘅人嚟講,呢種交通不便當然唔能夠容忍。

所以喺1881年5月,山頂酒店嘅創辦人、蘇格蘭商人亞歷山大.芬尼.史密夫就提出咗興建山頂纜車嘅初稿,連接中區美利樓同太平山維多利亞峽,佢仲叻仔到直接搵當時嘅香港總督要求:「你批個專營權出嚟畀我!」(山頂嘅芬尼道同芬尼徑就係以佢命名,咁後段就簡單叫佢做「芬尼叔」啦 😛 )

當時官場一聽到芬尼叔話要起一個咁新穎嘅交通工具,就好快將相關嘅法律程序喺1882年全部通過(官商勾結可恥!好似係 😕 )。

不過做生意係唔應該急功近利,所以芬尼叔首先走去歐美研究佢嘅計劃係咪真係行得通先。(果然係讀萬卷書不如行萬里路)

當芬尼叔覺得自己個計劃真係可行,咁佢就喺1885年9月開始興建香港山頂纜車。不過當時要工人喺無機械協助之下拖一大堆建築工具上去開工都真係幾辛苦㗎,所以一直搞咗兩年幾先至完成。

去到1888年5月30號,全長1350米、橫跨海拔28~396米、設有5個中途站、坡度4~25.7度嘅香港山頂纜車喺朝早8點由香港總督德輔爵士剪綵啟用,成為香港最早嘅機動公共交通工具,當日淨係靠固定嘅燃煤蒸氣發動機牽引1個30座嘅木製車廂,即日就載咗600人次!

而且當時香港仲好威㗎!香港山頂纜車係全亞洲第1條纜索鐵路添!所以喺第1年就已經吸引咗15萬人次乘搭,假如無人重複乘搭嘅話,就即係等於當時香港80%嘅人口都已經搭過香港山頂纜車――真係可以話「你無搭過就唔算係香港人」呀!

最早期嘅山頂纜車,車卡採用一個木製、掃上油漆嘅車廂,頭尾擺設幾排開放式橫條型座位,而喺車廂中間就設有一個廂房,分3個等級收費,分別係3毫、2毫同1毫,當然最高級嘅就梗係中央廂房,係預留畀頭等貴賓㗎!

講起上嚟,喺1908~1949年之間,山頂纜車車廂第一排嘅2個座位係預留畀香港總督搭㗎喎,櫈背仲有塊銅牌寫到明「此座位留座予總督閣下」(你係咪有特權?係!) 去到開車前2分鐘,呢一排座位係唔能夠畀任何其他人坐㗎!

頭先講到山頂纜車起初係用燃煤蒸汽機推動,咁佢幾時開始轉用電力嘅呢? 按照記錄應該就係1926年,當時唔單止改用咗由英國曼城生產嘅電動機,仲改用咗第2代車廂,由架空電纜供電,以拖曳齒輪帶動,可以載52人――你就當佢係1個木製嘅單卡版電氣化火車啦!

即係咁講,歷史教曉大家「好景不常」,1941年12月8號,大日本帝國軍團喺清晨突襲香港,香港山頂纜車就喺1941年12月11號因戰火而被擊毀,要去到1942年6月25號先至初步可以恢復有限度服務,直至香港重光之後,1945年12月25號先至得以全面恢復。

雖然講到香港山頂纜車喺大日本帝國軍團侵襲香港嘅時候遭炮火摧毀,一直要等到香港重光之後先至能夠全面恢復服務――其實當中有一樣嘢值得先提一提大家嘅:話說當時佔領香港嘅日本軍政府為咗粉飾太平,會安排一啲宣傳用嘅照片宣揚香港喺日軍嘅統治之下華日生活和諧,其中有去到香港山頂纜車喺一啲斜坡路軌嘅側邊拍攝過相關照片,其中1幅照片係見到華、日婦女一齊企喺路軌側邊行人路睇山頂纜車駛過,曾經放喺尖沙咀香港歷史博物館有關香港日佔時期嘅展廳展出過㗎!

《發展》

跟著簡單講吓香港山頂纜車喺香港重光之後,一啲基本嘅發展歷史――曾經聽過有人話「不破不立」,利用戰爭嘅摧毀就係推動社會快速發展嘅一個機遇,呢樣套落香港山頂纜車其實亦都可以講得通。

1948年5月,香港山頂纜車公司喺股東大會表示正在砌緊新一個車廂,1年後嘅1949年5月,香港山頂纜車公司話佢哋希望利用戰後剩餘物料自行重建一個第二代纜車車廂,期望用得到一啲較為輕盈而又堅固嘅物料。

去到1949年12月,香港山頂纜車公司最終決定買入一批鋁片,用以翻新第二代纜車,並且可以將載客量提升到62人,當時預計工程可以喺1950年2月完成。

第1個由梁錦記機器廠製作嘅第3代山頂纜車車廂喺1950年5月投入服務,單一個車卡能夠承載62名乘客,維持用架空電纜供電畀拖曳齒輪驅動系統拉動車廂。

當時嘅纜車車廂外觀顏色可能就令大家有啲驚訝:原來曾經係用上比較鮮豔嘅紅色㗎!

而香港山頂纜車係去到1958年慶祝70週年嘅時候先至將車廂外面嘅顏色轉為大家比較有印象嘅綠色嘅。

隨著香港發展旅遊業,嚟自世界各地嘅遊客越嚟越多,太平山頂亦係香港一個知名嘅必到之處。香港山頂纜車面對日益增長嘅乘客需求,1958年6月,香港山頂纜車公司喺股東大會披露已經再訂購72座纜車車廂,預計同年9月投入服務。

呢一次更新車廂,搵到英國Metal Sections公司建造新嘅封閉式全鋁車廂,每卡載客量增加到72人, 因為呢款車廂廣泛用喺香港旅遊業嘅各種宣傳,應該會有唔少「老香港」以至一早已經嚟過香港旅遊嘅遊客留有深刻印象。

之後嘅30年世界各地經濟高速增長,到訪香港嘅遊客數量亦都係隨之而上升,使用電動拖曳齒輪驅動系統拉動單卡車廂嘅香港山頂纜車面對一個不斷增加嘅遊客需求明顯力有不逮,所以香港山頂纜車公司喺1980年代著手改建整個山頂纜車系統。

提升香港山頂纜車運載能力同安全嘅招標工作喺1986年6月展開, 1988年5月18號正式公佈由瑞士Von Roll Transport System投得呢個計劃嘅合約,可以話係一個慶祝香港山頂纜車通車100週年嘅「生日禮物」。

呢次嘅改善工程可以話係極之龐大,除咗引入可以載到120人嘅雙截式車廂之外,仲加入電子化控制系統、拆除架空供電設備、將拖曳齒輪驅動系統改為纜索系統――不過呢一次香港山頂纜車嘅現場更新工作卻又唔係花費咗好長嘅時間:只係需要喺1989年6月20號停駛,去到同年8月5號就已經能夠重開――相關嘅工程界人員真係值得引以為傲!

而喺呢一次工程之後,1959年款嘅香港山頂纜車車廂現時保存有兩卡:其中一卡一直都擺喺近麥當奴道站附近嘅香港山頂纜車倉庫;而另一卡就係曾經捐出畀香港市政局,用以發展香港交通博物館…

其實香港政府1980年代曾經派員去到英國研究相關博物館模式,並且撰寫報告認為香港確實可以建立一個本土嘅交通博物館,不過好可惜正當準備好提出要求撥款興建嘅時候,命運令計劃遇上咗鄰近國家一場慘絕人寰嘅政治風波(亦即係大家耳熟能詳嘅XXXXXXXX〔由于此讯息不符合符合国家安全法规,已被屏蔽〕。總之我討厭政治),而香港嘅交通博物館亦因此不了了之。

原本保留畀市政局嘅嗰一卡香港山頂纜車車廂亦輾轉先由九廣鐵路公司火炭巴士廠收留,之後轉擺喺市政總署嘅垃圾車場,直到香港特別行政區政府決定喺2000年「殺局」,原本擺放嗰卡車廂嘅茶果嶺道場地誤打誤撞畀咗食物環境衛生署管理,而負責博物館藏品嘅卻係另一個政府部門:康樂及文化事務署。

嗰一卡香港山頂纜車車廂就響嗰一個垃圾車車場入面被人遺忘咗多年,直至有記者揭發佢淪為吸毒者嘅「啪針天堂」,先至重新引起關注。

幾經爭取之後,香港特區政府先至將呢卡車廂轉交畀香港旅遊發展局,成為現時擺放喺山頂嘅旅遊諮詢中心,究竟咁樣對佢係一件好事定係壞事呢?

順帶一提,嚟到2021年,好多人都會記得山頂纜車有6個車站:

  • 花園道總站
  • 堅尼地道站
  • 麥當奴道站
  • 梅道站
  • 白加道站
  • 山頂總站

但如果同大家講仲有1個「消失的車站」呢?

其實以前山頂纜車仲有1個「寶雲道站」,位於馬己仙峽道石拱橋正下方,不過由於距離麥當奴道站得幾十米距離,所有山頂纜車公司決定喺1985年1月1號停用寶雲道站,併入麥當奴道站,現時寶雲道站嘅車站設施已經拆除,剩低嘅只有一啲候車月台同埋梯級遺跡。

《未來》

1989年款嘅香港山頂纜車使用嘅兩截式車廂,載客量120人,係1988年更新計劃之中嘅一個全新訂製車廂,用以應付1980年代香港山頂纜車成為香港一個旅遊景點後所吸引到嘅乘客量。

然而遊客量持續不斷增加,車廂嘅載客能力明顯力有不逮,1983年建成嘅花園道纜車站(「下站」)同埋1997年建成嘅山頂凌霄閣纜車站(「上站」) 往往都大排長龍,人龍更伸延到室外公眾空間。呢個情況既阻礙一般市民出入,亦要令到遊客飽受「好天曬落雨淋」,要遊客「貼錢買難受」嘅旅遊模式確實令香港形像受損。

所以幾經爭議,香港政府喺2015年確立翌年延續香港山頂纜車經營權嘅時候,加入條款指山頂纜車有限公司可按法例正式向政府提交經審議證實可行嘅發展計劃,以趕上乘客需求。當時政府意見認為山頂纜車有限公司營運山頂纜車時嘅服務同安全一直表現良好,並且有意進行一個耗資約為6億港元發展計劃,以增加山頂纜車載客量及改善排隊同候車安排。政府相關部門認為計劃方案可取,施行上唔會出現難以解決的問題。

為提升香港山頂纜車作為代表香港嘅旅遊景點形象,呢個發展計劃具有以下目標:

  • 每程單向載客量會由120人加到210人
  • 縮短輪候上車時間大約8成
  • 令到上站同下站兩邊嘅乘客都無需再喺室外公眾地方輪候
  • 改善傷健乘客上落車安排
  • 下站會擴建室內冷氣候車區,可以容納高達1300人

為咗達到呢啲目標, 香港山頂纜車決定交畀瑞士Von Roll Transport System將車廂由1989年款嘅18.7米加長到33米,全段路線將會更換拖曳系統、鋼纜、路軌,並且加強地基、橋樑,擴建上下行纜車交匯處,其中最大規模嘅工程會係改建下站。

2019年進行嘅第1階段改建工程,會變更鋼纜、路軌、地基、橋樑呢啲主要基礎建構,準備第2階段嘅車站擴建同車廂更換工序。

當連同第2階段改建工程下站擴建工程一切完成之後,除咗會為山頂纜車乘客帶嚟更好嘅體驗之外,其實亦會為纜車軌上面嘅一啲基建作出永久改動:

  • 下站嘅上落車月台將會向山上搬70米左右去到聖若瑟書院對開
  • 原有嘅月台將會變成售票區
  • 加建2個輪候區
  • 加建1條自動人行道連接2個輪候區

結果係香港山頂纜車嘅車廂將唔會再駛過梅夫人婦女會同世界自然基金會之間嘅一段路軌,想話「睇車車」嘅就要行多幾十步喇!

至於搬咗下站之後,下站同堅尼地道站嘅距離將會縮短到得返幾十米,究竟堅尼地道站又會唔會步寶雲道站嘅後塵呢?大家不妨拭目以待。

(部份照片撮自山頂纜車有限公司、香港立法會CB(4)1292/17-18(01)號文件,感謝香港歷史研究組織「原圖有理」協助整理資料)

2021年5月31號更新:

香港山頂纜車特意邀請咗8位本地著名藝術家,以4大主題包括香港嘅「文化」、「大自然」、「標誌性地標」、「電影」,設計2架第5代車廂車身畫作以展現香港過去變遷發展――參與插畫家包括Peter Ng伍尚豪、[email protected]、Stella So、無紙用工作室、皮忠、Even Lee、Jacmila、星夜John Lam――特別車身畫作原定喺2021年6月1號開始展示,但因天雨關係,唔可以依時換上「告別新裝」,要延後幾日。

纜車公司表示,其他推廣活動日期暫時無變。